20160107 - ✿｡◕‿◕｡✿幸福的樹懶

1月7日星期四

話說熊樹懶的家因為某啲原因電視只收到四個台，但黑白人收到J2等台，有啲不忿，於是前幾日熊人去買咗個平平放大器試吓，係依然收唔到嘅。

於是打俾爸爸求救，其實爸爸都唔會太識。佢都話唔知，幸好爸爸是有名的鴨寮街王子，佢琴日打俾樹懶話問人借個放大器試吓，佢話熊人的放大器是最cheap的，（大佬，點知係咩問題，買個平平地試吓都好正常）用唔到可以退回唔收錢，今早熊人到爸爸公司附近取，再返家試試。收到了。

好開心，樹懶份人一世都廢廢地，幸好人生有幾個愛樹懶的人，爸爸媽媽，現在還有熊人，結婚之後，爸媽仍會為樹懶操心，儘管樹懶的人生不是一帆風順，但能夠浸淫在父母和老公的愛，已經足夠。

20160102 - ◇◆青衣公園◆◇

1月2日星期六

放工去咗青衣公園，因為有啲松葉會在一月轉色，好有秋冬感覺，由青衣城行過去只要經天橋就去到，非常近。

不過好明顯，當日係未變色，以青黃色為主，夾雜少少啡色，非常少的啡色，天灰灰咁，可能因今年冬天天氣太暖，要過一兩周先轉色，

有個湖其實好靚，有加拿大feel.仲有不少人打雀。

周圍行吓，公園都幾大，有啲斜坡，我哋搵個位坐低，同奸夫影吓相。

好秋冬的感覺，好靚仔的熊人。

20160101 - ♨♨大潭水塘♨♨

1月1日星期五

難得好天同熊同好姊妹及其男友行山，熊人揸車到大潭水塘嗰頭行吓山，做吓運動，當日都有十幾廿度，著褸就比較熱。

四年前同熊人第一次行山就係呢度啦。*\(^o^)/*之後我哋都有去呢度行過一兩次。

當日係曬咗啲，但行咗個幾鐘，姊妹的男友好辛苦，頂唔順。我哋唯有就佢冇再行上上塘頂。（≧∇≦）

我哋之後就分開去南記食麵，由於只行咗一陣，唔夠喉，於是周圍再去吓，去咗西環公眾碼頭，影吓空置的貨櫃。當然仲會等埋美麗的日落。

呢度日落好靚。無遮掩。

20151231 - ㊣㊣半熟工房芝士蛋糕㊣㊣

12月31日星期四

今日又有得放早，放四點三，但未病好，要趕住返屋企附近睇醫生。

今晚會出街睇煙花，但先在家吃飯。

話哂都除夕夜，當然想慶祝一下，於是路過見有芝士蛋糕就買嚟試吓。

半熟工房芝士蛋糕幾貴呀。75元得五件細細件，味道不俗，都是日式芝士蛋糕的味道。但有一層好creamy的在中間。

幾好食，但真係好細件，一啖可以食一件。

20151228 - ❤茄汁蜆肉天使麵❤

12月28日星期一，

 

放完幾日假，要返工，其實唔多精神，食埋啲藥好辛苦，

放工想快啲返家。

熊煮意粉，今次是天使麵，熊人不太喜歡天使麵，因為佢話好難處理，質地幼身，好似好易吸汁會過腍，

但我其實好幾喜歡食幼幼的天使麵，感覺似好幼滑。

西蘭花是另外渌的，上碟時先放上去。有煙肉，蜆肉同雞肉。

第二日帶lunch返公司食又真係腍咗啲呢。

20151223 - ☹☹大病一場☹☹

12月23日星期三

無端端病呀。

上星期六去咗愉景灣咳咗幾聲已覺得唔多妥，之後又聲沙，星期日唔知係唔係去完大棠落雨凍親，就開始咳。

星期一睇公司醫生唔得，之後星期二開始勁鼻塞，又攰到c，先意識到唔係鼻敏感，而係大傷風，嗚嗚，星期二冬至明明放早4:15，但大辛苦，叫熊在葵芳接我返家，返到家就只有瞓覺，瞓醒就食粥，已經食咗幾日粥....

 

星期三就sl，真係頂唔住了，又傷風又晚晚都半夜咳醒，無覺好瞓。看來聖誕假期應該泡湯了。

有個同事話抽到大獎，財多身子弱，算啦，都兩年冇試過大傷風。病吓都無法子。

20151220 - ☁ ☂┋落雨睇紅葉@大棠☁ ☂┋

12月20日星期日

想去大棠睇紅葉，因為本身當日要去元朗，既然都揸開車去，唔好浪費，點知落雨，人亦很多。警察開始在附近戒備，如果燒烤場隔離個停車場爆滿，上山的路就會封閉。

可能當日都幾大雨，所以我哋仲上到停車場，行少好多路。

天氣比較暖，正式只凍過一次，又成日落雨，唔夠乾燥。所以紅葉唔算好多，

幸好整個大棠都種滿不少楓香樹，每年不停生長，不少原本好細棵的樹都開始成長，數量夠多，總會有幾棵好紅。

呢幾棵最紅，所以超級多人，雨越下越大都無損遊人的興緻。

由於暫時入冬以來都成日落雨，太潮濕，儘管呢幾棵楓香很紅，但近看楓葉好多都爛，唔完整，唔可以影近鏡。

雨越下越大，可能因為咁，之後病咗呢！

20151219 - ヾ(◍'౪`◍)ﾉﾞ愉景灣

12月19日星期六

Xmas party之後同熊坐船入愉景灣，我同熊人都未去過愉景灣呢，非常之期待同興奮。但船費要三十五元，好貴呀，果然是有錢人的地方。

一落船係碼頭附近，感覺幾清幽的地方，有不少外籍人士，不過此行的目的係想去睇吓近來整好的教堂，似韓國/日本俾人專舉辦婚禮的白色教堂，

原來都幾遠，要再坐巴士去，經過好多樓，純住宅區的感覺真係好舒服。

落車見到個鐘樓，雖然人工化啲，不過可能當日天氣好，個天藍藍地，影相都幾正。

有馬車坐，不過其實咩人會坐呢？自己行吓好過啦。

見到個教堂啦，好靚啊，尤其當日有藍天。裡面都好靚，好似拍劇啲婚禮場地咁，當日都有人結婚，所以冇得入去睇。

圍住教堂是一個水池仔，所以令影相增加不少可觀性。呢張個倒影我好喜歡。

20151219 -(⊙＿⊙)中大獎

12月19日星期六。

 

 

公司聖誕party，今年抽到大獎，是頭獎啊。

 

其實幾奇妙。 因為我是執三攤的。

第一次抽到的是一個Senior manager，她去年都冇要到份禮物，好有大將之風，今年也不例外。

第二次抽到的同事是去年也同樣中了酒店機票的同事，他又話唔要份禮物。

老闆於是話，再抽到果個唔可以唔要份禮。

最後竟然我抽到，其實讀我個名果刻都不太相信。直到講埋我個姓先信。

老闆叫我要開心啲，同埋其實可補錢轉飛其他地方，同埋加多幾日。

20151217 -☆★沙田新城市★☆

12月17日星期四

今日去沙田新城市廣場，七樓戶外的聖誕燈飾，每年都好有心思，今年有聖誕浪漫璃光大道，有玻璃花海，有幾種色的玻璃鬱金香。勁靚勁多人影，不過手機就比較難影得靚。如果人想同花海影更加難。

仲有玻璃大道。好多玻璃製成好似花咁掛係上面，唔同顏色的玻璃我覺得好靚。

另外亦有唔少玻璃裝飾，好特別，比起其他所謂大商場的聖誕裝飾來講好特別，真係未見過，好有特色，值得睇吓。

呢個紫色燈海都好浪漫。

除了去年迷宮唔靚之外，連續幾年都好有驚喜特色。

之後唔知食乜好，想起想去麥當勞換Woodstock cushion。於是食麥當勞好過，飲吓咖啡食吓甜品，平平。

整得唔太靚，不過算啦。