20180919 - (◕ܫ◕) 補祝silk wedding

9月19日星期三

918是我哋結婚周年紀念，原本想918影相請假順便慶祝結婚四周年紀念，不過因為當日攝影師要影婚拍，原來918成日都係好日嚟，咁我就唯有遲一日慶祝，918放工專登落車去拎蛋糕，之前諗咗好耐揀咩蛋糕，我成日都好想試綠茶或奶茶蛋糕，但上次舊姐姐LAST DAY的美心伯爵茶蛋糕好麻麻地，所以有啲驚，不過最後都決定搏一搏試吓東海堂的皇室奶茶慕絲蛋糕，

外型簡約典雅的「皇室・奶茶」蛋糕，面層是香濃的奶茶奶凍，奶凍層下是細緻幼滑的奶茶慕絲。夾層蘊藏著上等斯里蘭卡茶葉浸泡而成的紅茶寒天，散發著淡淡清幽茶香。配上底層的紅茶蛋糕和榛子杏仁脆，別具心思。

試食之後真係覺得好得，因為好似飲緊奶茶咁香濃，食完好似飲完奶茶咁，有啲回甘，而慕思又整得好香滑，講真係想食完想再食，絕對想翻CHECK。

而影完相之後就近近地去小南國食餐好的，環境好靚，有夜景腸，點了SET，有蔥油海攙頭，烤夫，幾好食。

豆腐青菜鮮魚羹，麻麻地，好淡味，BB都唔多想食。

SET清炒河蝦，新鮮爽脆，味道超級無敵，幾好食，可點啲醋仲好食。

特登點了一個雞煨麵俾BB，都幾好食，不過以朗唔知係病定唔鍾意食，好似唔係食好多。

SET鴨，炸得好鬆化，而且熱辣辣，可以用包片皮鴨啲皮包嚟食，幾好食，

SET的菜，好老的菜，好粗好老好難咬，好多渣，幾百蚊個SET都俾啲好少少的菜吧，最後埋單時我哋同經理投訴啲菜好唔得。

小籠包KEEP到水準，皮薄，汁多，肉鮮餡多。總括來說set 麻麻抵食， 可能因為個豆腐魚羮麻麻地，菜又唔好食，寧願散點菜好過。

晚上影吓以朗套恐龍睡衣，好靚，但做得好細，三歲的碼宜家都只是剛剛合身。趁宜家仲著到就著多啲影多啲。

20180919 - •●❤外影@觀塘海濱公園❤●•

9月19日星期三

今日放假一天，因為幾個月前約好了今日影外影的家庭照，1500一小時包埋執相， 見上年影過影樓照，今年想影戶外照。又試吓囉，本想約10月11月涼啲日子，但又怕以朗返學之後一定要揀星期六日，貴幾百，最怕係佢返學之後好易病要再改期。

點知約九月都係出事，之前怕打風天氣唔好，山竹過後兩天藍天白雲，但係山竹做成的破壞令好多設施都冇咗，攝影師原本有幾個地方提議1）馬鞍山公園-自己樓下，可以秋天帶個大機去影影影都得，2）大埔海濱公園-本身我想去呢度，因為貪佢地方大，好彩熊唔揀呢度，因為山竹對大埔海濱公園有好大破壞，暫時影唔到，要改期或改地點，而我哋揀了3）觀塘海濱公園又可以影，影日落背光照，但草地因爲封了都影唔到了。

雖然九月未返學，以朗都係難逃一病，上年七月影相佢都係病了要改期，今次又係病，見佢係病尾就照去，帶病上陣，唔想改來改去。

佢今朝唔知做乜八點幾起身，可能因為鼻塞未好，佢早起身都好，可以提早瞓晏覺，因為影相約了五至六點，黃昏啲光係靚啲冇咁硬光，但係佢瞓覺時間，好彩今日早了起身，兩點左右我同佢玩玩吓就瞓在我懷中，瞓到成四點先起身，精神哂啦。今日著了狗狗衫，我都係著狗狗衫同以朗母子裝。HEHE。

初初以朗唔太合作，攝影師指示我哋互動，一起行，一起坐，崩崩跳跳，最後仲出埋吹泡泡，即刻開心哂醒哂。

由於追泡泡好開心，我哋又抱起佢轉，令到以朗玩到唔肯走，係要跑跑跑。不過宜家黃昏都仲好熱有成三十度，以朗一身濕哂，可能因為焗親之後啲傷風返頭呀。慘。

當日日落好靚，咸蛋黃一個，由於攝影師話會張張相執，要兩個月呢，希望快啲睇到相啦。

20180915-16 - (⊙＿⊙)打風（山竹）

9月15日星期六

超級颱風山竹逐漸迫近香港，全城都要做好防風措施。今朝同以朗睇醫生時有35度，真係好熱呀。佢病咗都唔俾佢出街，要休息吓，阿嫂因颱風關係提早今天做節，我哋就同爸媽吃，想食海鮮餐，於是趁以朗睇完醫生就去楊屋道買海鮮，不過近做節日子都貴了唔少。

熊人去買海鮮，我同媽咪去買衫，哈哈，本來以朗冇病可以去DPARK，佢病咗唔俾佢周圍去，費事佢散播病菌，亦怕佢再惹其他病。
 

今日海鮮餐好精彩，有鮑魚仔，好鮮甜。

好味的蟹，宜家啲蟹好靚好合時，好多肉啲殻又易咬，好味。

仲有魚魚。

熊人整的豉油蝦，媽媽通常食白勺蝦，咁整豉油蝦碌媽咪喜歡食呢。

怕唔夠餸食再買了燒鴨。

當晚熊預計明天十號風球，所以星期六晚開一陣工，結果星期日凌晨一時八號風球，起初冇雨只有乾風，而且仲係成30度有多，熊本想去兜風，不過佢泊了架車在橋底避難，見有車泊橋底，怕走咗之後冇位泊，所以冇去兜風了。

9月16日星期日
 

史上最強的颱風山竹襲港，雖然來港時已由超強颱風減弱成強颱風，但橫流實在太勁，覆蓋了香港，9點幾掛了十號風球，托賴以朗瞓到十點幾。

今次真的好大風，我哋幾個連埋姐姐唔敢出街呀。係熊人十點幾落街睇過架車。

同以朗睇明珠台的動物片，好彩整好啲天線有多幾個台睇吓，以朗第一次睇動物片，開心，一賣廣告就走咗去。
今日以朗仲病緊架，而姐姐係假期，熊又瞓晏覺，我就全程照顧以朗。諗住湊佢瞓了晏覺自己可以跳舞休息吓，點知佢瞓唔夠半個鐘就要抱瞓。冇得休息了。

朝早食餅餅開心豬。




無嘢做，搵上年啲燈籠嚟玩，今年識嘢啦，佢覺得發光好得意，要爭住玩呢。

午餐食昨天剩了的鴨肉再加通粉，加啲菜又一餐，打風餐算幾好食。

後來改了八號的球，再等多陣見細風了，晚上就過爸媽屋企冇咁悶，上星期日以朗喺太婆度攞咗支槍本來唔識玩，呢個星期同表哥玩多了，識揸槍了。之前教佢揸搶冇興趣，跟表哥玩就有興趣，細路仔跟細路仔學嘢快好多呢。












打風就咁困一日悶一日，最後晚餐食大家樂，聽朝肯定三號，要早瞓啦。

20180913-14 - o(︶︿︶)o 病了

9月13日 星期四

今日同以朗玩顏色同畫畫，因為差不多兩歲要俾佢多啲塗鴉，事實上佢見表哥揸筆同填色佢都好有興趣，雖然小手肌未控制到，但佢成日都想拎支筆畫。呢隻似蛋蛋的填色筆係同事俾我，唔會整污糟手，比較乾淨，但壞處係啲顏色比較淺，要好大力先有色。有啲俾以朗整爛了。佢只係塗鴉，我就畫啲嘢俾佢睇，可以玩半個鐘左右。

玩玩吓同佢扮睇書，佢扮睇書又扮瞓覺，希望佢大個時唔會讀讀吓書瞓覺啦。



當日中午熊人帶以朗去playroom玩，點知喺媽咪度食飯開始打乞痴，唉，估到佢中咗招，星期五早上睇cam見佢流鼻水了，知道開咗學之後會好易病，佢今次鼻水好多，星期五晚開始咳，星期五晚同星期六早上都有少少燒呢，我知道小朋友係要病吓儲抗體，而醫生亦都話小朋友打扙有微燒係正常，但我一見以朗病都係心痛同擔心，宜家真係明白咩叫養兒一百歲，長憂九十九。
 

星期六早上同姐姐帶以朗睇醫生，流住兩行鼻涕都仲好貪玩，有少少燒但唔駛食退燒藥，中午之後都退了燒。

睇完醫生同以朗行一陣，買咗個紙的魚魚燈籠俾以朗，原本想買其他，不過啲燈籠好貴呢，以朗指個peppa pig要96元，冇買俾佢啦。

20180911-12 - •●✿跑+貓貓衫✿●•

9月11日星期二，

跑過一次覺得好舒服，適當出汗對身體好，可排毒，最重要連背脊都痛少好多，所以要跑吓啦，上次係回歸跑步之作，所以小試牛刀只跑3公里，今次要跑多啲。

同自己講跑5公里，如果唔得就跑25分鐘，因為上次跑過，今次好快回復狀態，估唔到跑到5k，不過我覺得個GPS 唔太準，通常樓下會跑得好啲，跑長廊就差啲，應該是GPS問題，但總體來看都唔及今年四五月咁好咁有氣，始終經歷了六月大雨少跑，七月身體問題，八月新姐姐到來暫停。要練返好氣或者就得冬天。少雨，天氣涼會好跑啲。

宜家轉了食飯前跑對減肥的效果差了很多，宜家先搞好身體同唔好再肥落去都偷笑，要減肥我諗要跑多兩三個月先有機會。

9月12日星期三

同以朗喺屋企玩到唔知玩乜，拎件貓貓衫俾以朗睇，佢近來好喜歡貓貓，俾佢睇完仲試穿，點知穿了唔肯除，我件tee變成bb的連身裙，幾好笑，影吓佢，因為過多兩年唔會咁得意啦。大個咗高咗又冇呢種感覺了。

20180909 - ☼探太婆+新都會廣場 ☼

9月9日 星期日

呢位新姐姐放假通常好遲先出門口，有時仲會唔出街，宜家星期日佢陪以朗瞓醒為止，宜家以朗星期日可以瞓到九點幾十點架，我哋星期日變得好美好。瞓醒陪以朗玩一陣，熊煮早餐，瞓夠晏仲可煮吓我喜歡的Benedict egg， 不過今次隻蛋過熟了。

前幾日媽咪問我星期日有冇嘢做，因為想去探婆婆，可以叫熊人車媽咪去探婆婆。上幾次bb好驚太婆又好驚姨婆，尤其是驚老人家，所以好驚太婆呀，今次唔知係唔係上過playgroup 接觸過其他人，佢好似冇咁驚，初初係咁黐住我，之後姨婆俾餅餅以朗食佢都夠膽食。不過都係有啲怕太婆。不過比上次已經大有進步了。

探完婆婆兩點幾，我哋去了新都會廣場，因為熊人想吃Euro GoGo 的pizza， 我哋又可以行吓街。一去到新都會就見到salad 隻狗狗，以朗好開心，呢隻狗狗真係好可愛，次次見面都要影吓相，媽媽喺salad送了件貓貓衫俾我，好靚呢。





我哋行緊Salad時，熊就在EuroGogo搵到位了。Euro Gogo算是一個又平又好食的地方，但要自己搵位等位，好彩已經是三點幾的下午茶時間，都好快搵到位。
TEA TIME會食吓TEA SET，TEA SET有蕃茄通牛角包，牛角包熱辣辣，食落脆卜卜，仲有陣陣牛油香，但冇影到相，
當然會點我哋喜歡食的百寶PIZZA，喜歡佢蕃茄夠多，芝士多雜菜多肉少，好味。

蔬菜蛋批好似係加錢的，比較淡味。

仲有必食的蜜糖雞翼。好香甜，味道剛剛好，燒得黃金色，好完美啊。食既時候仲係熱騰騰，每一隻雞翼都沾滿甜甜既蜜糖，而且皮脆肉嫩，好味好味！


食完之後仲行咗一陣間街先返去，好耐冇乜行街，齋行都好。

20180908 - ♪♬♩♫一條蕉 ♪♬♩♫

9月8日星期六

今日一早去整頭髮，以朗食緊早餐，我出門口佢冇乜扭，整完頭髮之後約熊人喺馬鞍山廣場會合，見到以朗全身黃色，成條香蕉咁，褲黃色，衫又好襯咁都係黃色，爭在未搵對黃色鞋俾佢著，真係激死我啦，係姐姐襯嘅，但熊人冇理由由得以朗咁出門口架。激死我啦。

我哋今日本來想去玩反斗城用coupon 買嘢，但熊人最後冇去買到，因為我哋去咗飲茶，以朗食嘢都幾乖，唔駛用電子奶咀，只係俾張貼紙佢玩就乖乖坐定定食，又食河粉，春卷，腸粉，好多嘢都食，唔駛煩佢食乜，飲完茶又話晏了，同佢一齊冇辦法買到嘢的。

飲完茶見到有個吹氣彈彈，諗住俾佢玩啦，點知以朗一個人玩好驚，唔敢跳，唔記得自己喺威寶開放日度玩過，想我哋一起入去玩，但我哋唔入得去玩，佢唔敢跳，眼見其他小朋友喪跳都唔跳，浪費了幾分鐘。

可能以朗仲細，都係商場啲貓貓狗狗公仔吸引佢多啲，今次係中秋燒嘢食，幾得意幾靚，以朗勁鍾意隻貓貓，成日想攬住佢。

燒嘢食啲魚蛋同腸仔。以朗好開心，可憐佢唔知自己好似條香蕉咁出街。


次
呢個係羊羊，仲有個扮火爐，好多小朋友都會圍住個火爐，都幾靚，今個報置幾靚，幾可愛，雖然以朗應該唔太知係乜。

最緊要有佢最喜歡的貓貓同狗狗就夠了。



仲有彈結他，啲公仔真係幾CUTE。仲有個類似跳飛機的，好多小朋友跳跳，以朗又學人跳，但唔識跟住次序跳。



有啲黃紅葉的圖案，令我同熊人都想起日本，唔知幾時才可以再去大阪賞楓葉呢。