20170108 - ｡◕‿◕｡去公園玩

1月8日星期日

今日著Gmarket新衫，啲衫好似唔夠長，唔知係唔足碼定係點，不過係幾醒目仔。

今日星期日冇姐姐，見天氣唔錯就同bb豬去樓下公園玩玩，當然BB未識玩，都係抱住佢行吓公園，HEA 吓，見到有個5個月大BB同BB豬差不多大件，個五個月大BB係細碼，而BB豬宜家應該係中碼至大碼了，所以BB豬同人地差不多大。

BB其實有啲眼瞓，於是我湊上媽咪度之後去買嘢，BB豬竟然又唔瞓覺，激死。

近來BB豬成日講嘢，成日依依哦哦，唔知佢講乜，知佢好多嘢講都好開心，BB豬成長每一個動作都令人驚喜同期待。

20170105 -✿ Annual dinner✿

1月5日星期四

今日係一年一度的公司annual dinner，五點就放工，即刻坐的士過去會場，行行企企都好，總好過坐公司。

早啲去到會場可以影吓相。

年年都係千三蚊禮劵，最想係百佳，我抽到百佳，唔洗同人交換，

自從上年之後啲菜色好咗好多，起碼頭盤是乳豬。而唔係以前的難食拼盤。

呢個就好漏，寧願炸蟹拑好過，

鮑魚大隻好食。翅都好多料。整體食物幾好。

抽獎中獎機會低，有金幣，當然最後都冇中到。九點多就完，可以早啲返家看豬。

20170104 - ~(￣▽￣)~*學趴趴

 1月4日星期三

BB三個月啦，但媽咪好忙冇買蛋糕，留番一百日先買，BB豬宜家日日都唔同，日日都好鍾意玩。

見佢三個月，佢可能一個月後會轉身，所以開始要佢練頸力，尤其怕佢轉身之後趴喺度唔識昂頭會危險，所以開始幫BB反身等佢練趴趴，練頸力。

BB好似都鍾意玩，不過會攰攰，玩一陣就冇耐性了。但當係同佢放吓電，多啲活力，夜晚好瞓啲，早啲瞓，唔好唔瞓。

20170103 - ~(￣▽￣)~*Lady M

1月3日星期二。

 

今日有Lady M蛋糕食。初初開時排哂長龍架，因為千層啲CREAM會溶，所以會有舊乾冰俾你，呢啲其實計咗落蛋糕錢吧。

上次食過原味千層蛋糕係好好味，不過好似甜咗少少。而今次有幸食到伯爵千層蛋糕。我一向都喜歡伯爵茶，不過我寧願拿回家大家一起吃，由於只有一件，所以同熊人媽媽三份食。

伯爵茶味十分突出又香，濃濃既茶香，食落一點都唔甜，而千層蛋糕層層分明，側面看每層班戟薄到好似a4紙咁，食落每層同中間earl grey味既cream混合一起，好香好滑，果然名不虛傳，好想食多件，不過唔會買嚟食，因為要75蚊一件實在太貴啦。

希望有機會試吓綠茶味啦。

20170102 - ☆★有新鞋著★☆

1月2日星期二

 

今日有朋友來探BB豬，係伴娘小姐同佢的未婚夫來探望，99又話嚟，因為同埋62嚟探BB豬，其實BB豬晏晝食完奶好想瞓，不過62難得放假嚟，BB豬就冇得瞓，其實佢只係個BB仔，無責任去逗你哋開心架，可唔可以唔好將自己快樂建築在別人痛苦之上呢？

可唔可以尊重一下人哋作息時間呢？

 

呢個BLOG熊人唔知會唔再睇，熊人唔鍾意我亦都唔理得太多，個BLOG係自己的，唔想連少少發洩的地方都冇埋，我原本都好希望熊人會睇吓我個BLOG，不過我近來寫得太多對6299不滿會令佢唔開心，其實我自己對佢哋幾不滿都好難出聲，只可以在BLOG呢個自己的小天地講，就算得罪熊人都要將自己的感覺講出來。

 

我個仔唔係你嘅玩具，請尊重BB作息時間，

 

伴娘佢哋送咗特別版鞋俾BB豬，BB豬第一對鞋仔，不過未啱著，HEHE。

夜晚姐姐回來，同佢傾咗一陣，佢真係幾慘嘅，希望佢冇咩問題，又唔好影響BB豬。

20170101 - ╭❤╯新年跑╰❤╮

1月1日星期日，
假期姐姐放假，我哋就冇假放，今日熊人都係整吓嘢食，整咖啡CREAM蛋糕，yummy，加咗合桃就好好味不過蛋糕個cream太heavy，有啲酥味，仲有食吓意粉，

 

 

當然有預媽咪一份，食完之後媽咪幫我哋湊bb一陣，我哋落街跑步，今次都是跑球場，宜家都係頭幾次跑，時間又唔多，所以只跑十二三個圈就算，即是5k左右，因為始終俾bb媽咪湊，唔敢行開太耐，跑5k冇咩問題，但冬天嚟講算係好差，想提升自己，要有時間先得架。因為咁樣落街跑跑都成個幾鐘架啦。

 

當晚姐姐十一點都未回家，好勞氣，想搏炒？後來知道佢同佢老公有啲問題，就只希望佢唔好影響到湊bb。

20161231 - ✿｡◕‿◕｡✿ 除夕

12月31日星期六

星期六要返工好慘，放工留低BB豬同工人姐姐在家，我就同熊人去新港城Italian Tomato食晏，忽然好想食檸檬芝士撻，所以點了一個pizza加蛋糕set

吞拿魚pizza,不過唔明點解落青豆，唔夾，唔係太好味。有杯咖啡飲都幾好。

買咗件衫係長冷衫，百幾蚊咋，自己買布都唔得啦，夜晚去31/F吃飯，之後返家看電視，
以往除夕夜都間中會出去慶祝，但今年湊住BB豬都冇得慶祝啦。三口子坐屋企休息吓就咁就過咗啦。要出去倒數或慶祝，要過多兩年啦。當然有BB豬一起過新年雖然平淡但都好開心呀。

20161230 - o(≧ω≦)o細蓉記+沙田燈飾+少爺18 Hawker

12月30日星期五

老闆唔喺公司可以去上環找熊人LUNCH，坐叮叮過去都快，可惜熊人俾老闆捉住遲走，

熊人帶我去細蓉記食。

細蓉ｰ即係雲吞面相傳做法：匙羹攞底，再放上雲吞，再放上麵，咁麵就會無咁易淋哂。雲吞麵嘅靈魂當然係雲吞同麵。呢間個雲吞係唔錯，好爽口，而麵質都好彈牙，而且冇梘水味，不過個湯底就差啲，冇大地魚味。而因為點咗餐所以有奶茶，奶茶都可以。

見到人哋有點心，例如腸粉，好似好好食啊，有機會會試吓。

雖然同熊人食一餐晏只係好短時間，但都好開心。

地址:上環文咸東街129號地下

晚上就叫姐姐帶BB出來沙田火車站等我哋，去七樓個平台影燈飾，都幾靚，今年冇去其他地方影聖誕裝飾，呢個係第一個，我覺得呢個位最靚，尤其是轉緊色時，

不過其他地方就麻麻地啦，上年玻璃花靚好多。

有個同事專登過嚟撞吓BB呢，由於帶住BB影相冇咁方便，所以影一陣就走，

之後本來想食pizza,但太多人等，最後去咗少爺18Hawker食，以前呢間係叫海南少爺，食東南亞嘢，宜家呢個係食新加坡嘢。之前葵芳食過。

點了炒河粉，幾好食，尤其係個特製醬汁。

炒蘿蔔糕有蛋嘅？

咖哩雞個咖哩好食。

炸油條，裡面有魚肉，但油條不夠脆

白飯魚沙拉，白飯魚比較un配芒果頗惹味。

今日帶帽遮住阿叔髮型就靚哂。

20161229 - ❀Christmas Ribbon Matcha Latte❀

Starbucks^® Teavana™ Christmas Ribbon Matcha Latte
Velvety green tea is combined with a splash of sweet, tangy pomegranate juice. The beverage is then topped with milk foam and ruby red pomegranate drizzle for a refreshing and cheerful experience.

 Teavana 石榴抹茶牛奶
充滿節日氣氛的紅色紙杯盛載！青色的抹茶牛奶 ，整體賣相紅中帶綠！表面唧上忌廉，突出立體感！混合忌廉，質感更香滑起來！不過抹茶本身苦苦地，同石榴的酸酸甜甜其實唔太襯。
而且價錢勁貴，SHORT $38, GRANDE $46，我自己個人覺得飲番普通的鮮奶綠茶好過。

20161228 -☾Hatsu Japanese Restaurant☽

12月28日星期三

今日幾了同事吃午餐，
唔知食乜，又唔想等位，於是去咗金鐘Hatsu Japanese Restaurant，

這間餐廳有lunch set，每個set跟蒸蛋、meso soup、茶啡、甜品同自助沙律吧。價錢比餐牌正價平$30左右。其實也不便宜大約148元一個，但好多SET都有牛肉，其他SET 都過160元，連加一接近200元一個人。如果食壽司SET更要過200元。 不過喺呢個區搵食就係咁，唔會有咩平嘢食。
個沙律吧啲菜姆新鮮幾令，而且啲醬汁有好多款俾你揀，例如日式芝麻醬，千島醬，仲有特製醬都好好食。青瓜新鮮。

而個SET係蒸蛋，飯，湯，我呢個係滑蛋天婦羅定食，天婦羅上面有層滑蛋，都OK好食，但又值咁貴，最後可選餐飲或糯米糍。

晚上熊人出差不返家，BB原本應該九點食奶，但貪睡瞓到十點半先食，食完又瞓，點知十一點起身，之後仲屙屎，同佢換完片就醒哂，唔肯瞓覺，同佢唱歌仔暗佢瞓，佢仲對住我笑，一見佢笑就嬲唔落，同佢玩到差不多兩點都唔瞓，只好交俾姐姐。