20151025 - §§同屋企人食壽司§§

10月25日，星期日

又同屋企人食壽司，估唔到爸爸都接受到日本嘢，記得十幾年前佢完全唔食架，

宜家佢哋間中都話要去食「大滿足」，而我都會滿足佢哋，

因為佢哋一至五要湊孫煮飯都好辛苦，星期六日唔想煮都好正常。

我哋一定食鰻魚，加州卷，有時會食炸蝦，熟蝦，腐皮，

而爸媽必食軟殼蟹手卷呢，有時仲會加個三文魚頭湯。

星期日，我要孝敬爸爸媽媽。

20151004 - ❤♡homemade paella♡❤

10月4日星期日。

有時唔知食乜，通常熊人想食吓海鮮。

因為方便易煮。

今次就整一大鑊的西班牙炒飯，呢個炒飯由初初拍拖就開始整俾我食，因為可以食吓海鮮，好鮮味。到宜家耐唔耐都會煮吓架。

 

今次簡單啲唔用鮮蝦，就用雪蝦，另加有機茄子，同埋帶子肉，蜆肉，毛豆等。

熊人煮慣煮熟，越來越快就可以有得食。

近來，每一餐都有特別的感覺。有悲傷亦有甜蜜。也許我太多嘢諗。

20151024 - •●❀飲茶@ 富臨❀●•

10月24日星期六

爸爸媽媽比較喜歡去富臨，我哋有時兩口子都會去富臨飲茶，富臨會比稻香貴少少，如果稻香100蚊左右，富臨就會120-130。

而且間中仲要等位先可以入座，對我哋冇食早餐嚟講就比較辛苦。XD

不過有時稻香食厭咗，富臨會有好多選擇，有新鮮感，例如腸粉好食啲。

今次點了黑糖馬拉糕，帶子竽角，雪影叉燒包，煎蘿蔔糕及鮮蝦菜苗餃，呢啲平日都唔會喺稻香點嚟食呢。

20151023 - ♪♬♩♫美酒佳餚節♪♬♩♫

10月23日星期五

美酒佳餚節又重回中環啦，其實都想日間去，因為少人啲，不過聽日係放假嘛，唔想專登出中環。所以就今日去，熊人接我放工一起去，由於免入場費，所以超級多人。排隊都隊咗幾個字，好彩見到朋友先快啲。

唔駛要入場費，但要買品酒劵，所以都要等。

熊人唔好酒，所以我倆都係食為主。有唔少特色食品，例如松露春蛋，價錢唔平架，但好特色。

春蛋整得好滑，松露都唔少。

食吓串燒，幾好食呀。

大腸糯米，都好味。

飲吓酒，熊人似少女咁喜歡飲果味，甜味的酒，即係易入口嗰啲呢。

呢支酒，我同熊人試過似甜酒冰酒好好味，買咗兩支返屋企兩個佳節時飲吓。

好多酒都要兩張劵架，所以要慳啲洗。

總括來說，星期五晚上有得食有得飲好好氣氛，好輕鬆的Friday night.

20151022 -❤ 熊自家製西餐❤

10月22日星期四

自從9月之後，熊成日都煮飯，煮多少少唔同嘢，有時全西餐都好正，今日就西餐日有醋茄子，

仲有pepper，啲pepper 要燒一燒個面架，由於呢度唔煮得嘢，次次燒茄子有陣味都驚驚地，呢種整法的pepper令我非常喜歡。

 

而主菜是白汁意粉，熊人的白汁意粉係好高水準，宜家媽媽哥哥勁喜歡食架。而熊人對白汁意粉是有佢的堅持，就係一定要有磨菇，呢啲就係大廚的堅持，自從食得多熊人意粉之後，宜家出街真係好少食意粉lu~

 

20151021 - <(￣︶￣)/ 萬聖節莎莉

10月21日星期日，

LR 出咗HALLOWEEN角色，莎莉真係好得意，本身都喜歡萬聖節南瓜，佢呢個造型好抵死同搞笑，忍唔住要畫吓。坐南瓜車，拎南瓜燈籠，著排骨衫，全身打扮一

絲不苟架。

20151017 -•●❀水浸百千層❀●•

10月17日星期六

天氣唔錯，而且十月都冇咁熱，又去行吓山，近近地就去屋企附近的城門水塘行吓，估唔到當日好天之外，水塘仲好滿水。天色又好清，俾我哋見到藍藍的天。

呢個似外國湖泊景色，其實我人生第一次嚟城門水塘時已經看見，藍天令水的倒影更藍，當年係攝影班，又未嚟過，令我印象難忘。

城門水塘呢個例景亦叫做水浸百千層，但唔係成日可以見到，要打風落大雨之後水塘極滿水的情況下，水位很高，把大部分的白千層樹根都浸著，

今次好滿水，右邊的空地都是水，以往可坐在空地上，宜家都被水浸了，要去右邊只能在裡面穿過森林走進去。

由於水滿四周都是倒影，又有陽光，就像照鏡一樣

呢棵橫卧的樹幹之前全是陸地

同熊人行過十多次城門水塘都未試過咁滿水，所以熊人見到其實城門水塘可以咁靚，都喜出望外呢。

20151016 - ♠♤Chous Creme泡芙♤♠

10月16日星期五

成日都夜放工，所以成日都在旺角坐小巴，十三大元換來快兩三個未時間，

時間有時都可以用錢買的。

 

我其實好鍾意食PUFF，因為好喜歡食creme，有時放工心思思想經一經朗豪坊先去坐小巴，心思思就想買個puff，呢間好多puff，好多味道，綠茶在放工時間長期都賣哂，幸好我食過tiramisu味好好食，另外原味，或北海道牛奶都好好食，好滑，

肥係肥啲，不過換來生活上的一點甜還是值得的。

20151010 -11 - ☆★兩餐早餐★☆

10月11日星期日
琴日星期六本來想去小蘑菇冰室食ALL DAY BREAKFAST，點知佢又冇開，星期日已經例牌唔開，星期六就唔知邊個星期六開，邊個星期六唔開，我哋見佢唔開多數去太子茶餐廳度食，不過琴日就去小蘑菇冰室隔離間度食。

呢間叫歐姆屋，主要食意粉同蛋，可能因為工業區，係平好多，廿幾蚊個早餐，熊人食牛角包，我就食下面果個，衰在熱香餅冇果醬，蛋都幾好食，而飲品有好多款，好多係台式飲品，都OK啦。

今日星期日就熊自己煮，有腸仔，仲有個特色蛋，熊人將個蛋白打到似麵包，中間係個蛋黃，好得意，而我又喜歡食唔同種類的蛋，所以唔錯。

20151009 - ✿｡◕‿◕｡✿舊地重遊

 

10月9日星期五，

明天不用上班，就同熊人行吓散散心，知道銅鑼灣有加菲貓，我細個好鍾意加菲貓，因為貪佢夠懶洋洋。宜家加菲貓唔太興啦，所以有機會都想影吓，

皇室堡東角等幾個商場都有，但以皇室堡最多，有唔同造型的加菲也有狗狗阿的，佢女友阿蓮等。都影得幾滿足。

簡單食飯之後我哋去食甜品，第一次見面的apple green已結業，幸好當晚有食糖水，間發記仲喺度，簡簡單單有熊人在身邊已經好足夠 ^^

20151004 - 畫畫ⓛⓞⓥⓔ

十月四日 星期日

近來獨留家中會胡思亂想，所以要找點興趣，近來好多人玩填色，只是我不喜歡那些線條。

我只喜歡卡通。

想起自己有木顏色，就開工吧，當然畫最喜歡的熊大。

這個是二號星期五晚完成的。彈結他熊當然就是自己老公。

這個是今天畫的，因為打風落雨，所以熊大都一臉惘然。

畫畫之後心情好好多了。

20151005 - ❁上海鷺鷺酒家❁

10月5日星期一

約了同事同埋舊同事為九月份生日的壽星女慶生。

今次食上海嘢，呢間係位於南洋酒定地庫裡面，位置亦唔近地鐵站。

當日仲落雨，好大雨，好彩有遮。

點了小排骨，蟹粉粉絲煲，小籠包，滷蛋，雪菜炒年糕，

小籠包唔夠皮薄，唔可以話好好食，滷蛋就好好食。

雪菜炒年糕OK，蟹粉粉絲煲佢哋話好食，惹味，但我就覺得好重口味。

 

最有問題係仲有人未食小籠包就竟然收咗去，當然同部長講，最後俾返一個小籠包俾你，又好笑又離譜。

甜品有豆沙鍋餅，高力豆沙。

豆沙鍋餅好硬，高力豆沙一般，

唔差，但唔值得再幫襯。

20151003 - ❤❤homemade pizza❤❤

 

10月3日星期六

得閒又整吓pizza,自己整特別好食，唔需要厚或好多好多料，最重要多啲蕃茄味有pepper等，由於要自己燒pepper,又要等兩粒鐘等啲麵粉發，其實自己整係好花時間。

不過次次食親就只需要五至十分鐘就食哂。由於我哋焗爐細細地，所以pizza都係細細個，一次整兩個咁啦。

一個pepper腸仔，一個蟹柳加帶子肉。

20151002 - ╭❤╯╰❤╮愛心炒飯

 

10月2日星期五

 

9月之後每餐飯都有淚水，亦有愛心，好感恩身邊有人支持，否則真係好難過。

熊心不時都會整啲新菜色，

今次個炒飯好靚，金黃色，有蝦子毛豆等，唔知叫咩名，總之好靚，好吸引，亦充滿了愛心，就叫做愛心炒飯吧。