20171015 - ♥ 第一次用杯飲水/刷牙+8號風球♥

10月15日星期日

 

秋風起見以朗之前病好耐，好返了都想佢有多啲湯水，除了洋蔥水之外，仲會煲雪梨湯，因為秋天最好係食雪梨，但如果就咁俾雪梨佢食又怕涼，所以煲煲佢就可以唔怕涼。

我呢個小吃貨好喜歡食嘢，只要我哋喺餐枱附近坐低，佢就會留意我哋係唔係食嘢，一見人有食物就會9秒9 爬過來搶食。

佢係非常之喜歡飲湯，可以飲成個大人碗咁多，而且次次飲哂就喊豬。

所以我哋都放心整好多嘢食俾佢，因為佢好少唔食架。

 

飲雪梨湯飲到津津有味架。

今日又8號風球，星期日先八號波，我哋邊度都冇得去，由困馬鞍山，表哥都冇地方去，佢哋三點幾過來屋企玩，剛剛前幾天喺宜家買咗條隧道俾佢玩，有啲似PLAYROOM。

以朗唔多識玩，反而表哥就玩到好開心，加埋成百個波波，呢兩個小朋友玩得好開心。

表哥唔想返屋企呢。

最後表哥五點要返屋企，BB就瞓一陣，我同佢一齊瞓到成七點，之後食麵囉。咁又一日啦。

另外，以朗已經滿一歲，唔再係嬰兒了，係嬰幼兒，其實大約歲半至兩歲就開始戒用奶樽飲奶。

有啲人話用杯俾佢飲奶，但佢宜家係用緊飲管杯飲水，飲奶如果用飲管杯就唔多妥，因為啲奶如果績喺飲管好難洗好臭，所以我哋依家俾湯或者洋蔥水俾BB飲都係用飲管，好唔環保。

 

於是同佢試用杯飲水，佢因為見我哋成日用杯飲水，佢好有興趣，俾個玩具杯佢飲，佢都好似識用，於是俾佢試用杯飲啦，佢好開心，不過好易整瀉。

 

今日仲試同佢用牙刷擦牙，佢又鍾意啊，因為今日我喺屋企搵到啲親戚朋友送的0-3歲牙刷牙膏，佢見到彩色又以為係佢啲玩具，又想玩，到夜晚見到支牙刷就好開心囉。

開始刷牙好似更加大個仔啦

20171012 - ♥ 一歲針♥

10月12日星期四

原本同以朗約好10月6日去健康院打一歲針，點知佢十月頭有傷風咳唔好，問過醫生意見要好返哂先打針，咁我見佢星期一開始冇哂事好返哂，所以再打去健康院補約，好快有期，星期三打，即日有，但我唔得閒，就約了第二日下午，熊帶佢打。

打針之前在家食壽桃牌BB菠菜麵，開心豬。

 

去到健康院一見到好多人就好開心，成日想撩人玩。

又玩吓貼紙，成日想同人講嘢，一見到人飲奶奶就想飲，明明食咗麵先出門口，為食到不得了，真係失禮死人。

 

一歲的以朗識啲乜

1. 今日磅重係9.64KG，算好正常，冇度高，自己度大約77-78CM，
2. 唔識講嘢，但不停對住姑娘講BB玩。
3. 唔識行，但肯扶住嘢企同行都收貨。
4. 食嘢方面佢最叻，三奶二固，有時二奶三固，一歲之後要轉成三固二奶，由於佢身高體重都正常，姑娘都唔會點理佢食乜，要自己攞星星餅呢啲小測試當然冇問題。
5. 要開始用牙刷擦牙。
6. 近日成日都手指指。
7. 拍手/拜拜/HELLO動作都識做。
8. 識切切蛋糕。
9. 識疊一兩件積木。

BB宜家食嘢如下。
6:00                 200ML 奶
10:00-11:00    爛飯(1種肉，1 蔬果，1菜)
14:00-15:00    麵包+150ML (將會轉為麵/飯/通粉)
18:00              少少爛飯  (將轉為麵包/水果)
19:30              食大人飯  (由少量轉為一碗)
22:00              175-200ML 奶


今日原來打三針，
1)MMR麻疹、腮腺炎和德國麻疹混合疫苗（Measles, Mumps and Rubella）
2) 水痘
3) 肺炎13價
好似話MMR好勁，有機會引起自閉症，水痘針又可能會在5-12日先發燒同埋會出紅疹。

由於以朗由九月病到十月頭先病完，所以好擔心佢身體弱會高燒，但唔約打針又怕整整吓唔記得咁。好彩又好似冇乜嘢，其實只要佢健健康康我就開心啦。

20171011 - ♥ Euro gogo♥

10月11日星期三

同熊人去沙田宜家傢俬睇嘢，同埋睇吓燈飾咁，

於是兩口子就丟低BB去行吓街。

去睇嘢之前就食吓嘢，我哋去連城廣場的EuroGoGo 食嘢，今次有食好多嘢，點了一個平日少食的芝士茄汁海鮮意粉好足料， 有魷魚，龍利柳，蝦，帶子。酸酸既蕃茄汁好開胃，加埋一絲絲既芝士好滿足，闊條麵平日很少煮，比較特別。

必食的蜜糖雞翼。一客有五隻，雞翼嘅肉好滑，蜜糖味唔太甜，個面有少少香脆！正！

次次都食的半份百寶pizza，有幾款肉，同埋好多芝士，蕃茄，酸酸甜甜，PIZZA 薄薄脆卜卜45蚊半個已經算好抵喇！

另一個平日很少吃的牛油果PIZZA，我係牛油果控，之前食過麥當當的牛油果包，真係好難食呀，呢個只有牛油果同茄醬，好似比較寡。一般。

今日冇同BB吃飯，不過佢喺婆婆家都好興奮，一樣玩得好開心。

我哋睇咗啲燈同櫃，但都係未決定好。仲有啲精品都好吸引，想買啲飾物點綴吓屋企，但要搬咗先。而且筆直有限，唔可以亂洗呀。
想冬天擺張地氈喺屋企，又想買啲架呀，靚靚碗碟，花樽，水果盤咁。哈哈，搬咗先再睇。

20171009 - ✿自己拎奶樽✿

10月9日星期一

返工放工好少時間同寶寶玩。

不過要盡量寫blog，盡量紀錄BB的每個第一次。

佢細細個兩個幾月人仔已經成日想自己拎奶樽，不過佢兩個幾月又點會夠力拎，之後九至十個月有時會捉佢隻手仔試吓拎，不過佢懶豬都唔多願意伸手拎奶樽，但係佢已經足咗一歲，有時無聊睇人啲blog/fb見有啲十個月大，一歲都自己拎奶樽，所以俾佢試吓，捉佢隻手仔捉住，佢真係捉住支奶奶。係完全自己拎，我哋冇幫手拎，不過佢唔識拎高支奶樽，所以飲到中後段都幫佢抬起個奶樽，相信，佢慢慢會拎奶樽飲奶啦。

20171008 - ♥ 星期六日♥

10月8日星期日

呢兩日都同BB近近地出吓街，星期六去迎濤灣，當然會去吓食嘢同去阿信屋，近來同BB去街又用返BB車，其實佢用車大家都舒服啲。

佢去到阿信屋仲自由，搞吓啲零食都幾開心呀。

行街當然都食吓粉麵，熊人俾佢飲少少檸茶，佢就不停手指指要再飲。激死。

返屋企就玩恐龍，係寶寶的生日禮物，入啲chips到隻恐龍度，都幾難入架，但Bb反而鍾意玩，佢鍾意開盒蓋，閂盒蓋，入錢之類。

星期日都係同BB玩玩，食完早餐就豬早覺。好喜歡看著睡覺的BB豬，好 sweet 架。

之後又拎佢另一份生日仲禮物出來，係類似單車的，不過佢未識行住，唔係好識玩，不過佢已經好開心，佢覺得所有彩色新嘢都有佢份，知自己有得玩。開心豬🐷

夜啲我有啲唔舒服，諗住入房休息吓。點知BB知道我喺房就喊豬，又撞親吓，又成面花哂了。

20171006 -♪♬♩♫睇裝修材料♪♬♩♫

10月6日星期五，

今日原本係同BB打一歲針，仲請哂假。點知BB星期一開始都幾病，星期二熊人帶佢睇醫生，醫生叫唔好打針住，所以今日就唔同佢打針，食完早餐就出門口去睇裝修材料，順便買支膠水整埋昨天整好的羊毛氈狗狗，整好了，只是欠膠水黏好對眼。

 

主要睇多次地磚，廁所馬桶，其實包2500冇乜選擇，但都可以買到ROCA

 

廚房門口的馬賽克紙皮石最傷腦筋，因為好貴，包18蚊一尺，根本就好難搵到18蚊一尺，喜歡的都60-70元。

最後搵到呢隻都唔錯。另外地磚，廁所磚都有決定了。大概有個IDEA。

睇定啲龍頭/架之類，都OK，不過今日好熱呢，熱到HIHI，原本想飲茶，點知睇完都成四點鐘，酒樓都落場了，最後去了冰室食茶餐。
再之後去花園街行咗一陣，宜家好少有衫買，反而多咗文具，飾品。
之後我就返咗媽咪屋企洗頭沖涼先。熱C人，十月了，幾時先涼返啲呀。

20171005 - ♥ Homemade Benedict Egg♥

10月5日星期四

因為昨天舟車勞頓，都好攰吓，所以今日我哋一家幾口，買咗姐姐假之餘，仲冇出街。想喺屋企休息吓。

今日中秋補假，媽咪煮飯，可以更hea。

朝早同BB玩。

熊人整早餐，好想食Benedict egg。 熊人真係整，我真係好鍾意食Benedict egg。 個醬都要用一隻蛋去整，連埋本身兩隻蛋係有三隻蛋咁多，一之食三隻蛋都好高膽固醇。而個醬真係精髓，冇個醬真係唔好食。熊人整得好食，又好賣相，加埋幾片奇異果青青地色，靚。我忍唔住要在FB放閃。

之後休息一陣打吓機，bb 瞓晏覺我又整吓羊毛氈，下午茶時間同bb 去大家樂食下午茶餐，bb 喜歡食粟米，俾慢啲都嘈，仲俾瀨粉佢試，又開心，見人經過就撩人玩。成日想同人玩🤣

夜晚補食碌柚，兩老表都要帶碌柚帽。兩個都肯帶啊。

今日先補食昨天的湯圓，大家人月兩團圓。

20171004 - ✿中秋生日快樂✿

十月四日星期三

今日中秋正日，亦係BB生日，我前幾日買咗玩具俾佢，今日就買咗件衫衫俾BB豬，HALLOWEEN的夜光衫，80蚊件咋。

 

今日要去嫲嫲度做節，我原本想今日放假，一起入去，點知上個月BB入院，我放咗3日假，又想留啲搬屋放，見熊人唔返工我就慳一日假。
我放4:30PM，同熊人喺紅磡站會合，而熊人一早就坐馬鐵轉東鐵，喺紅磡MEET BB豬，熊人同工人姐姐。BB一見到我要我抱，即刻有人讓坐，原本諗住BB嘈嘈冇得坐，點知拎啲貼紙玩玩，佢開心豬，都叫定定地，BB想扭眼瞓，但還可以，唔算嘈，到元朗下車先至係入去的征途，去的士站冇 的士，但好長龍，最好去坐輕鐵到大棠附近坐紅小，紅小個站有百幾人吧，孭住BB唔怕重，只怕熱，好彩BB豬了，唔會吵鬧，所以即管等，等BB豬耐啲。最後花咗兩粒鐘先入到去。唉。
初初BB瞓醒想喊，慢慢熱身就好開心了。BB好多人送禮物俾佢呢，有衫，有玩具又有利是，開心豬。
BB同嫲嫲一人一個蛋糕。成十點先走，BB好眼瞓，好彩佢喺的士都瞓咗一陣，今日BB算係好乖。

 

有時諗起上年BB出世時我都仲好似發緊夢咁，宜家BB就話一歲了。我真係好開心。好感恩BB願意信任我，俾我做佢媽咪，我會更加愛你。

上年今日凌晨五點幾忽然穿咗羊水。即時飛的去咗醫院，早上七點幾八點鐘，我個小天使提早出世啦，出世時瘦瘦的，得2.6kg，47cm，但活力充沛，呢一年來為我哋一家帶來好多歡樂。

今日呢個原本細細粒嘅BB，已經變成一隻大舊仔，近日成日手指指表示佢想要嘅嘢，一見到玩具就知道有佢份，見人食嘢就爭住食。

今日一歲了，媽咪只希望你健康快樂成長就足夠啦。

20171002 -★☆ 提早慶祝生日★☆

10月2日星期一

 

連放三日假，但都忙忙，星期六搵裝修打價，昨天就帶埋BB出去睇材料。熱咗一日，

 

今日就同媽咪做節，因為哥哥佢哋昨天由台灣回來，

 

因為今日做節，唔駛煮飯，可以休息吓，同BB落街行一陣，去千色12蚊店買啲家居嘢，呢幾日九折，排大隊，

 

BB見到12蚊店有彩色嘢就好開心，我哋買咗啲貼紙俾BB玩，BB玩吓貼紙又好開心，仲買了一些BB菠菜麵。最尾諗緊買唔買榴槤月餅啦，點知BB忽然指住啲月餅。佢真係識指嘢啦。

 

之後又同BB去麥當當，都係食吓包包，其實冇咩可以俾BB食，於是俾奶奶BB食，啲人話BB乖......唔太認同囉。

 

趕住三點幾返家再同裝修師傅傾幾句咁。

拎埋BB個蛋糕就返家。返到屋企BB開始咳，之後又好多鼻水，慘，好返三日又病過，沒完沒了。

食完哂提早中秋飯之後就切蛋糕。BB過兩日就一歲了。今次可以食少少。

影相好叻仔，點知影完之好其中一隻手掂咗落啲CREAM度，哎呀，之後仲用隻手玩CREAM。激死，一歲大的BB可以食少少蛋糕呢，佢開心豬。

 

當日BB收到舅父舅母的生日禮物。

20171001 - ✿中村藤吉綠茶月餅✿

 

10月1 日星期日

 

來自京都宇治的人氣品牌中村藤吉，今年會再次推出抹茶月餅！

 

我跟媽媽都是綠茶控，去年到京都大阪期間曾想過去一去宇治吃吃綠茶的東東，奈何時間不夠，未能去看看。前陣子午飯時間看到中村藤吉限定店在金鐘開幕，我就立刻買了中村藤吉綠茶月餅劵，最晚可於中秋前一天即十月三日換領。

 

我買的月餅是--丸十月餅禮盒六個裝 (HK$ 448)

如果十月三日才拿月餅，好像遲了一點，所以星期五午飯時就去拿月餅，一盒六個綠茶月餅，媽媽分了兩個給我，分甘同味。

抹茶蓉用手採碾茶茶葉製造，茶色深綠光澤，茶味清香回甘味道清香，配上抹茶品嚐，份外配搭。而今次的至尊版抹茶月餅，更是經過超級改良，加入比去年多1.5倍的抹茶做月餅餡。

 

月餅皮不是太軟身，有點乾。但餡料有濃濃的抹茶味，很厚實，甜度因為有抹茶的苦味而令到不太甜，濃濃的抹茶味不是苦澀的，而是甘香淳厚的，那種甘香在吃完之後仍會停留在口腔內，跟一般的抹茶食品很不同。

想一吃再吃，只是448六個，即七十多元一個就真是比較貴一點。