•●❤風月堂 (updated with earrings)❤●•

 

 

 今日都幾忙，一早十一點鐘去尖沙咀補照超聲波，之後就趕去葵芳，因為今日去婆婆度做節，我婆婆住葵涌，所以行一陣先上去，由於前一輪返工經過新都會廣場知道果度開咗風月堂，而且vyvy又去過話有餐，好抵食，所以就諗住請阿媽去食吓，


真係好懷念沙田間風月堂，食過幾次就執咗好可惜，雖然唔算平，不過好好食，尤其是甜品，今日我哋叫做午餐，有麵包同埋湯，有主菜，阿媽嗰個係石鍋牛肉雞肉飯，而我個係海鮮雜菌墨汁麵，點菜時根本唔知有甜品架，直至點餐飲時佢問我哋要咩雪糕先知有甜品，係雪糕窩夫，我要豆腐味雪糕，成個餐都係$63咋，好抵，以前喺沙田食開好似冇咁抵，唔知係咪因為食晚餐貴啲，定係地區性問題呢？

 

之後行吓新都會廣場，因為上次去影尖東夜景時，跌咗一隻耳環，所以想買返隻，無錯係一隻，因為我係去MaBelle度買耳環，可以一隻一隻買，我隻耳好麻煩，成日唔舒服發炎，戴普通耳環只要由早戴到晚都會痛，只可以戴半日，不過呢間啲耳環就唔同，一啲敏感都冇，我好喜歡啲長耳環，因為夠顯眼，今次一買買三隻咁多，當係慶祝定遲啲加人工囉～

 

之後行到四點就去婆婆度做節，見佢好精神，都唔錯，冇咁擔心，見到兩個舅父同阿姨，仲有表弟表妹，好多人好熱鬧呢！