20170329 - ◇◆私家位◆◇

3月29日星期三

 

BB豬成日怕悶，晚飯喺婆婆屋企好多人，我哋個個去哂食飯，得佢一個喺Playing mat，佢就呱呱嘈。所以整張櫈俾bb豬坐吓。bb豬都坐得幾好，幾穩陣啊。

 

呢張櫈都係當年佢個表哥呢。但bb豬宜家好大件頭，坐呢張櫈都幾fit，可能好快會唔夠坐，以後喺婆婆屋企食飯時，佢都可以埋枱啦。人仔細細有自己個私家位啦。

 

暫時bb冇嘢挨住就會四圍擺，如果挨住啲嘢就坐得唔錯，bb豬慢慢嚟。

好快你就會真係坐到啦。

20170327 - 鍾意食香蕉(≧ω≦)/

3月27日星期一

 

BB豬下星期就六個月BB了。

所以開始俾佢試固體，或者四月份用固體可以代一餐。

 

暫時有食米糊，加過紅蘿蔔或菠菜落米糊度，佢都會食。

而水果就整過蘋果蓉同啤梨蓉，佢兩樣都食，上星期日整過香蕉俾佢食，佢第一次食香蕉啲味時，個樣好似怪怪的，冇特別想食，但又唔抗拒，

但今晚第二次俾香蕉佢食時就好開心，好瘋狂，食慢啲都大叫。

 

暫時BB豬試過幾樣食物都食，佢好似冇咩唔食。

看來BB豬應該喜歡食嘢，好為食咁啊。

20170327 - ☆★同表哥玩玩★☆

3月27日星期一。

BB豬宜家只係識得趴，但都好想玩。有時見到表哥跑來跑去，佢都成日望住表哥，好有興趣。

而表哥平日對住一屋大人，見到有個表弟都好有興趣，可惜表弟暫時咩都唔識，未可以有咩互動。表哥暫時當表弟係一個識郁的大公仔。

 

表哥成日問表弟點解會咁。

表哥見到表弟成日趴趴就學佢，佢哋好似好開心，好似一齊玩玩，希望佢哋第日多啲一齊玩一齊互動。

一起成長，唔駛一個人咁悶啦。

20170324 - ◈星巴克煙肉蛋酥◈

 3月24日星期五，

 

生完BB，搬近媽媽之後，日日放工有住家飯食而且仲可以帶飯，不過有時食得多都覺得悶悶地，今日LUNCH見保#經理，乘機買餐STARBUCKS 食吓。

 

未生B，同陀B時真係唔會點飲咖啡，但生完B之後好似冇後顧之憂，而且唔飲GRANDE飲TALL就唔會肚瀉，有時悶悶地，一星期都想飲一兩杯啡。

 

今次揀咗煙肉蛋酥食，因為個賣相吸引，鬆脆的酥皮盛載了太陽蛋及煙肉，看到有個太陽蛋就深深吸引我了。

 

這一款輕食，可說是煎蛋與煙肉的一大變奏！簡單地把兩種早餐材料，做成酥皮煙肉蛋杯，既好看，又好吃！用焗爐翻熱過的煙肉蛋酥外形十分漂亮，酥皮烤得很鬆脆，烤得焦香的酥皮和煙肉捲成的圈內，圍著金黃色太陽蛋，上面還灑了少許黑椒。

 

雞蛋表面還有薄薄一層芝士，可以翻熱後並未溶化，反而形成了一層薄膜，令太陽蛋表面難以切開，而且芝士味並不突出。蛋黃已經全熟了，入口有點乾，但蛋黃味很香濃。如果能弄成半熟蛋，口感和味道會更好。

 

 

20170323 - ☼終於捱過厭奶期☼

3月23日星期四

BB豬除了出世時因為比較輕磅，食奶比較少同比較慢之外，起初食50-60ml都要食一個鐘。

到了兩個多月已經食到六安奶。

 

由於食得多，BB豬由出世瘦瘦豬慢慢變成正常，兩個多月已經由起初的生長線3%成長到了生長線50%。

 

可是三個多月開始，BB有少少厭奶情況，當時正值農曆新年，有時會去親戚家中拜年，BB豬太貪玩，只要人多就開始作怪，不太願意食奶，有時只食一半就不再吃。

 

雖然老早已經知道BB會有厭奶期，所以只要不是太離譜，也不會強迫BB吃奶，怕強迫他會有反效果，怎料這個厭奶期比想像中來得兇狠及長久。起初只是間中一餐半餐食得少，到後來，差不多每一餐都只吃90ml-120ml，每次餵奶就變成了一場角力戰，原本十分鐘可以食完的奶，變成了一個鐘，因為很多時候夠鐘吃奶，bb不吃，要等多大半小時才吃。有時全日都好像不肚餓，每餐吃三安便夠了。

 

不想吃時會不肯張開嘴巴，又或用舌頭頂出來，更甚者咬著奶嘴望著你笑，奶由咀角滲出來，(我是用chu chu的，不吸啜是沒有奶，如果奶從口角滲出來，代表刻意不吞下去)。真的令人抓狂。

 

到BB豬四個月到健康院，姑娘又認為正常，因為bb仍然是50%，我就只好每天期待厭奶期快點過去。

 

想不到的是BB差不多五個月時，BB大病了一場，患了氣管炎，因為吃藥及咳的關係，很辛苦，胃口更差，因為有化痰藥，所以也要讓BB多喝水，到BB差不多康復時，BB豬胃口好轉了，不單喝奶，亦喝水，康復之後更開始吃七安奶，而且吃得很急。可能是猛長期的開始吧。

 

這個情況維持了個多星期，相信應該捱過了厭奶期吧。

終於捱過了可怕的厭奶期

20170321 - 向後爬✿｡◕‿◕｡✿

3月21日星期二

自從三月初大病初癒之後，阿囝食好多，又鍾意玩，

呢排活力好充沛，喜歡玩jump jump jump，3月中playing mat送來之後，多咗地方玩，開始想喺地下爬，尤其見到啲玩具，好想拎來玩(其實想放入口)，但係bb只係五個月人仔，點可能識爬？如果唔識用手支撐根本冇可能爬到，要爬應該要八九個月吧。

佢爬唔到就唯有轉，好似個時鐘喺度轉圈，或者向後爬，越爬越後好搞笑。

有時爬極都拎唔到玩具就會發脾氣。又或者爬到攰就會嘈，或者食手。

呢幾張相見佢係一直向後，一開始隻手仲喺紫色度，爬多幾爬走咗去綠色度。

宜家其實用個肚磨，點會爬到。

bb努力呀，慢慢嚟，遲啲一定會爬到架啦

20170318 - ♫♬♩♪出街威♫♬♩♪

3月18日星期六

結婚兩年半了。

多謝熊人一直與我同行。

今年多了一個BB豬。

多謝BB豬俾機會我做佢的媽媽。讓我把他帶來世上。

 

要上班的星期六。

天氣不俗。放工BB豬出車帶姐姐到附近走走。

食完午餐去長廊行吓，其實BB豬出門口時已經想瞓。

但佢好鍾意出街，一出街就唔願瞓。

死頂，結果行出廊時架車郁郁吓就瞓咗。

但只瞓咗四個字就起身。

四點餐奶仲喺公園度餵。由於多人又唔同環境，佢又心散只食一半。

之後我哋去超市買嘢，BB開始扭計唔肯坐BB車，又要我抱，結果俾佢坐購得車，佢又肯坐，仲好開心呢。

同BB出街去得唔遠但大家都好攰，不過BB好鍾意出街，見佢開心大家都好開心。

20170317 - ❤️❤️同熊人食晏❤️❤️

3月17日星期五

熊人老闆出差，唔會LUNCH TIME都俾人搞住。

所以我過去上環找熊人食LUNCH。

返工可以同熊人一起食飯，可以一齊放工都是一件好幸福的事。

在公司樓下坐叮叮去，可是等咗好耐先有叮叮，去到都點二了。

 

去食飯都不忘拖手，生完BB都要恩愛啊。

遲咗去周圍都好多人，好多車仔麵檔，熊人同我都想去食上海嘢。熊人只食過一次，要搵到一陣先搵到。

點了擔擔麵。OK，個味道幾好。

酸辣湯雲吞，我覺得得個酸字。

小籠包。皮尚算薄，但啲肉好似多過龍。

不過過到來可以同熊人食LUNCH已經開心，啲嘢都好食啲。

之後經過涼茶鋪買咗支涼茶，下次要去市政大樓食，或者去吓COFFEE SHOP 食先得。

以前剛開始拍拖，熊人由屯門過來中環找樹懶食，呢幾年生活有點變化，又生咗BB豬，有爭吵過。宜家變成樹懶找熊人吃LUNCH，但大家都係毋忘初衷。一樣愛大家。
大家要相親相愛啊。

20170316 -✿ Yoku Moku皇室奶茶蛋卷✿

3月16日星期四

 

沒有跟熊人去Blue Brick Bistro吃高級餐，但也希望買Yoku Moku的蛋卷給熊人試試。所以吃晚餐時也先買了蛋卷連乾冰放在餐廳的雪櫃存放。

 

在餐廳吃四道菜晚餐有南青山原味蛋糕卷作為餐的甜品

 

南青山原味蛋糕卷 (全條HK$168 / 半條HK$88)

這是Yoku Moku最受歡迎的皇牌蛋糕卷，蛋糕卷的忌廉份量跟蛋糕比例十分適中，不算多。

 

據店方說蛋糕卷的忌廉是100%使用北海道忌廉，外層的蛋糕尚算濕潤，吃起來有蛋香而且不乾，軟熟度一般，中間的忌廉帶點奶香，質地也夠幼滑柔軟。 不過入口似乎不太夠忌廉, 所以吃起來不夠豐厚感，由於忌廉幼滑柔軟，如果可以再多一點口感會更佳，由於忌廉不夠多，好像有點不足。整體來說水準似乎普通了一點，其實只比連鎖蛋糕店好吃一點而已，但價錢貴一倍。如果不是喝餐，我未必會再買。

 

由於吃四道菜晚餐南青山原味蛋糕卷餐的甜品，所以我買了其他味道。

 

 

另有   南青山抹茶蛋糕卷 (全條 HK$178 / 半條 HK$95)

           南青山皇室奶茶蛋糕卷 (全條 HK$178 / 半條 HK$95)

 

其實東海堂的抹茶蛋糕卷已經好好食，所以想試的是南青山皇室奶茶蛋糕卷，

本來還有點擔心買全條會吃不完 而且價錢比較貴(因為比原味更貴)，但沒想到他們也有半條裝售賣，不過半條裝的份量不算多，切開後其實只有大約3件左右正常尺寸的蛋糕卷，不過就比較適合2-3人分。

 

蛋糕卷的皇室奶茶好香，奶茶味特出而不會很濃，奶茶味的忌廉比原味香，可以掩蓋忌廉不足之處。由於奶茶味很討好，這個可以再吃。

 

 

整體來說宅女覺得這裡的蛋糕卷始終不算非常美味, 甚至單是在香港也巳經有好幾家做得比他好. 當然又不能說是伏, 就是水準平均了一點.

20170316 - ✿｡◕‿◕｡✿ Blue Brick Bistro

餐廳樓高兩層，下層是酒吧，上層是用膳，從露天茶座位置看出外的街景，感覺不俗。

HAPPY HOUR，飲品第二杯半價。我點了最愛的LONG ISLAND ICE TEA。

dinner set 有兩款，四道菜晚餐(主菜/海鮮)，每位$398，或者四道菜晚餐(意粉及意式飯)，每位$338。

頭盤可選凱撒沙律或清酒麵豉雞肝醬配多士。我當然選擇比較特色的頭盤，多士底下的鐵絲網有熱石，上碟時把清酒落在熱石上，清酒即蒸發滲入多士裡，再配上清酒麵豉雞肝醬，入口有清酒的香味，雞肝味道雖然冇鵝肝咁香濃，但雞肝醬口感軟滑，味道濃郁但不膩好美味。

湯可以點是日餐湯(紫薯忌廉湯)或龍蝦湯。我揀了紫薯忌廉湯，因為平日好少有餐廳會整紫薯湯，好香紫薯味，又唔會太多忌廉，幾好飲，

主菜我點了海膽意大利燴飯，海膽鮮嫩，唔會苦而且入口即溶，要新鮮的海膽才有這種味道， 日本舞茸菇則提升了意大利燴飯的香軟細滑。

同事點了牛。

亦有豬，我覺得食豬我就寧願食意粉或飯。

餐飲點了咖啡還有贈送的招牌原味雪茄蛋捲，奶油味香濃而不膩，蛋味甘香，好食，而咖啡就比較苦一點，幸好另上的鮮奶是暖的，即時加了不少分。

 

甜品．原味南青山蛋糕卷是Yoku Moku既signature甜品，蛋糕質感軟綿綿，包裹着著北海道忌廉，口感綿滑輕盈，不過又不太覺得十分驚喜，因為在日本很多CAKE SHOP 都可以吃到此質素，如果要80多元半條的價錢來說，好像貴了一點點。

侍應生好好，我想去YOKU MOKU CAKE SHOP買半條蛋卷返家同熊人分享，他們幫我晌樓下CAKE SHOP幾點關門，亦幫我把蛋卷放在雪櫃，走的時候主動拿給我。

20170313 - ♠♤ 為食固體作準備♤ ♠

3月11日星期一

 

BB豬五個多月了，可以試一點固體，只作嘗試階段，不用急於以固代奶，看過健康院的幾本小冊子，很精彩，教曉我們新手爸媽如何入手，固體的軟硬度，食物的種類都一一詳列出來，又會有一些食譜餐單等，資料很詳盡，

 

BB5個多月可以試一些固體食物作點心，準備了食物器弄食品，當然還要準備好HIGH CHAIR 讓BB養成在固定地方用膳的習慣。

 

把原本用來睡的HIGH CHAIR 變成坐，BB勉強坐到了，真的有點感動，BB不再是NEW BORN，是小朋友了。

 

BB坐得不俗，但又不是很有力，當很有力是就可以食多點固體，我跟熊人有共識，不會太急切要BB以固代奶，最重要是配合BB的生長吧。

20170312 - ▣同BB豬去元氣食壽司▣

3月12日星期日

今早BB六點唔夠就起身，姐姐六點前出咗門口，我就大約六點暗得返佢豬覺仔，一直到八點幾先食奶，由於好攰，熊負責餵八點早奶，之後再豬到十點幾，每個星期日都似打仗。

夜晚同爸爸媽媽姪仔去附近的元氣壽司食晚飯。

BB豬由三點瞓到四點幾，食完奶奶就準備落街，早啲去食，但五點幾六點入到去食時，開始有點眼瞓，但佢唔肯瞓，係咁捽眼都唔瞓。

對好多嘢都好有興趣，好開心，要睇嘢。不過只係睇得唔食得。

唔係食太多嘢，近來少食魚生，只係想同bb爸媽出吓去，唔駛次次都喺屋企食。

次次都食炸蠔。

鰻魚。

三文魚頭湯

自從去完東京之後愛上了的玉子。

佢哋點汁燒牛肉手卷，好似一般咋。

炸蝦卷宜家多咗蟹子。

墨魚

冇影哂相。

20170311 - (≧▽≦)終於見到119

3月11日 星期六

今日本身係花展，我近六七年都好似年年去，但今年冇去了，因為熊人昨晚夾band 好晏返，自然晏起，而我昨晚本想同bb一起瞓，但我因為怕自己整到bb所以都瞓唔到，如果真係有心去花展就早去早回。晏起就唔駛去了。

 

呢幾日都病，其實係成家輪流病，我傷風完就咳，其實冇咩痰，但宜家冇運動，身體好差，少少痰都咳，忽然惡化變半夜敏感咳，由於咳咗兩晚，又冇咩胃口，所以人都輕咗，終於見到119，低過120已經是一年前的事，雖然知道只係短暫兩日，會反彈，但都好開心，只要下試到119，即係有機會再見到。不過距離bb豬半歲越來越近，也就是話生完bb半年deadline要回到未懷孕前磅數也越來越難。仲有兩磅，要努力。

 

今日都出咗去禾輋12蚊店買濕紙巾，filter紙等，順便行一陣吧。aeon12蚊店啲嘢真係幾靚。好多時都想買啲返去。

 

夜晚同bb豬玩，整副大框俾bb豬。

 

20170309 - ☞Bistecca Italian Steak House ☜

3月9日星期四。

同事生日，幾個比較FRIEND 的同事們一起去吃吃。

今次揀了蘭桂芳的Bistecca Italian Steak House ，幾年前去過，係semi buffet salad bar 再加main course，

SALAD BAR 有很多選擇，而且前菜和甜品的整體的質素都很高，前菜不只是沙律，有青口，有炒雜菇，燒pepper，parma ham，哈蜜瓜，腸仔，及幾款沙律等。都幾多嘢食，而且仲有甜品三款，我只試了cheese cake ，幾好食，幾滑，會令人想再食。

 

至於main course，我揀咗三文魚，樣係幾靚但好鬼鹹。一般，只食salad bar 好過。

其實呢間係食牛出名，不過唔知點解今日冇咩同事叫steak。好多都揀三文魚，另外兩個揀意粉，好奇怪，只有壽星女揀了burger。

burger有埋薯條，佢話幾好食。
下次有機會再嚟可能只叫salad就算。

20170306 - 小別✿｡◕‿◕｡✿

3月6日星期一

 

熊人差不多一個月沒有留過夜的出差，因為今天的小別，我們都掛念對方。

 

上星期因為BB豬看醫生的事而大吵一場。樹懶心靈比較脆弱，每次吵架都令樹懶好傷心，幾年間原本好錫樹懶的熊人好像變了另一個人，不過當熊人不在身邊時，大家又掛念對方。其實大家都是愛對方的，能夠走在一起，是緣份，排除患難才有BB豬，是天賜的禮物，

 

所以我們要相親相愛。

一家三口要開開心心啊。

 

大家要記住大家的好，記得當初為何會走在一起啊。

日後，樹懶熊人還要走更遠更多的路。

 

 

20170304-5 - 氣管炎(〒︿〒)

3月4日至5日

星期六至星期日

BB豬星期三睇完醫生之後完全冇好轉，雖然有化痰藥同咳水，但係仲好似越來越嚴重，抖氣都有痰聲，一見到BB豬病，我個心就好痛，諗住預約睇醫生，點知又俾人話過分緊張，仲乘機發脾氣。

但我都照棣在星期五預約了星期六睇兒科。

我因為要返工，唯有熊人帶BB豬去睇。原來氣管炎，好慘呀，BB豬幾晚都冇乜好瞓，姐姐都係幾日冇乜好瞓，BB豬細細個都要食抗生素，好彩食咗一兩次藥已經見到有好轉，起碼可以一晚瞓到天光，唔駛再半夜咳醒。不過啲抗生素應該好難食，因為好杰同好難聞，BB之前唔抗拒食藥，食過一次抗生素之後一食藥就喊。

試過星期六晚把藥放在奶裡面，BB連奶都唔飲，直到第二朝八點都唔肯飲奶，趁佢瞓咗餵佢先肯食。

 

好彩星期日BB已經慢慢好轉，雖然仲有好多痰。但已經生猛返好多。

呢個玩具其實三年前表哥玩過，媽咪一直KEEP住等我生咗之後，外孫可以玩。

當然我有不愉快經歷，佢都唔敢同我講，只係靜靜地KEEP住等有一日我可以用。

宜家BB豬都用到啦。

20170302 - (￣︶￣)Bocca white pudding

3月2日星期四，

阿嫂在網上群組訂咗啲嘢食，今日有得食益我哋。

Bocca white pudding 是Bocca 獲得第十五回北海道加工食品最優秀的食品

特色: 吃法和造型都非常特別，現在北海道最具人氣的手信之一， 圓圓的球體似一個波，又似水煮蛋。

原來是好味的牛奶布甸，用針一刺破後就滾出一顆圓圓的布甸，不只賣相可愛，而且牛奶香味濃烈，淋上提供的焦糖汁又香又滑， 大讚!

仲有cream cheese 味，但我冇試到，cream cheese味有兩種醬，cherry berry x4 同lemon x1

好味就好味，由於是網購，價錢不便宜，75元四顆。