20181110 - ☆★聖誕飄雪@德福廣場★☆

11月10日星期六
見以朗昨天屙完一次好似冇咩事，冇再嘔或瀉，照同佢出街，因為一早係諗住同佢出去德福廣場睇聖誕teddy bear，見佢冇咩事都出外走走。

睇廣告好似好多聖誕Bear同咩市集，去到地方其實好細好細，只有一隻bear可以影到合照，其他都擺喺好高，影唔到，市集係有嘢食，但唔多，尤其宜家十一月初比較熱，未有太多聖誕氣氛，

不過一場嚟到都要行吓，當行街街食餐飯都好。原來行出去仲有幾隻士兵bear，聖誕花，不過以朗唔多識影相。

經扶手電梯去第二期，全條走廊向上望都有bear仔，幾靚，去到中庭有間屋有啲bear展覽幾靚，幾多bear，著唔同衫，不過湊住以朗想細心慢慢觀賞就難啲啦。
bear有樂隊

有皇帝look

有pooh pooh 同paddington~





以朗都有睇吓，不過睇一走就算。

諗住同佢喺小屋附近出出入入啦，點知佢好黐身，要跟住我，可能因為始終唔係好舒服，唔太精神。



之後行吓呢度，有超市，有英記，剛剛最後兩天八折，買了三包茶葉。
最驚喜係呢度有金滿庭，仲有兩點半下午茶，同熊人攞飛行一陣就入去，以朗今日胃口好差，不過自己用匙羹飲水水自娛好耐就由得佢，我哋可以安樂食餐飯。

下午茶份量好少，可以點多幾款，有雲吞，

四喜烤夫之＂四喜＂為黑木耳、冬菇、筍塊和烤夫。吃口鹹中帶甜，是一個惹味的素菜冷盤。

水晶肴肉為冷盤菜式，加配酸酸醬汁，唔知點解金滿庭啲嘢真係好食啲。

排骨湯麵。湯麵煙韌，排骨鬆脆，湯麵清清地可以俾以朗食。



上海粗炒。幾好食，仲有雞絲粉皮冇影相。

食完三點幾見到有飄雪，即刻同以朗落去睇吓，haha，上年迪士尼都睇過飄雪，不過當時佢未識行，又未識嘢，睇咗都唔記得啦，

以朗初初都呆呆地，可能因為始終唔舒服，不過最後飄雪完了就好緊張話冇啦。




回程未上車已經瞓了，始終腸胃炎都係好唔舒服吧。

4米高毛毛泰迪熊登陸九龍灣德福廣場！德福廣場聯同德國泰迪熊品牌Steiff，11月5日起舉行「泰迪熊聖誕」展覽及德國主題聖誕市集，現場會有飄雪效果，大家可在香港迎來白色聖誕。

德福廣場二期的「泰迪熊聖誕」展覽，以德國新天鵝堡為設計藍本，4米高的毛毛泰迪熊以新天鵝堡建造者King Ludwig II造型亮相，大家可零距離跟巨型泰迪熊合照！同場有多款不同造型泰迪熊，包括以張敬軒、陳慧琳、C AllStar及鄭欣宜的登台服為造型，粉絲不容錯過。場內指定時間設有飄雪效果，營造夢幻聖誕氣氛，打卡必影。

德福廣場一期的德國主題聖誕市集，提供多款德國美酒佳餚，其中「爆脆鹹豬手」外皮香脆、肉質腍軟，配上味香醇厚的德國手工啤酒、德國啤酒味糯米糍及戚風蛋糕，大家可提早享受聖誕大餐！

Steiff泰迪熊展覽

日期：2018年11月5日至2019年1月1日

時間：上午11時至晚上9時

地點：九龍灣德福廣場二期中庭

飄雪時間：星期一至五 中午12時30分、下午1時30分、下午5時30分、下午6時30分（每場約10分鐘）

星期六、日及公眾假期 上午11時30分起至晚上8時30分，每小時1場（每場約10分鐘）

費用全免

20181109 - ( ´•̥̥̥ω•̥̥̥` )嘔好多次

11月9日星期五

早一晚請以朗食蛋捲佢好開心，呢隻蛋捲喺樓下買，好香蛋味同好脆，不過好貴，15蚊5條，不過呢個喜歡食嘢的人仔就好喜歡，一見到就要食，叫佢乖乖講謝謝都冇問題，你睇佢食得幾滋味。

星期四早上收到通告佢嗰班有人屙同嘔，都有啲擔心，不過夜晚見佢食得玩得當然冇理佢，點知星期五早上我未夠鐘就醒了，有啲奇怪，未到七點聽到佢好似咳定嘔，就喺呢個時間，姐姐都抱住以朗走出嚟話佢嘔了兩次，我懷疑琴晚食了蛋捲飽過頭，有啲自責。

但咁早都冇醫生睇架啦，我打算晏啲叫婆婆同佢去睇醫生，呢個時間，未醒哂的以朗見到我就要我抱，佢應該好辛苦，平日佢朝早同慣咗係跟姐姐，今次要我，同上次咳到嘔要我抱，都係因為好辛苦，我抱住佢希望佢瞓返之後我就返工，不過佢又嘔多次，第三次了，咁我知佢應該好唔舒服，所以我唯有請假，湊佢瞓返，好驚佢又再嘔，

九點起身，一起身又嘔了兩次，嘔到冇嘢嘔，嘔黃膽水，好慘，可能佢嘔得辛苦，想飲水，點知佢用杯飲好似好得意，飲完又飲，結果過冇耐水都嘔埋出來，不過都十點鐘，可以睇醫生，約了十一點幾睇，姐姐怕佢好餓俾了半塊麵包佢食，由於我要抱佢怕佢嘔，所以叫埋姐姐一起去睇醫生，起碼佢拎住個膠袋喺隔離準備，唔會嘔污糟人哋啲地方，點知之後又冇嘔，仲玩玩具，醫生話懷疑諾沃克，可能會屙幾次同發燒。


睇完醫生去GF拿功課，因為趁星期五都想知道佢個進度，以朗應該辛苦唔多願行，又唔俾姐姐抱，搞完一大輪都成十二點半，剛巧表哥剪頭髮，佢又一齊剪，今日肯剪髮而且唔駛抱住剪，搞完之後差不多一點，可憐的我由六點半到點幾乜都冇食過，所以趁姐姐同BB沖身時過咗媽咪屋企休息一陣，再食埋TEA先返家，交埋管理費四點左右OK哂，點知佢又起身了，冇嘔了，不過有少少燒，不過都精神，有玩，黃昏屙了一次，

晚上等哥哥早食之後先過爸爸度玩一陣，今日冇俾奶佢，佢又冇乜嘢，由於2-4午睡，今日早啲SLEEP，我折騰了一天都好攰了。

20181108 - •●❀兩老表+新書枱❀●•

11月8日星期四

今日兩老表無端端攬實哂好開心，相親相愛呢。兩個笑得好開心，玩啲跑跑跳跳，唔爭玩具時係好friend，一有玩具就爭到你死我活，

宜家呢對活寶貝好似兩兄弟咁。第日大咗唔知會唔會一起玩，如果唔一齊玩，睇返張相都會係個紀念呢，講真，真係細細個先會攬住，大個咗就唔會架啦，希望你哋大個都好似宜家咁Friend，好似兩兄弟咁。

今日淘寶張書枱到了，明明係橙色就變成紫色，不過都OK，啲木色同款色都幾靚，以朗好似好乖咁坐喺度，其實係因為貪新鮮。張凳好似有啲高，有啲吊腳，今年唔太啱，或者遲啲先有用，用到小學先換。

有自己張書枱好似好威咁，宜家會填色啦。

20181105-6 - (ಠ_ಠ)跑+襯色

11月5-6 日星期一至星期二

盡量一星期跑一次，最好兩星期跑三次啦，唔知點解越跑越肥，唔通我要上返118磅先安樂？
不過我相信自己跑咗都肥，唔跑更肥，而且會周身痛，想好似之前7-8月瘦瘦冇可能，人哋明星日花兩小時運動又重訓先KEEP到靚靚冇肚腩，唔通一星期我跑半粒鐘或跳舞就可以冇肚腩咩，可能真係有人得天獨厚，但應該好少人係咁，人哋背後日操夜操你又知咩？
宜家不求好瘦，只求114-115就算了。最緊要著返哂未生之前啲衫就得。
近日唔知點解跑得好慢，成日唔夠氣30分鐘係有5K，但好多停頓，冇氣又冇力，因為唔多喜歡跑樓下，好悶，有時調頭就屈你停，邊有心機跑。是旦了，點都要KEEP住運動呢。

工人姐姐幾錫BB，但佢啲衣著品味有時幾令人頭痛。成日同佢襯哂色，之前試過經典的黃襯黃，令人咋舌，今日灰襯灰都可以，男仔灰色冇所謂。
今日BB好Hyper~











灰襯灰ok，不過另一日(6/11)的啡襯啡就有少少冇眼睇了。




其實啡色呢隻色好難著，通常用來襯衫，成套著就真係似篤屎囉。


或者我永遠都唔會明白菲律賓的潮流。

20181103 - •●❤大閘蟹❤●

11月3日星期六
多得熊人妹妹請食大閘蟹，由香港老遠拎入嚟，我呢兩年都冇食過大閘蟹，好興奮，之前食都仲住喺維京，喺楊屋道買嚟食，唔係啲咩貴嘢，但大閘蟹係有佢的味道，啲膏係令人好難忘，雖然我唔會食太多，但食完係令人好回味，16年大肚冇食，上年未有車又唔會山長水遠買回來吃，難得今次有得食，真係幾開心。
老三陽好似話百幾蚊隻，我同熊人每人兩隻，呢啲一隻好大隻，比係我之前食的多一倍膏，宜家食兩隻=之前4隻，哈哈，好好食呢，每隻啲未都有啲唔同，啲膏真係好吸引。不過原來食兩隻咁大隻係好飽架，係好漏。
最好同熊人夾埋食三隻就夠了。唔知係唔係因為太涼，食完夜啲好似有少少肚痛呢。
Anyway，今次食得好開心，大閘蟹一年食次就夠了，可以收爐。

今日冇咖啡豆了，要出去沙田宜家買，熊人見好多人來探bb，就同我出去行街，bb好靜呢，回來知道bb又睇又手機，又食雪糕真的好激氣，手機唔知睇咗幾耐，佢有幾聲咳未好，做乜俾佢食雪糕，我唔應該隨便離開BB~明知唔好俾電子奶咀佢，但偏偏俾佢睇片，好嬲。

學校要種花，一串紅，盡力種啦。影個樣出嚟比較之後種成點。可能種死了。

20181102 - ♪♬♩♫元氣食壽司♪♬♩♫

11月2日星期五
今日冇帶飯，試了McCafe的Combo，小龍蝦包+中Latte$44.5，好食，如果叫芝士火腿會平幾蚊，你話同人哋食好貴的龍蝦包比當然唔夠好食，但44.5有包有杯中咖啡仲想點。起碼對辦，又唔多人排隊買，唔駛等好耐，ok~

晚上食壽司同大姪仔慶生，哥哥好早落去等枱。真係唔該哂，唔過一半人，好彩經理都俾佢入座。爸媽先點了壽司，手卷。


上次我哋三口子嚟食LUNCH，以朗唔喜歡食，乜都唔食，今次唔知係唔係人多，條友食得好開心，點了碗烏冬俾佢清哂，之後好似食咗幾件燒牛肉壽司，BB真係好多嘢唔食得，原本食開的炸蝦卷加了蟹子，以朗冇得食了。

我就乜都食。

我最喜歡的青瓜卷，帶子壽司同埋加洲卷。必食。

除了牛肉。

BB都希食蟹棒，今日仲有同工人姐姐一起吃，佢好開心呢。

有蟹子的炸蝦卷以朗冇得食，鰻魚又怕有骨，不過我有點粟米壽司俾佢食。

次次都點吉列蠔。即整，熱辣辣紫菜又脆脆。

食完回家好戲在後頭，有生日蛋糕呢，唔算太大個，但食少少剛剛好，以朗又係咁望住個蛋糕呢。之後一個人食咗大半件蛋糕，我差不多冇得食，夜晚食完之後仲飲哂支奶。

今日個蛋糕係福岡八女茶蛋糕，採用傳統的福岡八女茶，製作出高雅甘醇的「福岡の八女茶」蛋糕。面層精緻的唧花以八女煎茶白豆蓉製作，清甜不膩。

東海堂的綠茶蛋糕一向都靠得住，綠茶味夠濃郁，而呢個蛋糕我最喜歡面層精緻的唧花，好夠綠茶味。

今日學校派返佢上星期喺學校做的蝴蝶，幾靚呢。

20181101 - ╭。☆李公館☆。╮

11月1日星期四

同事S11月生日，有個機會食食食，宜家好少食好西，雖然出街食好貴，但間中出去休息一吓都好。上次佢哋提過李公館好食，於是就今次去試吓。

食飯前收到驚人消息，同事J的太太下月就生B了，一直話唔想生，但最後都加入父母一族。恭喜恭喜。

有幾樣招牌菜，訂抬時需要預訂的，如燉湯，冰鎮咕嚕肉，黃金脆啤梨，糯米飯。海底椰燉螺頭(無影相)燉湯很足料清甜，份量可以分到8碗。

黃金帶子煎肉餅， 肉餅面鋪滿一層薄薄的鹹蛋黃， 豬肉與帶子一起剁成肉餅，口感非常特別， 鹹蛋黃令到好香口，令人想一吃再吃。

黃金脆啤梨，

原來是墨魚膠加魚子包青芥末水果沙拉再炸，果然是招牌菜，墨魚膠很彈牙，沙拉仍是凍的，我好喜歡。加埋個芥茉醬一齊食都幾好食，但建議兩個人食一個，因為一個人食一個都好鬼飽。

杞子上湯豆苗，估唔到宜家都有豆苗食，豆苗好滑，本身喜歡食豆苗的我，大愛。

籠仔蒜香蝦蒸飯-滲滿鮮蝦汁同蒜香嘅糯米飯先係焦點，糯米飯好入味，蝦嘅精華落曬去 。

冰鎮咕嚕肉
最期待的出埸了，侍應搬出來是超巨型的，上面是一座糖膠山，只用來裝飾和拍照🤣🤣，由於預訂時講明係FOR 生日，所以有生日牌。
底部是冰，放上咕嚕肉，我們狂拍照後終於食得，外面是冰脆內裡的肉仍是熱的，肉質鬆化酸甜度剛好，配菜士多啤梨和小番茄好似冰糖葫蘆咁，非常清甜好味，好睇又好味，不過份量覺得偏少。

一座糖膠山+happy birthday牌，夠呃like。



冇得見以朗，其實好掛住佢，所以叫爸爸影吓佢，其實佢有表哥冇乜所謂，一樣開心，係我掛住佢。

回家11:05，即時落街跑18mins。抵消食了好多的卡路里。