20130928 - ☹失望的迪迪尼☹

九月廿八日星期六。

終於有日放星期六，數數手指，足足四個星期六朝早都冇得瞓晏，好慘。

十二點半之前已到了迪迪尼，但去到竟然咩都冇，竟然九月尾都未有迪士尼黑色世界，冇halloween的迪士尼朋友，真係好無癮，激死人。

比較特別係有好多靚靚仙人掌。

有灰熊山谷少少報置，但要十月四日先正式開，但我都影吓。

今日有樣好，好少人，玩咩都唔駛點等。灰熊山谷差不多完全唔駛等。

去新的迷離莊園都係好少人，第二次玩都仲好有新鮮感。同埋冷氣夠強。抵讚。



今次玩左反斗奇兵的。第一次玩都好玩，因為少人排隊所以玩兩次。反斗奇領大本營有個哈佬喂裝飾，之後去幻想花園都見到南瓜裝飾，不過係上年的裝飾，唔係新野。

五點走人時，好多人入PARK，原來又做公司包場。
熊來接我同絲媽媽。之後同爸媽熊一起去荃灣POKKA食晚飯。

我同熊SHARE食大大個鰻魚飯。

爸爸食SET的牛扒。

媽媽食意粉。

爸爸SET的咖啡俾我同熊飲。

之後仲點了一個綠茶CAKE 食。
好味呢。

20130927 - ✿｡◕‿◕｡✿山東餃子館

九月廿七日星期五。

同熊在公司附近食。都係山東餃子館，好味道呢。

今次點西洋菜餃，我比較喜歡西洋菜好夠菜味

另外成日都會點的豆腐，但唔點酸辣豆腐，因為個酸味怪怪地，普通蔥麻油已經好好食了。

想食樟茶鴨，今次點了一個set，有飯，有鴨同埋有個魚更。個鴨幾好食，少少地肉，唔駛半隻點，幾好。set有飯好抵，但就勁飽啦。

20130925 - ◐跑足全程◑

9月23日 星期三

都有超過一星期冇跑步，上次係星期一，今次係星期二，今次又跑得幾好呢。

天氣真係涼了不少，雖然跑步都係會流好多汗，不過涼左少少已經勁舒服，因為冇左夏天果種悶熱，爭好遠。

由於跑長廊來回只有六公里，其中有大約四百米係步行，所以跑到盡都只有14個圈，而且好難加到長度。咁唯有加速度。宜家比較以前跑快左好多，相信遲啲好凍返球場跑時會加到去十六個圈。

20130924 - ♪♬♩♫ 雲吞麵♪♬♩♫

9月24日星期二

星期一二熊都病了，冇去跑步。而且熊都好忙，多嘢做，所以去佢公司附近食，都係平日最愛的茶記，因為好多嘢都好食，例如車仔麵，是熊當日點的。
點了水餃，蘿蔔同埋魚片頭，配油麵。
真係幾好食，感覺幾精緻，唔似平日的咁拿渣。

另外點了我好想食的雲吞麵餐配油菜。

雲吞來到了，好好食呢。
估佢唔到，雲吞好爽口，不過麵就好少啦，都冇咩所謂啦，當減肥同埋仲有菜。
當然唔少得茶記必點的奶茶啦。

簡簡單單，但幾好食的一餐。

20130922 - ☁ ☂┋打風☁ ☂┋

９月２２日星期日
熊琴日病都走去游水，我好嬲，今日仲打風，本來想一早自己去跑步減肥，最後都係怕熱。

唔去跑步減肥，走去同屋企人食壽司，真係一念天堂一念地獄。

同家人一起吃壽司，佢地唔多好魚生，所以食軟殼蟹手卷，佢地亦會飲三文魚頭湯，由於我唔食魚頭，只飲湯，所以我冇叫湯，只飲下媽媽啲湯飲幾啖。另外佢地少食生嘢，好難同佢地share。由於上星期先食完無耐，所以好少特登再影相，因為食的都差不多。

我點了新嘢，彩虹卷，原來幾件魚生，我一個人ＫＯ哂佢。

有蝦有三文魚有吞拿魚，都幾好呀。

仲特登叫媽媽食甜品，可惜未解凍哂，所以布甸好硬，唔夠軟身，好彩味道唔錯，媽咪都話幾好食，真係個texture唔得囉。我同媽媽一人一set，唔去做運動都算，仲去暴飲暴食，所以人肥係有原因的，唔好怨了。

因為怕打風，都冇咩去得遠，只係食餐飯同行吓，冇咁悶。

黃昏八號風球，我住的地方好大風，最後星期一連半日假都冇，好彩我老闆回港的航班ＣＮＸ，要ＤＥＬＡＹ兩日至番，都算係賺了。今年被認為是本世紀的強颱風天兔，經過台灣之後，差不多到香港時減弱了少少。

而且由於是東登，受東面的地形所擋，風唔算好勁，香港真係一個福地呢。

20130921 - ♠♤miso cool♤♠

9月21日星期六。

熊病咗都去游水，我好激氣，唔知人擔心佢咩？

放工同媽咪行沙田，我都有少少唔舒服。

唔知食咩，見miso cool冇人等位，去食吓，HKD60-70一個拉麵。味道一般。

唔駛等位都可以。

耍等位就NO啦。

媽媽點的北海道牛奶墨魚麵。

我就食帶子拉麵。隻蛋ＯＫ。冇咩驚喜，不過價錢唔太貴就算啦。

湯唔算好喊，但應該都有味精，帶子有好似五粒定六粒，都算大隻，但唔係話好令人有印象。 

之後同媽媽行咗一陣思思濕爬，唔敢食綠茶雪糕，好怕會肥肥。
番到屋企好攰，唔知係作病定唔夠瞓，所以瞓咗成個鐘頭晏覺。

20130920 - ◈◈中秋假期◈◈

9月20 日星期五，中秋節補假。

熊煮早餐俾我食，因為我想食ALL DAY BREAKFAST。

所以買咗啲菇整嚟食。

仲有腸，好味架。其實瞓醒都11點半了。

之後hea hea 下又好晏。

夜晚同家人補做節，買啲水果返去，去了熊公司附近的街市買，因為又平又抵。

仲去了食tea。

我至愛的奶油朱加凍奶茶。

好好味呢。

回家都睇到magic hour，不過唔及夏天時咁靚啦。

家中做節今日先做，因為哥哥今日至放假。有鮑片食。

仲有魚同雞。

20130919 - ☽ ☽中秋節 ☽ ☽

9月19日星期四。

中秋節又可以放早少少。

同同事搞LUNCH 到會，食吓PIZZA 同壽司，又可以吹下水。

 放工同熊去元朗，因為熊媽媽是中秋節生日的。
坐車時候正是日落時候，少少塞車時又可以影吓相。

之前買定個燈籠玩。
可惜當日好大風，同埋個燈籠好細，一擺支蠟燭落去已經好貼住張紙。

點咗兩次燈籠，最後太大風燒著了，有啲又跌落地燒咗。

 兔兔z燈籠最後都燒了，好慘。

20130916 -◐好耐冇跑◑

因為九月初成日落雨，好似春天咁日日落雨，仲要好大雨，之後的一星期就要飛北京工作，於是足足兩個星期冇跑步。

上次跑好涼，以為入秋，但今日跑都好熱呢，當然唔會好似炎夏咁熱，但又唔及上次咁涼。由於老闆不在，可以早少少放工，好快跑完。今次流好多汗，可能太耐冇跑。但狀態不俗。可跑哂咁滯。冇話好辛苦。希望遲下涼少少間中星期六日跑多次。

20130915 - ♪♬♩♫元氣壽司♪♬♩♫

九月十五日星期日

同熊去了新娘潭附近行一陣，不過當日天氣好熱呢，所以只係行好短時間，真係只係一陣。間條熊都有出去呢。

當日熊買左菠蘿同豬手野餐。

百佳豬手好好食。

之後同熊在家hea到晚上，熊問我想食乜，我想食元氣壽司。

要等好多張，拎飛之後去行一陣，睇下波鞋，返黎都係等三個字左右，因為好多人拎飛之後都走左去。

好耐冇食壽司，咩都想食，三文魚腩好肥肥。

我至愛的芥辣八爪魚。

再點了帶子，魚，鰻魚，三文魚等。好好食。

仲有元氣卷。

劍魚腩，油甘魚，螺片，他他牛。

之後仲食了甜品，是元氣的最新甜品，一套三款甜物盛，有吉士味，綠茶味同埋意大利芝士蛋糕味的布甸，每樣細細個，一套二十六蚊，好味呢。