20180111-13 - ✿｡◕‿◕｡✿ 眼眼+星期六

1月11日至13日星期四至星期五

天氣都係凍，同BB玩玩，近日係咁教BB眼耳口鼻，手腳，BB都開始認到啲，不過唔識講，幾時先識講，佢識講嘅係眼眼，佢砌積木時指住舊積木上面貼紙隻眼講「眼眼」，開心死我啦。
宜家每晚得我一個人湊住BB，以前都擔心會好吃力，不過宜家習慣咗又冇乜嘢，因為BB都好乖，每晚由婆婆家返家玩大概一粒鐘就換片，換完片叫BB自己掉片片，BB好開心可以自己掉片片架，掉完片片就睇電視，睇幾個字就準備食奶同埋洗面面洗手手，刷牙牙，佢成日要人陪伴，但好聽話，宜家唔係NEW BORN，其實都唔難搞，同BB獨處都好開心呢。尤其宜家BB分到我先係佢媽咪，好黏我，真係好愛BB。

星期六熊放假，同BB落街食午飯。

宜家少咗同BB出街，佢好HYPER呢，雖然冇BB椅，但佢都幾肯乖乖食。食完好耐先冇耐性，不過佢把聲好大，有時會嚇親人。

晚上係嫂嫂提早慶祝生日的火鍋餐，今日嫲嫲佢哋嚟睇BB，BB都幾好客，冇喊豬仔。
8:00先食HOTPOT，再食蛋糕。

BB又食蛋糕又食車厘子，食到咀仔紅哂都仲要食呀。
BB真係識食呢。