20150929 - ☹☹要振作☹☹

 

上個星期過得不好，每次熊人不在家，我的情緒就好低落，可能真的有點抑鬱，可能中秋節對我來說已變成噩夢，再加上孤單一人，總是偷偷落淚，熊人每次返家都要收拾殘局。對我好言相勸。

今日，熊人如常弄早餐給我吃，看著無辜的熊人，我想我對熊人都折磨夠了。我傷心，熊人也不好過。熊人都被我折磨得好慘了。還有爸爸媽媽，他們都會為我傷心難過。作為子女，我應該要為父母負責，作為妻子，我亦要為丈夫負責。

我不知道我能否忘記過去，可否再站起來，但至少不應該再令愛我的人擔憂。

20150926 - ヾ(◍'౪`◍)ﾉﾞ香港地

9月26日星期六，

星期五在馬鞍山瞓，在娘家看件自己房間，公仔，想起自己已經嫁咗，又想起好多嘢.....

喊咗一段時間，

第二朝想同媽媽去食好西，人太多，度度都要等，本想同媽媽試大自然素食，雖然熊人覺得好一般，但媽媽應該喜歡食鮮猴頭菇同埋素黃金蝦，點知間嘢態度奇差，一肚子氣，唔食啦。

 

最後去香港地，都要等位，等一陣，冇法，鬼地方搵食艱難，唔抵食的香港地都要等位，痴筋。其實香港地是美心，嘢食同大家樂差不多，叫咩都有得食，雲吞麵都有，但要三四十蚊個，賺死佢，算啦，當喺中環返工食晏，唔想媽咪餓親。

 

媽咪點茶餐，我食雲吞麵，最後每人加十三元食個咖啡奶凍，唔係十分出色，但十多元就算啦。

 

☹☹又再一次落空☹☹

做人好難，好辛苦，真的好唔開心，點解其他人可以做到的事，只有我一個唔得，點解要離我而去？點解給我希望之後又要破壞佢？

點解個天要玩我？

我剛剛克服了悲傷，上天又要再令我傷心多一次。

真的好辛苦，還要強顏歡笑，我不知道還需要多久才能站起來，表面上我已經復原，其實今次傷得更深，深不見底，連我僅存的勇氣也拿掉了。

我無法面對自己，亦無法面對熊人，無法面對全世界。

我亦不甘心，為何其他人做到的事只有我一個不行。但不甘心又如何？我現在連站起來都不行。實在不敢再嘗試。以為復原了，其實每天也在哭。請大家原諒我的懦弱，因為我實在堅強不了。身心的傷害，旁人永不會明白。

日子難過日日過，現在的我，彷彿沒有了人生目標，平日省吃省用，忽然覺得很沒意思，辛苦努力又如何，還是敵不過天意的玩弄。我還有需要努力為未來嗎？人生還有意義嗎？

20150919 - ☆★長洲遊★☆

9月19日星期六

約好同哥哥一家人去長洲行吓，散心，順度睇吓大的姪仔風帆比賽，不經不過是個中學生了，風帆玩得唔錯。但我哋未睇過佢。

 

上次去長洲已經是十月一日的事，是南丫事故嗰年，我哋行咗上山，唔係食好多嘢，今次就放工約好佢哋去碼頭度等，入到去食吓魚蛋，冇咩食大魚蛋，反而有間甘永泰魚蛋好新鮮，有唔同款的丸賣，例如有鯪魚球，白魚蛋，蟹子丸同龍蝦丸，啲魚蛋好彈牙，好好味，

 

姪仔昨天已在長洲，佢阿媽在長洲唯一一間酒店租咗房，間房可以看到比較，都好，因為當日好曬，好熱，間房起碼有遮擋啦，普通長鏡影唔到，已經盡力了，ZOOM盡加CHOP相。

比賽完要沖身，我哋唔阻住佢啦，出去行吓，買咗媽咪想要的平安包PRODUCT。

又租咗可載人的單車踩，三輪，我都踩到，熊人主力踩，我都有踩吓，途中食了冰菠蘿，只租一小時，都夠啦，因為都差不多食飯。

有靚靚黃昏睇吓，之後去咗大排檔食海鮮，價錢唔算貴，因為叫SET，樣樣少少，都夠啦，唔好食太貴啦，留番平日自己整好了。

食完海鮮之後有芒果糯米糍食，要早少少預訂，賣哂就冇，十蚊定十二蚊一件，不過好大件芒果，有成半個芒果咁大舊，喜歡食芒果的人唔好錯過，我哋食咗兩個，再叫嫂嫂帶俾爸媽食。

20150918 - •●❤ 結婚一周年--德國咸豬手 ❤●•

9月18日星期五。
 結婚一周年了，一年內經歷太多，我們都好努力維繫大家感情，發生了不好的事兒只令我倆的感情更堅固。
一周年，要出去食吓，不算是特別慶祝。沒有禮物，因為一切在心中。

 

今日一早收工，因為老闆上京。

去咗灣仔合和嗰頭。行咗一陣無印。

呢間食King Ludwig Beerhall 豬手好出名，赤柱美利樓都有。仲有啤酒。食豬手熱氣當然要啤一啤。

 

我哋點了 cold cut platter，唔同肉類cold cut，配啲餅同芝士，配菜。

其中有隻芝士好濃味，我食唔到。好彩熊人都食到隻芝士。佢食埋。

 

杯啤酒幾大杯，其實我宜家唔應該飲啤酒，所以熊人點嚟自己飲，我飲佢少少。

而最後的事實是，熊人好少飲杯啤酒，我偷飲一啲偷飲一啲。都仲有剩。

主角豬手好大隻，所以要廿百幾蚊隻。好脆皮，切嘅時候脆到有聲肉質都keep到嫩滑。仲有我哋喜歡食的酸菜。

 

食到好飽，有剩啲肉我都忍唔住去完個廁所之後食埋。

 

希望下年結婚兩周年會更恩愛。

(^3^) (^5^)

20150916 - ✿｡◕‿◕｡✿朝聖

9月16日星期三

因為xx，醫生俾咗一星期假俾我，我只放咗兩日，之後返工埋數。不過今日要覆診，於是就用一日假，

身心俱疲，我好需要一些東西令我cheer up，我的年紀及性格不打算在購物中取得樂趣。

只要休息一下可能會好一點。剛巧香港第一間line專門店在香港希慎開，剛開業不夠一個月，有點活動，同熊人合照放上fb, line , ig都可拿到刮刮卡，刮刮卡可能有不同的禮物就看看運氣。

我們Po 上line 及fb，每人就有兩張卡了。拿到甚麼禮物都是好的。

今天是朝聖的心態。所以甚麼都拍攝。我會跟所有大公仔合照。

所有裝飾品，貨物或非賣品都不會錯過。

這些碟子，好想買，但所有都比較貴，絕不便宜。

這些筆跟深水埗玩具街賣的差不多。-_-#

Line ranger系列很吸引。

最後都有課金，買了一隻內衣熊大，雷熊，因購物會送環保袋，而氣球及扇都是刮刮卡的贈品，還有tee shirt因暫時缺貨遲些再去拿。

把扇好靚，熊大都有治癒作用。返家坐一會去娘家。

為了熊大，要振作啊！

20150914 - ⓛⓞⓥⓔ炸蛋

9月14日星期一

 

傷痛總會過，面對很難，但有熊一起，總可以過。

熊好有心機整嘢食俾我，搞搞新意思。今次食炸蛋。 :p

用豬肉碎包住隻蛋，再加麥皮(當係麵包糠)炸。好炸，但好得意，

 

隻蛋仲係流心。

不過一隻份量已經好大，好飽架。間中食一餐好正。但其實要好多工夫先整到少少。

20150913 - ❁❁ 欣澳❁❁

9月13日星期日，

 

日子難過日日過，同熊人出去行吓，坐屋企都冇用，

揸出去到欣澳行吓，因為有一年四月份，欣澳入面的空地有好多白色草雞，而且又可以對住個海坐吓，

去到沒有白色草雞，但有紅色草雞，好靚。

其實草雞有好多種，一般生長在路邊，唔多起眼，如果可以一大片草雞，又有陽光照到金光閃閃就可以好靚，當日天氣好好，有紅/啡草雞，好秋日的感覺。

 

欣澳行入去有個村，又有碼頭，好多木樁，應該好少人住，或者啲人返吓嚟BBQ。

好少人，好清靜。

 

行完出吓汗，個人冇咁頹廢。



20150912 - ❤♡爸媽一起飲茶♡❤

9月12日星期六

 

不想記起的九月份，只想記著開心的事。

爸爸媽媽一起來跟我及熊人飲茶。

爸爸十二點幾放工過來搵定位。

爸爸不喜稻香愛富臨。

四個人，可以點好多好多食物。

 

腸粉夠滑，粉果，菜苗餃比較common，人多可以食吓大腸，煎堆，煎釀三寶，有點心孖寶平少少。

 

 

罕有會點的紅棗糕，不過反應麻麻。熊人不喜歡其黏稠的質地。

 

爸爸媽媽到來我很開心。好愛好愛佢哋。

20150906 - ☆★飲茶去★☆

9月6日星期日。

我哋附近冇乜好，最好就係多酒樓。尤其間稻香，除了農曆新年，母親節，父親節要等位之外，其餘日子就算星期日都唔駛等位。

所以我哋兩口子兩三個星期都會去飲餐茶。

今日又去飲啦。

唔係樣樣嘢好食。例如腸粉啲皮唔得，唔會食。

但燒賣就好味。

另外多數會食鴛鴦雙潮。

一籠四個，蝦餃，粉果各兩個，最適合我哋兩個人飲茶。

 

今次又叫叉燒包同壽包。

另外試新嘢的西檸酥合就麻麻地，因為西檸唔夾。