7月10日星期一
熊人剪髮夜少少返，我陪BB豬玩玩。
喺廳度開冷氣都要同佢著返件衫衫。
雖然有啲病，但佢一樣玩得好開心。
鍾意搞個膠袋。
見到👶🏽開心笑就好開心了。BB仔開心笑容真係好吸引人。
2017年7月10日 星期一
2017年7月9日 星期日
20170709 - ㊣久違了的蟹㊣
7月9日星期日
今日又冇開冷氣，BB又喺地上爬，同佢換件背心，又做豬肉榮，佢食了西藥，好散，好大汗，成頭虛汗，睇到都心痛。會煲啲淮山蓮子粥俾BB食，可以止虛汗。
昨天姐姐改了放星期六，前一晚BB鼻水又咳，瞓得好差，我哋三個都冇得瞓，尋晚姐姐放完假回來照顧BB，我哋瞓得好少少，雖然唔會瞓得好晏，但瞓好少少。
見BB病咗，冇帶BB落街，我哋兩口子自己去迎濤灣阿信屋買嘢，再食少少嘢，再去買餸，見到有藍花蟹，而且幾靚呢，以鬼地方來說不是貴。就買啲食，上年大肚冇食蟹，坐月之後啲蟹又唔合時，所以有年幾冇食蟹啦，今年要食多啲。
仲買了花甲，又比平日平平啊。
仲有魚，熊人試整炒球，整得好好食，似出面酒樓食的。
呢餐海鮮餐好好味呢。
BB啲咳又好似好咗少少，希望佢冇咩事啦。食埋啲藥再算。
2017年7月8日 星期六
20170708 - ◐燉洋蔥汁◑
7月8日星期六
BB豬仲係傷風好多鼻水，同埋仲開始咳咳咳。
原本期待已久的影相日都要改期了。
同事提過小朋友唔舒服最好整洋蔥汁俾佢。
我看到網上好多人教整 燉洋蔥汁
其中鬼嫁料理手帳有篇教燉洋蔥汁
洋蔥非常有益，有軟化血管、降血糖、防糖尿病和高血壓、補鈣、抗癌等功效，更是女士恩物，可以減少脂肪、防止便秘，還可以緩解體寒等。原來更是止咳妙藥，對初起的咳嗽挺有用，大家咳得辛苦，不妨試一試，未能止咳，也能強身健體，而且味道一點都不難吃，甜甜的很易入口，洋蔥片之後可拿來吃掉，煮東西，亦可做洋蔥冰，做法按這裡。
為了BB唔好再因爬地而凍親，我哋成三十度都唔喺日頭開冷氣，所以BB穿背心，肥肥的BB，有點豬肉榮的影子。
熟咗的洋蔥好甜，唔需要落任何調味都好味，而且燉洋蔥汁的材料只有洋蔥，純天然的食材，半歲至一歲剛吃固體都可以食用吧。純天然的食材就算功效不如人家所說的，都不會飲壞人。
一個洋蔥 燉完之後只有一小碗(BB碗)但真係好甜好好味，BB豬當然又非常喜歡，又飲到拍哂枱。
沒有發覺明顯功效，但趁暖飲都令BB幾舒服吧。
2017年7月7日 星期五
20170707 - ◊♦上岸料理♦◊
7月7日星期五，
今日同朋友食生日飯。。
BB病了，好多鼻水，好掛念，叫爸爸影相俾我睇，唉，隱約見到有鼻水
約了八點尖咀，七點放工去買少少嘢先。
見到金車厘子平平，因為要盡快食，四十幾蚊就買啲試吓。
今日係我的生日飯，去上岸料理，尖沙咀棉登徑7-9號地下B舖 ，幾年前仲有去棉登徑飲嘢，點知幾年冇去，發現棉登徑已經唔同哂，冇咩BAR飲嘢，反而開咗好多高級食店。酒吧的沒落，這條酒吧街逐漸進化成為食街: 拉麵、燒肉店、日本料理、西餐等的進駐，比以往更熱鬧。
其中一間位於街中的日本料理店：上岸料理。門面極之低調的簡約，沒有窗戶可窺探內裡的情況，長掛布更遮蓋了趟門上唯一的玻璃，更顯神祕感。
加了醋調味的青瓜跟海蜇，冰涼口感，有啲微酸，好食。
豐富的「雜錦刺身」（$700）是這夜的主角，海膽、中吞拿魚腩、三文魚腩、牡丹蝦、帶子、竹簽魚、鯛魚和帶子都被網羅其中。各款刺身都新鮮，中吞拿魚腩與三文魚腩兩者都甚肥美， 海膽十分新鮮，平日很少吃海膽的我都不介意多吃一點用，帶子肥美鮮味。
新鮮程度有點像在日本築地市場吃到的。
三文魚及吞拿魚壽司，這個有點失望，因為紫菜不夠新鮮，有點腍，脆口一 點才合格。
鰻魚飯，鰻魚燒得很有光澤油潤，肥美鬆化，而且夠厚身，賣相誘人，而且鰻魚份量多，飯比較少，幾乎把飯也覆蓋。加上鰻魚汁融入魚肉當中，可以用來撈飯。珍珠米飯香腍軟，伴勻醬汁後，飯魚比例適中，可以每口飯都有鰻魚。
天婦羅，一般，有點油。好像東京那店子好味一點。
明太子雞翼 $38，這個等了很久，外層燒得香脆，包著惹味的明太子，咸咸的佐酒一流。
黑松露烏冬，香濃的黑松露帶點芝士味。烏冬彈牙，味道和口感都是不錯，師傅還以火灸令面頭有烤過效果，不過其實很重口味。
高質素的日本料理，這頓生日飯好好吃，令我可以一解對日本相思之苦。
返到家BB病但貪玩，可能鼻水鼻塞，BB成晚睡不好。
2017年7月6日 星期四
20170706 - 又病了(@[]@!!)
7月6日星期四。
bb豬又病了，上個月中先有傷風，之後咳，
好返都係三個星期左右，琴晚又忽然流鼻水，佢有上次啲藥可以食住先，但啲鼻水好似好多，阿嫂帶開表哥睇醫生，問我帶唔帶埋表弟，叫姐姐一齊去囉，
bb冇燒係精神的，但鼻水好多，肯定好快到氣管，俾一個星期藥，俾定咳水，最緊要唔好燒。
bb在診所開心豬，玩公仔。
點解同公仔一樣架？個鼻同個咀一樣。妹妹豬？
返到屋企一樣扭我抱。肥肥的腳腳。
2017年7月4日 星期二
20170704 - ♠♤九個月了+夜晚跑♤♠
7月4日星期二
Day 274
bb豬九個月啦，我哋一直笑bb豬係無齒之徒，點知bb豬上星期終於爆咗三隻牙仔啦，宜家已經超過廿磅，我真係抱到手軟了。
bb豬宜家最鍾意食粥仔，香蕉同埋星星餅。宜家有牙仲會食少少飯同埋麵包。
bb每日就係周圍玩，將床頭櫃啲嘢飛哂落床，將地櫃啲玩具飛哂落地，四圍爬咁。開心豬。
bb開心我都開心。
間中會撞到頭仔紅哂。
呢個食餅樣，食自己啲餅餅就最肉緊。
飲奶就一時時，有時飲哂，有時又唔多想飲。
晚上都仲有跑步，一般係30分內4.5km左右，呢啲天時晚上跑都好熱，不過跑跑之後係好瞓啲同冇咁怕熱。減肥就難啲，因為始終跑得唔多，只想一個月瘦一磅都好。
有時想跑又落雨，有時又m到，星期五同bb豬覺仔，一個月扣扣吓，其實跑到幾多日？
六月跑了六日，今個月都想跑多啲。估計要跑十日先有用。唉
2017年7月2日 星期日
20170702 - 生日快樂✿｡◕‿◕｡✿
7月2日星期日
今日我生日，上年生日BB豬仲喺肚裡面，開始見肚，同熊人及肚中的BB豬去了尖沙咀的迪士尼3D館，之後同爸媽食飯同食蛋糕，都好開心呀。
今年就我哋三人行。
熊人整咗生日蛋糕俾我，係STRAWBERRY CREAM CAKE，今次個CREAM好輕身，有啲似ITALIAN TOMATO咁，好好食啊。我覺得好好味。個SPONGE CAKE都好正，熊人整得越來越好味。
我哋好似平日早上湊BB，食粥仔之後食奶奶，瞓一陣晏覺先出去，我哋BOOK了K11的下午茶BUFFET，3:30，但BB成3點鐘先瞓醒，所以都好趕住出去，佢雖然遲起身，但因為咁就避咗場大雨了。出門口冇乜雨，唔錯。
K11的TEA BUFFET唔錯，都幾多嘢食，喺今日冇乜食嘢的情況下，戰鬥力好高，飯麵都食少少。
呢間蛋糕好多款，好好食，有綠茶紅豆，OPERA，拿破崙，芝士蛋糕，細細件但質素高，喜歡食蛋糕的人，呢間真係唔錯架。
下面的是芒果夏威夷果仁芝士蛋糕，都幾特別。
至於BB呢？佢有咩好食，佢可以食水果，宜家BB豬有三隻牙仔，可以食剪到細細粒的水果。仲想俾西瓜佢食，但冇，西柚又好似唔太好，唯有俾少少橙佢食，佢冇乜好食，只有睇我哋食，所以悶悶架，好彩佢都唔算好扭，有時會主動撩侍應生，撩隔離啲食客，好開心咁，
到後來佢真係好悶就俾星星餅呀同壽司飯佢食，BB一有嘢食就唔嬲豬仔了。
最後我哋食到五點半先走，由於怕落大雨，所以我今日用孭帶，BB回程時因為孭住所以豬咗覺仔。XD
晚上返到佢好飽，乜都冇食，最後到咗十點幾bb豬了之後我哋就食蛋糕。
2017年7月1日 星期六
20170701 - ♠♤反斗車王@又一城♤♠
7月1日星期六
暑假差不多到了，好多大商場都開始有暑期活動，又一城配合電影反斗車王上演(7月13日)有反斗車王公仔俾大家影相，仲有POPUP STORE。
雖然BB豬未識咩反斗車王，但我都諗住同佢出去行吓。
BB出車了，好神氣。
現場好多小朋友，多數係男仔，大部分人都影主角麥坤，由於要等好耐，所以都冇排隊影麥坤，只係影黃色的小薑，
仲有黑旋風，志在必參與，由於BB都未識，所以唔駛同佢迫POP UP STORE 買東西，POP UP STORE 有好多小朋友，食嘢方面更多人，最後我哋去FOOD COURT 食譚仔就算了。
之後行咗又一城一陣，
最後四五點坐馬鐵，BB又扭眼瞓，最後出咗馬鐵時，BB竟然攰到自己豬覺仔。
之後又去31樓同哥哥佢哋食飯，今日提早慶祝生日。去到表哥屋企，好開心可以玩玩呢。
爸爸訂咗蛋糕俾我。
BB臨切蛋糕時都豬覺仔，好彩最後切蛋糕時佢都起身了。
呢個係日本蜜瓜蛋糕，蜜瓜好清甜好食呀。CREAM都好滑。
BB又要食蛋糕呀。最後都分少少CREAM俾佢。
訂閱：
文章 (Atom)