20160402 -•●✿木棉花@石崗軍營✿●•

4月2日星期六
放工在長沙灣食完嘢之後，買咗少少蛋撻之後就入馬鞍山車爸爸媽媽入去石崗軍營睇木棉花，上年去過睇木棉花覺得唔錯，地方大，而且真係好多木棉樹，想不到爸爸媽媽都有興趣去呢。
自從月底去完日本之後，覺得父母真的老了，所以有機會要好好孝敬佢哋，難得佢哋對戶外活動有興趣，可以一起出外走走，
今年可能遲了一點木棉花已落了不少，但對爸媽來說還是有趣的，佢哋用掉下的木棉花砌成一個心形，爸爸首先發起，想不到媽媽也一起砌，佢哋兩個好耐冇咁齊心合作了，估唔到呢個年紀都仲有少少恩愛。

我哋開咗張Picnic mat，一起坐低飲吓茶，食蛋撻，影吓相。

呢個大規模的心心，有個環在外圍，係其他遊人砌的。

爸爸嗰個細好多，不過都有人欣賞，佢好滿足。

由於石崗軍營會經過嘉道理農場，林村一帶，所以回程時順便停一停林村許願樹俾媽媽參觀吓，我都成十年冇來，靚咗好多。媽媽仲有拋橙許願呢。

六時多就食晚飯，爸爸介紹土瓜灣一間小店的炸豬扒。

呢間叫星洲名廚，在土瓜灣北帝街35號

 

我哋點了海南雞飯，雞就冇泰潮咁滑，都可以。

咖哩厚切豬扒，即炸好香口又腍，咖哩香辣帶椰香，好送飯。

肉骨茶套餐，有肉骨茶、油條、白飯、白灼時菜，係馬拉的肉骨茶，藥材比較濃，冇咁重胡椒。不過舊骨就麻麻地，唔係太腍。

同埋有印度拉茶幾好飲，拉茶要加＄12，有點貴，但奶和茶都很香，而且很滑，我哋食四個餐再加拉茶，好飽呢。