20180818 - ╮(╯▽╰)╭轉工人姐姐

8月15日至8月17日
我放三日假，因為工人姐姐LAST DAY 係8月15日，我自己SET 8月15日下午舊姐姐走，8月15日晚上新姐姐到。
BB唔識新姐姐，好彩冇射喱眼望佢，不過都係唔肯俾佢抱/餵食/瞓。
我請假陪以朗，其實只會令佢更加唔跟新姐姐。平時我放假佢都唔跟舊姐姐啦，更何況係新姐姐。同佢只相處幾日就跟佢反而唔對路，俾你都唔願意俾一個只相處幾日的人換片/餵食/瞓覺。結果以朗當然係勁黐我，但我又唔可以當冇事發生咁今日新工人到，聽日我照返工諗住BB跟佢。

最慘新姐姐又唔肯過媽咪度瞓，佢係要同BB瞓，結果就我陪BB瞓，佢瞓醒咗見係新姐姐當然唔妥，結果瞓好少，八點半就起了。玩又唔玩得咁多，想同佢買包包食，不過又唔想佢成是3丹麥條，而且兩個麵包都要廿幾蚊，咁不如兩母子去食個早餐算啦。以朗食嘢都幾乖，起碼肯食嘢，唔會成日扭同埋喊。

8月17日星期五。
早餐廿幾三十蚊，有人SERVE，有蒜蓉多士，火腿通同嘢飲，以朗好喜歡食蒜蓉多士，食咗唔少。



之後見到火腿通就要食通粉，點知見到對面個阿叔個早餐有一小碟粟米就吼住哂，人哋怕咗佢俾佢食，佢一食粟米就唔要通粉了。再飲檸水，兩母子順利食完個早餐，之後仲同以朗行一陣惠康，今日新開張，同BB行吓教吓佢啲水果，食物。
原本想回家但見到媽媽又坐又陣先返家，結果十一點幾先返屋企，消磨兩粒鐘。

呢幾日剛好表哥來玩，以朗冇乜瞓晏覺，唔知佢幾時先適應。
星期六舊工人嚟探BB，BB即時好跟佢，俾佢餵食，換片，佢仲送咗幅畫俾BB，當時諗如果佢繼續喺度做就好啦，尤其以朗唔肯瞓覺時，一諗起返工仲要日日陪瞓，又冇得做運動就好慘。

星期六瞓咗一陣咋，所以夜晚陪瞓可秒殺佢。哈哈，宜家同佢陪瞓每日都唔知佢幾時先瞓架，好有挑戰性。

20180817 - (◕ܫ◕) 梳乎蛋美食遊@朗豪坊

8月17日星期五
放假幾天都沒有外出，好悶，就快出菇菇了。
今日就坐車出朗豪坊睇疏乎蛋美食遊。
以朗坐車時豬了，一直豬到落車都未起，點知一去到朗豪坊就起身，去到Line Friends Store見到啲bear又醒哂。無時出街少破財，line friends store部分貨品清貨半價，買了套熊大恐龍睡衣俾以朗，原本300半價減到150。3歲衫，今年秋冬都應該可以著了。

由即日起至9月2日，全港首個梳乎蛋精選美食節登陸朗豪坊！7大人氣美食品牌將推出獨家首創梳乎蛋Comfort Food，從味覺及視覺著手，治癒您的心靈。美食以外更有5大夏日戶外野餐風的打卡位，當中新角色「雞動哥」及「蛋黃兒」更會驚喜亮相！大會又準備兩款限量版「Gudetama梳乎夏日禮」予粉絲換領，並設「梳乎限定店」獨家優先首賣官方精品，讓各位生活修行者以這個集食、買、玩的《朗豪坊Gudetama梳乎美食遊》為【朗豪坊Gudetama梳乎遊記】的終站，功德圓滿！

其中一個影相位，飛天蛋黃哥。

新嘢蛋黃兒。

















今日weekday 好少人，可以影吓相，但因為係賣食物，所以唔敢放以朗地地，怕佢整爛啲嘢。本來想食少少嘢，呢個tart好似幾正，而且仲有啲蛋糕，乳酪都好吸引，不過價錢偏貴，熊人唔想試，連自己太太都唔支持，執笠冇生意時熊人就會後悔莫及了。


原來七樓有疏乎限定店，冇去睇到，嗚嗚。好彩當場只要上載相片上IG/ FB就可以免費換領疏乎蛋紙扇一把，我都唔執輸換咗一把。

我哋最後在FOOD COURT吃了雞飯同叻沙，都OK好食，不過冇影相呀，近日以朗喜歡吃麵呀/米線之類，我哋專登點飯俾佢佢食好少咋，反而叻沙啲米線怕佢辣浸浸水先俾佢食佢又食，食完就返家了，今日回程都喺巴士睡了一會，姐姐走了之後佢瞓得好少，尤其晏覺，唯有喺車少少少少咁瞓啦。

20180815 - ☆★放假湊B★☆

8月15 日星期三

因為轉工人，所以放三天假湊以朗，即是連續放5天假期，由於放幾日假，心情輕鬆，所以星期二放工買定蛋糕食吓，俾自己休息吓同嘆吓，上個月開始好多事，心神不定，冇心情食蛋糕，又冇做運動更加怕肥肥而唔敢買蛋糕食。

不過呢件蛋糕真係好想試，見到兩個月都試唔到，因為我只見過金鐘東海堂有呢件綠茶千層蛋糕賣，馬鞍山的東海堂（有飲品賣的）永遠冇得賣。而金鐘東海堂只有lunch hour有得賣，放工又冇得賣。

所以更加想試。只好食晏時買定放公司雪櫃。綠茶賣32蚊，雲呢拿賣30元。買了兩件，一件俾媽咪食一件自己食。

星期三早上先食，結果以朗一人已吃了差不多半件，我同熊人再share吃得少少，

但勁好食呢，綠茶味好濃，蛋糕有好多層，大約15層左右，每層都好軟滑，每層用綠茶cream連起來，好融合，而不會油，成件都是千層可麗餅，沒有蛋糕，唔似A1 有1/3件朱古力蛋糕裝假狗都仲要賣38蚊件。呢件好味道，係想再食的，以朗都識食，食咗好多。媽咪都話好食，不過如果要再食就要食晏由金鐘買返嚟囉。

今日以朗見到佢最愛的媽咪好開心，唔知道姐姐今日中午走。 佢對我哋結婚公仔好有興趣，想我拎俾佢睇，又對睡衣熊大有興趣，我俾哂佢睇，仲教佢結婚熊大係daddy,結婚兔兔係媽咪，睡衣熊大係bb，佢好開心呢，佢都認為佢哋三個係我哋一家人。佢細細個已見慣屋企的熊大兔兔，可能由細見到大，佢都好喜歡，迫到佢中哂毒呢。

其實球證兔兔，踢波熊大，蜜蜂熊大都係一家人嚟架。哈哈，佢都知邊個係媽咪爹爹同BB。

星期三中午舊工人走，星期三晚同日新人嚟，所以要湊吓以朗，因為佢點會跟個唔識的姐姐。

好彩佢都肯同佢玩吓，但餵飯，瞓覺就當然唔會跟佢，尤其是我喺度。要俾啲時間大家，但究竟要幾耐呢？就唔知道了。

其實放幾日假同BB一齊都幾好，見到佢就心都甜哂。

20180812 - ♡❤落大雨冇地方去❤♡

8月12日星期日

今日落好大雨，都唔知可以去邊。最後我哋都係落新港城，去759買吓嘢就算。

今日去德興食吓嘢。佢都幾開心，點了個飯俾以朗，點知佢近來喜歡啲濕濕地啲嘢，又勁食河粉，當然仲有喜歡的檸水。成日古靈精怪，又似哨牙。多多表情。

同以朗行阿信屋，佢本身同其他小朋友跑跑，點知見到我又唔同人跑，只係拖住我入到去凍櫃附近跑跑。原本想同佢去playroom ，點知人多得滯又滿籌冇得玩，

最後我就趁兩父子去街市買餸時去買咗條裙。同買杯咖啡。以朗上扶手電梯喺好多個面孔中見到媽咪好開心，想即刻離開孭帶要我抱。大個咗好多，以前唔識望人，宜家可以一眼望到媽咪了。

本來今日熊都放假以為開心，點知最後嘈大交，愛情婚姻都崩潰了，借啲意發脾氣，我唔明佢幾時開始俾我仔用手食飯。差不多兩歲了，點解要用手拎飯粒，佢認為係俾佢探索，但我唔認同，剛剛食固體可用手，歲幾時都仲好地地用匙，但差不多兩歲了先用手？佢唔覺有問題咩？俾佢探索唔係咁，歲半時去台灣都唔係用手，點可以咁？話佢就發脾氣，原來大家開始相處唔到了。見少啲可能比較好。我唔再相信愛情同婚姻了。亦唔知再點樣行落去先好。

20180811 - ✧*｡٩(ˊᗜˋ*)و✧*｡車車車@屯門市廣場

8月11日星期六

今日約好去元朗食海鮮，而且整個水池俾以朗游水，點知好大雨，所以游水不成，

好彩本身收到風知道屯門市廣場有Tomica 車展，趁去開元朗，叫做順路入埋屯門陪以朗睇車車。本來去到屯市叫佢自己落地行唔肯，要抱，一去到奇妙夢車場個位有好多嘢睇就即刻肯行，周圍行睇車車。

有好多車車係自動行，以朗同好多其他小朋友一樣，睇到唔捨得走。咁多車仔轉嚟轉去，好多款又靚，大人都慢慢欣賞呢。

佢睇咗好耐好入神，唔捉走佢可以企喺度半日都得。



場內設多個主題區，首次齊集迪士尼五大人氣系列，包括迪士尼角色、反斗奇兵、Disney TsumTsum、Marvel 及星球大戰，呈現接近 30 個立體裝置，同場共展出過百部珍藏車仔及有獨家首賣貨品出售。有唔少影相位，以朗好開心。



我自己就比較喜歡toy story，因為夠Colourful，好似好熱鬧咁。

熊人當然比較喜歡Marvel。



每架車都爬入去坐，以為係啲入錢車車，可以坐車車，其實唔得。Winnie the Pooh 主題比較女仔，但影相幾靚。





tsum tsum 又係比較女仔，而啲車車就好cute 似bb玩開啲車。

又想爬入去坐啦。

點解好似識擺pose?



入咗呢度當跳舞機，成班小朋友一齊跳。

呢架三眼仔長車都好正。

場內更特設期間限定店，將售賣多款 Disney Motors 產品，包括全球獨家首賣的小熊維尼復刻版車仔及跳跳虎復刻版車仔。場內更有全新「Mickey and the Roadster Racers」系列車仔及玩具套裝，店內還有其他迪士尼精品等，不過因為我哋都趕時間要入元朗，而且以朗暫時未識買嘢，所以乜都冇買俾佢。

原本想去隔離睇duck duck，但熊人話趕時間，所以冇睇。入了元朗，今日有小乳豬吃，好味。

好多人陪佢玩，可惜又唔肯瞓覺，要我陪瞓，但又搞搞震唔肯瞓，結果又俾我鬧一大餐。

20180810 - (⊙＿⊙)紫薯撻@Starbucks

8月10日星期五

又是開心星期五的時間，同好朋友食LUNCH，好喜歡歷山大廈的星巴克，雖然長時間都排長龍，不過因為新裝修係幾舒服，呢間有滴漏咖啡，有酒飲(好似話12點後有售)，有好味沙律食，自從重開之後，我們多數會吃沙律再配搭包包，由於再加上咖啡，星期五已經再不是之前的輕食日了。
沙律多數會選凱撒沙律+青蘋果雞肉沙律，近日有南瓜紅菜頭，最多選三款。
今日再選蛋批，本身喜歡吃蛋，所以覺得好好食，不過有啲油。

Starbucks 最近推出一系列紫色輕食，包括藍莓牛角包，以及紫薯味迷你布甸等，並且同時公佈11款新杯及星冰樂新口味，即看有咩啱心水！
上星期本想買伯爵茶雪芳蛋糕$34，但原來伯爵茶雪芳蛋糕已完結了，反而見到新的薰衣草雪芳蛋糕$34，但我好怕薰衣草的食品，好像食香精，所以不買，

原來還有其他紫色甜點。紫薯撻$24，今日就試試，紫薯撻除了有紫薯吉士餡，更包含紫薯蓉及紫薯粒，好香好滑，似香竽味，不過好甜好甜。實在不是我杯茶。


星期五晚，本想跑步，但星期二跑完之後腳一直痛，再加上腰好酸，結果星期五晚都冇乜做運動，只跳舞，冇乜做HIIT，又想作水腫。身體差哂了。唉。