20180907 - ✈上軌道+ the Cakery cupcakes ✈

9月7日星期五

宜家坐近秘書附近原來好有食神，老闆出差，有啲散水餅多咗，益咗我，I同R三個，一盒三個The Cakery  mini cupcakes，The Cakery專門主打健康無麩質／有機／無或低糖／低脂的健康 Cupcakes，同時保留蛋糕的美味，務求讓食客享受 Guilt Free 的甜點

低脂低糖的Strawberry Wild，士多啤梨cream +士多啤梨餡的cupcake，喜歡蛋糕都有士多啤梨醬，香甜，cupcake 上的cream整到玫瑰花樣好靚而且亦考手工。

德式巧克力杯子蛋糕，蛋糕雖無乳類、無蛋但吃下跟有的沒兩樣，口感仍夠濕潤而且朱古力又夠香濃好味道呢！

另外是Apple cumble cupake，Apple crumble cupcake filled with caramelized apple, topped with cinnamon dairy-free cream and crunchy oats.。

當cupcake 風傳到一個時間後，小變種便隨之出現。正常SIZE 40元一個，而呢隻叫BITE SIZE 就大約20元一個，外型都比之前的細了很多。始終甜品多吃都會增加罪咎感，小小的一個快吃完之餘也能嚐到美味。


宜家每晚都係姐姐餵食，過去婆婆度同姐姐玩，食飯跟姐姐洗手跟姐姐食，而且食好多，喺公公度就算我喺度都俾姐姐著鞋換衫，再加上星期二我去跑步，佢都冇乜嘢。呢個姐姐應該開始上軌道了，

可能因為呢個星期冇嫲嫲，熊人又早走了，BB一定要同姐姐兩個人對住，新姐姐又好肯同佢玩，所以佢哋都開始好FREIND啦。當然啦，距離唔駛我陪瞓可能仲有一大段路，而我宜家其實都唔想BB唔同我瞓呢，所以冇乜所謂了。捱咗三個星期好扭計的日子，宜家BB生活慢慢回復正常，食得瞓得，我已經好開心。

呢個星期交了學費尾數，收到十月的時間表，以朗距離開學的日子越來越近，好快以朗將會由一個無所事事的BB變成一個要返學的小朋友了。其實最緊張的人係我呢
。

20180906 - ╭∩╮_(︶︿︶)_╭∩╮失望!東海堂流心抹茶月餅

9月6日星期四

星期三去Toys Rs想買嘢俾以朗，但睇唔啱，於是行返公司時去鐵皮檔買吓零食，買了好味芝士餅，15元，不過格仔餅同朱古力蛋糕好似幾貴25元包，之前啲蛋糕仔都係22蚊包，加咗價。另外買了10元三罐的咖啡，抵!仲有買定啲條條俾bb食。不過好熱呀，由反斗城行去鐵皮檔再返公司熱到我死呀，熱到咁要過排先會再去買零食。

呢個星期喺cam見到以朗同姐姐一起吃午飯，各有各食，唔駛人餵，自己食，冇用手，之前唔知做乜成日用手食，激死我，上個星期嫲嫲嚟一星期通常都係餵，估唔到今個星期俾佢自己食返又幾好。我好安慰同感動呢，宜家bb早了起身，九點就起，所以午飯多早了一小時，姐姐明知有cam都照坐喺度一齊食，唔會成日匿入廚房唔見人，透明度高好多幾好。

宜家又係月餅季節，之前見東海堂有抹茶流心月餅，用hsbc卡折了160元六個，咁抵就買俾媽咪試。

真係好迷你。
東記web的官方寫到:

採用宇治抺茶粉，配合日本豆乳忌廉作外內餡，濃郁豆乳味，更能突出抹茶芳香。帶微甘的宇治抹茶和豆乳互相融合，增添大豆香醇的甜味和濃郁順滑的口感。

但我覺得完全冇綠茶味囉，又冇流心，冇咩興趣食多個。唔知係上年食中村藤吉太正定點，呢個真係唔似綠茶月餅，


上網睇連登上年的食許先知原來好伏。

今年東海堂出左抹茶流心月餅
話北海道3.6牛乳做餡 加埋小山園若竹個隻等級嘅抹茶流心
聽落好高級 好正
7月尾拿拿聲就訂左
終於到9月我就去左拎
哇 間鋪寫住賣哂喎
以為自己好醒一早訂左好野
返到屋屋企梗係拿拿聲開黎食啦
個盒好高級咁

一切開 哇 真係流架

咦
但食落無抹茶味嘅
再咬入d
哇屌你個餡係杏霜味
說好的3.6牛乳呢？
全家人都係咬左1或2啖就掉左
真係第一次食咁難食嘅月餅

建議大家未開就送禮
未拎卷就轉手
開左唔緊要 捐俾想食嘅人
唔係你會後悔



不過你唔好話，馮以朗食飽飯都有食呢個抹茶月餅，食完想再食，
返到屋企仲食埋朱古力蛋糕，之後再飲哂支奶。近來胃口好似好返好多啦。

20180904 - (≧▽≦)重新開始跑步

9月4日 星期二

今日公公去澳門出差，由於婆婆擔心我沖涼時搞佢唔掂，所以我決定試吓早啲返屋企跑步，因為我宜家個背脊超級痛，平日在家跳鄭多燕真係唔係好得，以前冇做開運動就得，宜家冇乜用，可能又因爲我沖完哂涼臨瞓先跳唔係咗賣力跳，更加冇用。我唔敢喺媽咪度沖涼，分分鐘涼都沖唔到，如果以朗見我唔到就可能唔扭，
 

今日早兩班車返家，即係坐1817開的車，7點三左右就返到。快。 即時試去換衫，落街跑幾個字再去攞中藥(之前改早了7:30)，雖然今日都好熱，有成29度，不過可能因為我哋屋企近山邊，宜家真係涼咗少少，有啲風，唔太熱(比起7/8月)，由於都好耐冇跑步，好似近一個月冇跑過，所以唔俾自己跑太多，只跑18分鐘，但速度幾快的，唔好心急跑太多。最緊要是開始返跑步。結果跑17:16就攰了，我趕住去攞中藥同返屋企洗頭沖涼，吹吹吓頭就返到了。

以朗同姐姐返屋企好似好開心，同姐姐有講有笑，之前打俾媽咪問以朗點，佢話以朗冇扭，冇公公的情況下好跟姐姐，姐姐餵飯食好多。HAHA，見我唔到其實冇嘢，咁即係我間中遲返一日都得啦。所以我決定每個星期都搵一日去跑步，再加埋星期五跑，希望可以跑兩日。

昨天本來都想跑，因為好清涼，專登唔除CON，諗住跑完最多沖多次涼。點知以朗又玩唔瞓，成十一點九先瞓，嬲死我，忍唔住鬧佢，不過之後又好後悔，因為諗吓佢仲會同我瞓多幾多年？其實冇同佢一齊瞓而俾姐姐同佢瞓已經錯過了許多，之前乜都交俾姐姐已經錯過了以朗成長好多事，難得以朗想我陪，以朗眼中只有媽咪的日子唔會好長，長大了唔會記得自己曾經只有媽咪的日子，想到呢度我次次都偷偷掉眼淚，打BLOG呢一刻都不例外，佢唔瞓咪唔瞓囉，唔應該勁鬧佢。如果唔係自己想跑步就唔會咁心急要佢瞓囉。

宜家希望轉成黃昏跑，重新執過啲時間令湊仔運動BALANCE就完美了。






我其實宜家更加珍惜同以朗一起的時間，好愛好愛以朗，以朗黏媽媽，其實媽媽也很黏以朗。

20180902 -╭❤╯留在家╰❤╮

9月2日星期日
成三四點先瞓到，瞓了無耐BB大喊，初初唔理佢，但佢喊了好耐都冇停，怕佢係食錯嘢扭肚痛，所以都入房睇吓咩事，佢合埋眼但係咁扭又冇眼淚，同佢講媽咪喺度又唔理我，不停喺度典嚟典去，嚇死人，直至熊人夾硬抱佢上嚟俾我攬住佢忽然醒哂，但冇喊，好平靜冇任何唔舒服，之後我陪返佢瞓，但要差不多小時先瞓返，已經五點了，之後朝早九點半又起了

今日冇出街，一早同BB食紅豆包菜肉包麵包，原來佢同我一樣喜歡紅豆包。
之後我去攞中藥，同熊人BB一起行惠康買麵粉整蘋果批，返到嚟熊人睡了，我都好攰，因為五點幾先再瞓，開電視俾佢睇，同熊人搞iPHONE，最好都搞唔到，熊人整蘋果批，整完三點以朗未食嘢架。

我哋本來想去大家樂，但冇乜嘢啱佢食，落到樓下竟然有免費車，順道去食米線，今日不太多人，可以坐得鬆動。點了平日的餐+一個麵，以朗忽然好喜歡食米線，食好多。又飲嘢。

宜家佢九點幾起身，四點左右就冇哂電，今日冇俾佢地地，食完都將近4點，趕時間買吓嘢就返屋企，回程途中佢瞓咗，4點半左右瞓，返到屋企諗住跳吓舞，5點四左右忽然醒醒地，見佢好似想喊，我入房抱住B一起豬，我都瞓咗幾個字。因為真係太攰啦。夜晚俾了七星茶佢飲，希望佢唔好再喊醒啦。










可能太晏先食米線，佢夜間晚又唔食了。食幾啖。再叻整古整怪食同埋要飲奶茶，因為為食，又識講奶茶兩個字。由於今日冇乜出街，成日喺屋企同佢玩，好似更加黐身了。每個星期日以朗好似知我要返工咁，成日眼碌碌唔肯瞓。

20180901 - ☂┋德福睇迪迪尼電影裝飾☂┋

9月1日星期六

又話星期五晚開始細雨，想跑步都不能，點知星期六都落大雨，一早同熊人兩口子去大家樂食早餐，食完之後我上媽咪返等攞中藥同睇中醫，熊回家同以朗玩。我十一點幾搞掂就輕鬆回家接力，今日以朗穿嫂嫂七月去東京買的狗狗tee，原來100都好合身，睇好似好大件，著少少大，但下年冇得著，要著多啲。我好少買衫俾以朗。唔知要幾大件。原來要著95-100，大得好快呢，之前line買的100睡衣都有啲貼呀，真係嚇死佢阿媽。

熊今日只睡了四小時，應該好攰，落雨又冇乜地方好去。提議去德福廣場睇迪迪尼電影啲裝飾，因為近近地半小時車程，車又密又唔怕商場會淋雨。

以朗一去到見到狗狗好開心。

有小鹿斑比，



不過最靚的影相位如Alice wonderland,

小飛象，

木偶奇遇記都係排隊影相，以朗想街去玩吓都唔得。

好彩呢度外圍花花草地佢都覺得得意，陪佢跳一陣，但呢度都係以影相為主，同佢跳跳吓又阻住人影相冇乜癮。



今日第一次同以朗正式食麥記，對上好似一年前了，都唔係好食到固體，又勁病，之後冇再去，今次食粟米，六件麥樂雞，魚柳包同埋Oreo cheese cake加咖啡。以朗除了魚柳包唔鍾意食之外，其他都有佢份，好喜歡食麥樂雞呢，蛋糕又有佢份，仲未敢叫薯條俾佢食，怕佢從此愛上了。

食完嘢都有啲眼瞓，同佢經過salad見到大狗狗佢好開心，好攰都肯落地摸摸，真係好大隻好靚。我自己都好鍾意佢，之前去新都會都想同佢影，但後來唔記得，今次同以朗影到都好開心。好多小朋友都好鍾意隻狗狗，個個都來摸吓同影吓架。

影完隻狗狗以朗就瞓了，我同熊人就行街睇吓嘢，之後坐晚士返去，熊人去程返程都有喺巴士瞓，其實坐巴士都可以架。以朗近來又好多時都會喺巴士小睡一回，大家都舒服。