20130123 - ◎◎小金井◎◎

1月23日星期三

同熊又食小金井。
今次食了加州卷，加州卷的材料，冇咩難度。

 貴貴的鰻魚壽司同埋土灸三文魚壽司

鰻魚宜家越來越貴了。
件三文魚好肥好肥。

 仲有拉麵，呢間拉都好平，50蚊一個。
今次試新嘢，試了一個北海道PIZZA，點知原來係米PIZZA，上面好似有墨魚，啲料唔夠熱，唔難食，但我哋不太喜歡米PIZZA，食一次就夠了。

熊病了氣管炎，星期一睇咗醫生，但食了兩次藥就唔食。激死人啦，好返就話啫，最慘又未好返，仲係度咳咳咳。

20130121 - ヾ(◍'౪`◍)ﾉﾞ吉壽LUNCH

1月21日星期一。

由上年開始，升職同事要請自己TEAM LUNCH，同事升職唔係加好多咋。
無謂食咗人隻車啦。
所以揀咗間日本嘢吉壽，因為有SMS優惠，第二客$28。
一個SET 普遍是$138/$148，
第二格$28，但加一是用未減價前的正價做加一。
所以加加埋埋都唔會太平。
同事點的SET，火灸XX。有三件壽司，

 加個牛肉窩。牛肉唔關我事。

 我的SET也是大部分同事都食的SET。
魚生+小碗鳥冬，烏冬好細碗。

 不過大碗都食唔落啦，因為碟魚生好大碟。
三文魚好肥，我唔喜歡食甜蝦，所以俾咗兩隻甜蝦俾同事。
其他魚生都OK。
不過唔及千兩咁正。

 另一位同事的壽司SET。

最後埋單10個人都要$1010。絕對唔平架。

20130120 - ◐緣來素食◑

1月20日星期日。

昨而食海鮮食剩好多，於是爸媽就用剩了的來放麵吃。制成一個好味好多料的海鮮麵...~嘩

 同熊去探熊媽媽。
熊媽媽住元朗，上次去大棠之後同熊媽媽試了一間好味有heart的素食店。
打算今次再試其他菜式，上次的蒸雞用了鮮猴頭菇作為雞，好好味，令人回味無窮呢。
今之飲了當天的湯，椰皇燉湯，好甜，但唔夠味。有菇，但個味比較簡單，可能因為冇肉。

 粉絲煲，幾惹味，完全唔似食緊素，材料都是以素菜為主，好少假肉。

 松子粟米炒飯，普通的炒飯，松子幾好食，冇咩特別，但以素菜來說，味道不錯，唔會好淡味。

 仲有炒雜菌，中式的雜菌好味過西式用牛油整好多呢。

食吓傾吓，好悠閒的一個下午。

由於好晏先食LUNCH，因為熊好晏先起身，三四點至食完LUNCH，飽飽，於是晚餐只是簡單食了熊媽媽整的齋春卷。



20130119 - o(≧ω≦)o暴飲暴食甜品夜

1月19日星期六

之前講到食咗個貴貴但好食的海鮮餐，勁飽，
不過可能太多鹹點，想食吓甜點。
熊提議去深井發記食甜品。

有人話飽飽，但姪仔一聽到甜品就好開心。

唔理咁多，食咗先講。

姪仔吃士多啤梨布甸。

 我同熊share 了一個心太軟，但麻麻地，個底燶了。 -__-，而且也不太流心。

 芒果綿花冰，媽媽同哥哥比較少食綿花冰，所以佢哋一人一個。

 媽媽的是益力多芒果綿花冰，我試了幾啖，其實我好喜歡食綿花冰，不過熊唔會俾我食太凍的嘢。

 酥皮芒果，熱的甜品比較少有，因為要照顧咳的熊同埋唔想食咁凍嘢的家人，(包括我) 芒果捲住熱辣辣又鬆脆既酥皮，因為要脆口，所以是即制的。

 另外仲叩了一個酥皮香蕉，同酥皮芒果一樣，不個餡料是香蕉而已。食完呢個真係堅飽，熊就車我回家了。

 第一次同熊約會係去CWB的Apple Green食dinner，之後大家都好飽，當時熊想同我去食木糠布甸蛋糕。
但喺cwb搵咗好耐都唔見，　最後去了cwb的發記食甜品。當時就係食了酥皮香蕉，所以一提起發記都有啲回憶架。

20130119 - ✿｡◕‿◕｡✿暴飲暴食海鮮餐

1月19 日星期六。

要返工的星期六，約好同屋企人去三聖食海鮮餐以慶祝爸爸生日。
熊要做司機了。
LUNCH 過去熊公司附近hea hea。 費事走來走去了。
同熊食餃子，都是熊公司附近，好多是呢啲嘢食。正呀。

 

仲有生煎包同埋擔擔麵。食到咁上下，家中的女皇大人話想去屯門行一陣先食海鮮，於是三四點就擧家入屯門行。

 

 其實屯市都只是連鎖店，冇咩好行。但都買了件薄羽絨，因為減了一百蚊。

六點左右就入去揀海鮮。

 今次揀咗好多海鮮，見人多咩都係幾斤。
去到海天俾佢煮就係每兩計。

 我哋真係勁食架。
蝦好好食，好有蝦味。

 點了雞油炒豆苗，唔油喎，幾好食。

 炒蜆是海鮮檔送的，不過都要4蚊兩加工費，如果兩斤蜆，只是加工費都百幾元，出面叫碟炒蜆平好多啊。
但呢碟係第一輪上，又整得幾好食，個個都食到津津有味。

椒鹽瀨尿蝦，7個人4隻，但超級大隻，一隻可以開到二至三個人食。

 龍躉，用西蘭花炒球，買了兩斤，由於全部都係肉，所以好多好多，好飽肚。

 蟹，又係好大隻，而且好多膏，啲膏似蛋黃，照食，但食剩部分膏，如果食哂會好漏。

 蒜蓉粉絲蒸大元貝，超大隻，比平日的大一倍，好好味，但再大啲就好易靭。

 最後才上聖子，但人人都飽了，買多了一扎，因為姪仔話要食好多，所以買兩扎，連侍應都覺多買了。
再加上有點過火，有少少靭，結果食剩好多。

海天的加工只係呢碟唔得，其他都好好食，夠味但唔會過鹹，最重要是冇咩味精，唔會好口渴。

 

大家食到捧住個肚。不過呢......仲有下一場。

20130118 - ♪♬♩♫ 18 Grams♪♬♩♫



1月18日星期五。

同熊去旺角睇波鞋。
熊買波鞋好似買極都唔夠。
佢鍾意個款開始減價了。行咗幾間，有啲冇藍色，有啲減少少。後來找到間最平的。即買。

之後就打算食晚飯，想去富記。
去到樓下先知已關門大吉。
宜家租貴，咩都執笠。

 想去cfk，食pizza，但得幾十張枱，點等。
去18 grams。
竟然冇咩人。唔駛等。
可能因為主要係飲咖啡，晚上少人啲吧。
點了flat white~，唔夠Holly Brown咁濃，但奶泡方面比Holly Brown 做得好。

 18 grams 都可以食嘢的，食all day breakfast。
表現ok。啲磨菇好正。

 最好食是三文魚egg benedict，蛋下疊了菠菜。加兩片三文魚。好好食。個汁都好味。
不過好貴要88蚊。

20130116 - •●✿美心彩虹蛋糕✿●•

1月16日星期二。

阿嫂生日呀。

哥哥為佢準備了一個近來大熱的美心彩虹蛋糕。

呢個蛋糕因為美心邁向45週年，所以有8折，

 

近來電視廣告，地鐵都見到佢。

個蛋糕本身是白色的。
有些類似綿花糖的是分開，有好多顏色，包裝食的時候自己放在蛋糕面上。
個盒都靚過人。彩色的。

 點蠟燭。唱歌。

 切蛋糕啦，大家都勁影相，影到唔停。個蛋糕冇可能切到好似廣告咁平滑啦。

 至於味道就普通，好甜。面的白色CREAM似天使蛋糕的cream，滑滑。
唔同顏色夾住唔同水果，例如士多啤梨，奇異果，芒果等。
味道真係麻麻，以原價198仲要好細個，就真係唔太抵，如果有小朋友就好。因為好靚。

20130114 -♣♧ Royce 朱古力♧♣

1月14日星期一

上星期有個long weekend。
因為病了sick leave。
原本以為公司派信出bonus，點知冇。原來delay 到今日至派信。
都係15/1 出bonus。只是遲了收信而已。
bonus有驚喜，完全出乎意料之外，而我的人工都加得幾好。真係非常之開心。
由於只是表面病完，但其實未病好哂。所以媽媽要我回家吃飯，唔想我再亂食嘢再引起敏感。
我就捉埋熊一起回家吃吃。
想去沙田買件薄羽絨，點知冇特價喎。唔買，反而同熊買了條褲。
由於出咗bonus，夠哂交稅有突。
心情非常之好。
買朱古力請家人同熊吃。
我近來都唔多喜歡食朱古力，但唯獨是royce的是例外。
雖然115一盒不太平，但比較ab其實已經是好平了。
我買了一盒咖啡味俾自己。
香檳味就是熊的。

 

 

 好喜歡軟軟滑滑的朱古力。上面有啲粉好正。

20130113 - ☹☹病倒了☹☹

 

 

1月10日至1月13日
星期四至星期日。

1月9日星期三晚跑完步之後。
同熊在家食飯，媽媽煮了黃立倉同啲沙葛，西蘭花等。
食完半小時左右，熊走的時候，我就開始出風癩了。
由於我正打算沖涼，所以冇理佢，沖涼之後又無事了，於是睡覺。

1月10日星期四
一覺醒來，全身風癩，比平日發得厲害，知道唔惹少。
以我一個經常出風癩的人，絕對分得清楚有幾嚴重。
因為出到上頸，而且好紅，我都不敢怠慢，一起身食了抗敏藥之後才食早餐。
結果暫時抑制了。LUNCH 之後慢慢又痕。知道禁不住了。
傍晚越來越痕，放工立即去睇醫生。
睇中醫後回家，有想過睇埋西醫，不過好似一日之內睇兩次普通科就只能CLAIM 一次的。
於是冇睇，食完飯就開始睡，已出到全身都係，好紅好痕，只飲中藥，冇食任何西藥去抑制佢，。
睡了過多小時之後就沖涼洗頭，當時知道好惡劣了，覺得聽朝應該返唔到工。同熊WHATS APP 一陣就睡了。

1月11日星期五
夜晚睡得好差，臨睡前已經又紅又腫，心中還是抱著一絲希望可以一覺醒來已消腫了。 (開玩笑)
半夜因為紅腫的地方發熱，所以全身都是汗，熱醒時夾雜著痕癢無比，當時主要受影響的地方是身體，四肢未有太多
一覺醒來，媽媽告訴我眼已腫了，面又腫，返唔到工了。
忍到十時左右睇醫生，醫生話我好嚴重，要我休息兩日，邊度都唔好去。
幫我打支針，又開藥俾我食，話起碼五日至好，
要我有心理準備打針都只可以退6,7成。
藥力過後會再起。

由於體內又紅又腫在打架，一回家食藥之後就睡了(好攰不只是因為藥物影響，主要是因為過敏反應其實體內在不停打架所致)
一點多睡醒食完飯又再睡，再起來已經是四五點，退了不少，也痕少了。斷斷續續睡至晚飯。
熊在晚飯來陪我。
忍不住哭起來，因為好擔心會好唔番。
十年前的經驗是第一次看醫生食藥時，風癩全消了。只是不消幾個鐘就更加肆虐。今次情況不太好，打了針都沒有全部退下來。
萬一再起怎麼辦。

結果當晚真是再起了。臨睡前發不停。
再吃藥也沒有效用似的。另一個問題是呼吸困難，嚴重風癩是可以令人窒息的，不過我當時知道呼吸困難是因為胃部不適影響。
劇烈的痕癢根本睡不了。所以媽媽叫我食半顆安眠藥，我沒有告訴媽媽我呼吸不暢，怕要被送進醫院，
心想: 又痕又呼吸困難，再加安眠藥，可能會在睡夢中說再見了。當時太痕，心想，死去就算了。
後來跟媽媽及熊講起被罵了，我還要養媽媽，還有熊在等我呢，

1月12日星期六
安眠藥令我睡了六七個小時，好似消腫了不少，正在興奮之際，新的又不停起。好恐怖。
全身又再起一遍似的，主要起在手指，四肢，連掌心，腳板都不放過。
我又再想起02年的慘痛經歷，你以為好轉時，原來更凶猛的一波才來臨，而且一次比一次凶猛。
又食藥又睡，午睡了幾小時，醒來似是好了許多。

熊在七點九來到陪我，明顯有點好轉，原本一餅餅紅疹，逐漸變成了一點點，很多很浮的也變小了。
我不肯定是否一定好了，因為要不再有新起的才是康復。

熊十時多走了，明天他還要做兄弟，不能陪我了，好想哭呢，病的時候好想好想熊在我身邊。
熊走了沖涼，已經沒有用好熱的水，而且用醫生的沖涼液了，但沖涼之後差了好多。
再食藥的效果又不太理想有點擔心。

1月13日星期日

一時左右不用靠安眠藥入睡了。怎料半夜四時多熱醒了，全身都是汗，而且好痕好痕，一對手都起了，主要在四肢痕癢，好辛苦，對腳主要小腿至腳板，
可能因為張被太厚，好熱，起得更多。
完全睡不了。
到六七時左右想找安眠藥，找不到，最後吃了每隔四小時的藥就睡了。
一覺醒來同媽媽去附近走一會，因為屈了幾天在床上好辛苦，其實當時一雙手超級痕，抓到紅哂
起床吃過早餐及藥就外出了。
希望可以分散一下注意力。
看來策略失敗了，一雙腿痕得發慌，在商場也忍不住要抓呀抓。
差不多兩小時左右，藥力終於生效，再沒有痕癢了。
有點想再起的，但暫時起不了。
我想應該受到控制了。