20160313 - •●飯堂@元氣●•

3月13日星期日

雖然就快去日本，但大家都想食吓壽司。於是又要去元氣食，但鬼地方要好早食五點幾就去到。媽媽爸爸例牌點至愛的軟殼蟹手卷。

好味的三文魚頭湯。

大家都放心食的熟食炸蠔。

去過東京之後，好欣賞日本人對玉子的執著，所以要點吓玉子支持。熊人食吞拿。

鰻魚都係必食。

由於大姪仔要玩風帆，六點鐘才到，我哋係邊食邊等。佢六點到咗一口氣order 佢至愛的三文魚及炸蝦。

刺身都係佢架。

20160312 - •●✿2016香港花卉展 ✿●•

3月12日星期六

天氣涼涼地，今日有花展，原本諗住唔想迫人唔去，點知熊人叫我去花展，於是又去吓啦。

可能去埋今年冇得去。

 

估唔到熊人仲有興趣影花。好多作品都係熊人影，我宜家好懶了。

我個嗜好變成佢個嗜好。

今年有幾多日本櫻，對我哋呢啲未見過櫻花嘅人真係會係咁影架，希望月底去日本可以影到少少櫻花啦。
天氣唔好，仲有少少毛毛雨，所以個背景白雪雪，櫻花又白雪雪都唔多好睇。

一如以往各區各領事館都有參加報置，我就會影吓啲ACCESSORIES

好泰國FEEL。

又係最多龍友的鬱金香，不過好多都未開，好少開咗，熊人都好有興趣同龍友一起影。

呢個係荷蘭領事，冇以前咁靚，以前荷蘭領事好多鬱金香，今年好少啦。

呢邊近維園。

竟然都有少少鬱金香，反而最令令。

其實波斯菊好靚，點影都好。

呢幅係熊人影，其實好多都係熊人影呢。 (^3^)

20160310 - ♪♬♩♫ 一個人的晚餐♪♬♩♫

3月10 日星期四
熊人約咗朋友出去食飯，樹懶只好自己吃，不過熊人一早整定飯餸俾樹懶，聽聞黃鱔有益，所以買嚟整鱔糊。整到好似出面街一樣，加啲飯，有汁好送飯，坐巴士返，七點三就返到，一早食完就喺家HEA。天氣又轉涼同落雨，食完飯睇吓電視等吓熊人返家又有一日。(^^)

20160306 - 虎紋貓之完成(≧▽≦)

3月6日星期日，

趁熊人去夾BAND完成埋隻羊毛氈公仔虎紋貓先，宜家個樣同個嘴都會整得好咗，整得快咗少少，但啲手腳就始終整得麻麻地。

正面睇都冇咩嘢，但係熊人有養貓就覺得啲手腳太粗唔多似。

 

佢喺同上次十二月整隻黑白紋貓同一系列，係同一包架。

總叫做完成哂成份羊毛氈公仔。

20160306 - •●✿南昌公園✿●•

3月6日星期日

天氣一般，典型春天天氣，唔多好太陽，想去睇黃花風鈴木，知道南昌公園好多黃花風鈴木，所以坐車去南昌站睇吓。

好近南昌站，當日咩都冇，只探路知道，係一條路，兩旁種了幾十棵黃花風鈴木，雖然樹木唔係好高，似係比較新，但滿開時都會好靚的。

既然今日未開花，我哋只好在草地上hea吓，執啲洋紫荊落花瓣，砌個心形。同啲奸夫一齊玩。

在草地上野餐，我哋買咗粉果食。( ^ω^ )

由於有好大幅草地，周圍都有人野餐。估唔到隔離班人有間條熊呢

。☆*:.｡. o(≧▽≦)o .｡.:*☆

20160305 -♀ ♂ 大帽山♀ ♂

3月5日星期六，

自行放假去睇醫生，結果ok。

之後返家取車去大帽山，知道大帽山扶輪公園有幾棵由台灣陽明山莊贈送的山櫻，想去睇吓，不過今年一月之後天氣偏冷，所以未開花，有幾棵有少少花。

其實山櫻花形向下垂，唔係好靚。不過嗰度都種咗唔少，如果盛開應該都可以吧。

既然冇咩花就再上山hea吓。上到山近停車位附近，見到有個斜坡草地，可以瞓吓，

仲可以看到元朗一帶，天氣唔太凍，坐吓都好。

　　

點知忽然有班大陸人上山，仲喺度食蔗。食完啲蔗渣仲整到一地都係，好賤格。

返家之後，熊人焗pie食，好味，但又芝士又肉，肥肥。

20160228 - •●✿意樂餐廳✿●•

2月28日星期日

鬼地方中之最鬼地方的大家樂裝修之後個舖細一半，因為有另一間餐廳，對鬼地方來講真係天大喜訊，因為終於除了大家樂以外有其他嘢食，鬼地方廿幾年都有間快餐店，其實大家樂質素唔差，不過廿幾年都會食厭吧。 (我結婚之後附近冇大家樂，反而覺得大家樂好好味，有時專登去食大家樂)，前幾年多一間中菜館，但冇咩人去食，不提也吧，最後十座人都係食大家樂為主。

 

間新嘢裝修咗幾個月，大家等到頸都長，終於等到，原來係意樂餐廳，都有唔少嘢食，意粉，拉麵咁。

我哋五個人點咗雞翼，炸得比較乾，有"之言粉"味，爸媽不太欣賞。

媽媽的磨菇天使麵，ok好食，媽媽好喜歡，

我哋的鰻魚炒飯，鰻魚少咗啲囉。幾濃味。

另點了白汁煮蜆，都幾多蜆。

爸爸點了拉麵，一般啦，當然唔會似日本拉麵咁，

姪仔點了牛肉，但我冇影相，
其實嘢食普通，不過多咗選擇，同埋唔貴，仲有點兩三杯飲品都係二百五左右，以價錢來講算抵食，以後鬼地方有多個選擇。

20160227 - ☼☼Relaxing Sat☼☼

2月27日星期六

唔駛返工就周圍去吓，去黃金海岸，以前好似去過黃金海岸一次咋，同咗熊一起就去過好多次啦，由熊人住屯門去到搬走咗，仲結埋婚，果度唔多人，有海望吓，都幾清幽，揸車又多咪錶位。👍🏼

 

黃金海岸好多嘢食，有唔少戶外可以飲吓啤酒，我哋就偏愛Ebeneezer's Kebabs & Pizzeria食烤雞卷，天氣仲涼涼地，食吓坐吓hea吓，好 relax咁又過咗個星期六。

20160226 - ♣♧Dabyida♧♣

2月26日星期五，
好友生日，我們LADIES' NIGHT
位於棉登徑的一間BAR，食意大利嘢，走高級路線。

環境比較暗，屬於FINE DINING，同老公食飯好啲。點了Cesar salad，味道ok，菜新鮮少少澀味都冇，濃郁的鹹芝士味而且煙肉碎夠香夠脆。

自家製意大利雲吞，餡料不錯，有濃濃的黑松露味，

紅花蟹肉海膽意大利飯。飯粒沾滿晒蟹粉，甜甜地，海膽好鮮甜，份量就真係唔多足夠，呢啲咪係好食唔飽囉。

當天的Chef special, Pan fired black cod fillet ，cod貴貴，而且點煮都好食吧。

parma ham 火箭菜pizza,即叫即整，熱辣辣， parma ham夠多，火箭菜新鮮，pizza夠薄側邊已焗成可口的餅乾底。

 

另外仲有甜品，

 雖然嘢食唔錯呢度食嘢好貴，清水都要$45一支，其實餐廳連水都唔提供係幾差，又話有最低消費，講嘅時候覺得我哋應該一早知，有啲老屈。

 

下圖係熊人一個人的晚餐，佢個紫菜同溫泉蛋都好唔錯。