20161209 - ヾ(◍'౪`◍)ﾉﾞ出院了

12月9日星期五

冇再發燒，所以可以出院，一早大約七點鐘，bb就起身要食，咁我問姑娘拎兩支奶俾bb。

點知佢俾咗三支，我拎一支返家留念，初初出世喺浸會餵奶都係呢隻，呢隻奶專俾醫院，出面冇得賣，一支三安，好似玩具咁細支。剛出世時，只飲50ml都飲成半小時，要分三次飲同掃風，宜家豬仔一口氣十分鐘入哂，由於住隔離病房，奶係放在房門口用熱水座熱，我飲完一支再出去攞一支嚟飲，點知唔肯再飲，激死我。等到九點幾，姐姐到，又要飲奶，因為之前只飲了三安，但又係飲一支就罷工。

九點幾十點，兩個醫生評估過，可以出院，去藥房俾50元同攞支眼藥水當鹽水就回家，

我們的家有bb豬才像樣呢。

回家我就倒頭大睡到5:30，因為喺醫院凍親，感冒返頭，我去樓下睇醫生先過媽咪度，一日醫院真是彷如隔世。

20161208 - 入醫院╭∩╮_(︶︿︶)_╭∩╮

12月8日星期四

昨晚有點燒，叫姐姐餵夜奶時幫忙量體溫，點知四點鐘BB 發燒38.2度，熊人同我坐的士去醫院，半夜清晨時份等個幾鐘都唔會叫一個籌，公立醫院裡的人命真係好唔值錢，

等到六點幾七點終於有得睇，37.8度，要入院觀察。

點知上到病房耳探同腋探都冇燒，一 直都再冇燒，看來退燒了。熊人員點左右就返工上大陸。

但BB要抽血驗，要我喺出面等，BB豬隔住兩度門都喊得好大聲，我好想喊，我希望自己可以代佢辛苦代佢病。

我十二點左右返家，收拾少少嘢就回醫院看BB，在家吃午飯時看著沒有BB的家，我都喊起上來，做媽媽了，仍然好軟弱。

回到醫院三時左右，姐姐有陪我一陣我叫佢返家，五點至七點我就自己一個等熊人來。

BB都是睡覺，好乖，有人通知化驗鼻涕結果是BB有感冒，只要唔再燒就可以明天出院。

BB都冇咩事，冇咁精神，但唔燒已經好好了。

七點左右熊人到，我就去食晚飯，因為晚上九點至早上九點只有一個人可以陪BB豬。當然係我啦。

BB在熊人差不多走時已經睡了，一直等佢起身食奶，十二點未起，一點都未起，結果點半左右起身就大吵大鬧要食奶， 一次過食兩支三安奶，之後換片片都好乖，換完片好似好精神，好彩陪佢半小時就睡了，食完餐夜奶我就安樂哂，攬住BB都瞓到一小時熟睡。總算捱了半晚。

 

20161207 - 〒▽〒發燒

12月7日星期三

今日同熊人見面五周年，不過因為豬仔病了無哂心機。

豬仔中午沖涼仲好地地，沖涼之後試穿一直好大件的熊大衫，又勉強著到呀，之後我帶姐姐去銀行，擺低bb喺媽咪度。買嘢食，買餸買日用品。

之後返到媽媽度，豬仔只是睡，熊人回來覺得豬仔不太生猛，只想睡，覺得有點熱，所以吃過晚飯後用額探探熱，有點燒，平時體溫是36度多，而今天是37.5左右，由於額探不太準確，於是問嫂嫂借了耳探機，都是接近37.5度，即是接近發燒了，由於晚上沒有醫生，所以只好觀察多點時間，

結果慶祝五周年的蛋黃哥朱古力香蕉蛋糕都冇心機食。

20161206 - ✿｡◕‿◕｡✿鍾意睡覺的B

12月6日星期二

Bb成日俾人話唔肯瞓，其實好乖呢，我湊住佢係成日瞓晏覺呢⋯

可能因為bb一出世無耐都係我暗佢瞓覺，所以佢特別跟我瞓覺，好多時有大眼睛我都可以令到佢瞓覺。

佢唔肯跟婆婆嫲嫲瞓覺架，佢間中好眼瞓都會俾老公暗到，佢都肯跟姐姐瞓，但唔係百分百跟佢，有兩次試過我整到bb瞓咗但瞓唔熟睡，過咗姐姐手就醒咗之後唔肯瞓。有時扭眼瞓會喊，我抱佢就會唔喊，再過一陣就瞓埋。

不過如果肚餓就點都喊豬。

20161204 - •●✿ 久違的壽司✿●•

12月4日星期日

凌晨時份，熊人搞唔掂bb，我氹咗bb豬了之後就諗住在梳化一齊休息吓，點知姐姐走過來話照顧bb，咁我見自己琴晚只睡了三小時，所以都想睡一覺，所以決定唔勉強，點知之後聽到喊聲，五點咳醒時，姐姐話佢唔瞓仲big eyes。姐姐放假都俾小魔怪玩，好慘。

99實在太喜歡bb，所以差不多每個星期六日都來睇bb，又叫我哋兩個去拍吓拖，佢睇住小魔怪就得，咁我都難得可以出去行吓，今日三點左右出去，熊人提議食壽司，都好呀，好耐冇食，尤其魚生足足十個月冇食過。

所以要食吓帶子。

吞拿魚等。由於早上食唔少雲吞，所以只食少少壽司就夠。

今日隻豬喺嫲嫲手上都唔多肯瞓覺。成個下午只睡了一小時。搞到我出街都睇住個cam，見到佢同嫲嫲鬥，又喊又嘈咁。就快人人買佢怕。

20161203 - ✿｡◕‿◕｡✿兩個月

12月3日星期六

今日同哥哥佢哋晚上食飯，打邊邊，食海鮮，我同熊人去西貢買海鮮，星期五晚熊去夾band,回來時大約三時bb要食奶，點知佢餵完之後bb又唔瞓，最後我暗到佢瞓已經五點半了，我又咳又瞓得唔好，九點鐘又要起身去整頭髮，即係瞓得三個幾鐘，整完頭髮一點左右，回家同熊人食早餐之後就坐車去西貢。

上次去西貢仲大住個肚好熱咁四圍行，今次個b已經兩個月了，以前拍拖時都會去西貢行吓，都幾開心，今日一路行一路睇住個b,成日心掛掛。由於食咗好大個早餐，所以去到只食甜品，拿破崙同埋合桃糊都幾好食。

之後買蟹魚同蝦打邊邊，仲有一早訂咗的蛋糕慶祝，雖然bb冇我食，但叫做留個紀念。

20161201 - ╭❤╯╰❤╮天賜的禮物

12月1日星期四

今日係同熊人FB相識五周年，這五年變化好大，同熊人由相識，拍拖到結婚，今年仲有bb，時間雖然不長，但經歷了人生重要的事。

如果說，熊人是天賜給樹懶的禮物，聊麼，bb豬則是天賜給樹懶熊人的禮物。

人生得此禮物，如願足夠了。

未結婚時，沒有太大感覺要有自己的小孩，結婚後也不會太渴望要小孩，但有了bb豬後，（出世後）才明白他圓滿了我的人生。現在終於明白為何人生要有自己的小孩。

20161129 - <(￣︶￣)>可愛的小雞

11月29日星期二

我的可愛小豬變成小雞了。

看似很大件的衣服原來小豬已經合適了。越來越接近上班的日子，越來越不捨得。

每日在家沒有做些什麼，但跟小豬一起已經很滿足，放假多天除了外出健康院，去買餸及看醫生外，很少出門，但抱著小豬看他睡覺已經很開心。

看著小豬不知不覺的成長很滿足。

20161126 - ◐又返石籬◑

11月26日星期六

咳到飛起，去石籬攞藥，熊人陪我去，順便買平平用品，因為有十二蚊店，因為可以狂掃濕紙巾，買成六包咁多，又可以食平平炒粉下午茶餐，點知落好大雨，又忽然凍咗好多，真係睇完醫生都補唔返。仲去買餸，勁大雨行，要去舊屋樓下避雨，返家又好大雨，又凍。

今日發現一件事，係bb近來只肯跟我瞓覺，之前幾次熊人餵完奶都暗唔到佢瞓，仲搞到攰攰扭眼瞓狂喊，到我接手五分鐘內即瞓，我一直以為撞彩，點知今日回家時99話豬仔整個下午都唔瞓，但我返家一抱上手兩分鐘就睡了。估唔到咁快就認人瞓覺，佢終於明白媽咪先最親😁

20161125 - ☎☎睇醫生☎☎

11月25日星期五

自從上星期六剪脷筋之後要食抗生素。食三日，但食完之後豬仔好似好暴躁，再加上佢幾日屙好少，瞓得少，瞓覺好短時間就醒，由於睡不長，每四小時就要食，一天食足六餐、每餐接近六安。但偏偏屎屎好少，呢兩日越來越暴躁，唔肯瞓覺，瞓咗一小時內就喊醒，喊時仲有啲痛苦，個個都冇得瞓，應該是肚風作怪。我哋見豬仔都好辛苦，於是帶佢睇醫生，醫生見我帶口罩首先怕我感冒傳染給豬仔，不過後來問過唔少問題後排除了傷風感冒，估計係肚風作怪，開了肚風水，希望豬仔快啲冇事。

肚風成日肚痛，但佢一樣好好胃口，次次食哂啲奶。仲肚餓到紗巾都食。希望唔好食滯啦。