20141224 - ⊕甜品@MangoChaCha⊕

12月24日星期三，

平安夜坐完摩天輪再食完晚餐之後，本想入去冬季嘉年華玩吓，但無咩嘢玩之餘，而且太夜都收檔了於是就坐船過尖咀，可能已經過了十二點，所以都開始人少了。唔算太迫，之後行行吓行坐去近赫德道附近，見到有間專食甜品的MangoChaCha，就試吓。

 

四個人食，試吓芒果千層拿破侖，外表裝飾得好可愛，可能因為即整的關係，用刀切開外層脆卜卜而入面就有芒果粒同滿滿既吉士醬，但個醬唔似係吉士。熊人整的吉士好味啲。

 

另一個叫金牌情人，係雪糕+綿綿冰+愛文芒，

芒果雪糕味道有點淡，綿綿冰就好滑好軟，同平時食果啲「鞋口綿冰」高左幾個層次，甜甜地，芒果味都幾出，愛文芒味道好清新，少少甜。

 

仲有一個叫冷熱激情 ，58蚊，食的時候脆脆地，但內裡芒果得四分三，沒有芒果味，雪糕又細粒，即是餡料不夠。

 

最後一個是窩夫外皮鬆脆裏面鬆軟，唔似有啲地方個窩夫硬身到一初就碎開，又唔係個啲煙韌到把刀切極都未切得開個皮個種。哩個係軟硬適中令人容易一刀切落去，又唔會整爛個窩夫，配埋佢個清甜既芒果味既夾料，幾好食。好過其他。

20141224 -╭。☆幸福摩天輪☆。╮

12月24日

星期三，放早放4點3

 

同熊周圍行吓先，諗住去中環新海濱坐摩天輪，上兩個星期六下午去過，無咩人坐，當日天氣麻麻都唔想坐。

但原來夜晚係好靚，因為著咗燈。

由行去碼頭天橋一路行一路影。

黃昏影到天黑。

個摩天輪係HKT有份整，而在摩天輪附近有個CSL嘉年華，要CSL客戶先可以入去，熊是CSL客戶，所以都可以入。

裡面有聖誕樹，間中有飄雪。

天氣唔太凍都幾舒服，

等埋兩個朋友過來就坐摩天輪，兩邊排隊，人好多，但都好好秩序，排半個鐘多啲就上到。

一個箱坐八個人，一次一百蚊，可以包箱，但就貴啲， 水晶箱就更貴。

 

上到去可以看到隔離的AIA歐陸嘉年華，燈光火著，好靚呢，大約坐15分鐘。就坐完。

這就是我們婚後第一個平安夜了。

20141221 - ♪♬♩♫鳳坑♪♬♩♫

12月21日星期日

今晚返媽媽家吃飯。

又想行山，所以hea 行。呢度好易行，平路為主。

鳳坑家樂徑設於鹿頸與鳳坑之門間。鄰近的鳳坑村新界東的原有鄉村，現仍有居民居住。

我哋在此坐吓休息吓，成日見到好多鳥飛過，可惜我無帶大機。　

兩旁好多紅樹林。

當日帶埋間條熊去，間條熊好開心。

20141217 -•●✿ 韓燒@新村BBQ✿●•

12月17日星期三。

同同事們食吓打韓燒，因為同事C拍拖了，大家本著八卦就同佢傾吓，解答疑慮。

連唯一一位男丁同化身成謝夫人同佢傾吓，作為曾經係剩女的我，都希望佢幸幸福福。脫離剩女行列。

好喜歡韓風的同事介紹新村BBQ，老闆娘是韓國人，好正宗架。

有食到人氣炸雞，有辣有唔辣。佢哋話好好食，但我就一般，因為太炸啦。

沙律係幾好食，但又係太辣。頂唔住呀。

個爐邊有蛋漿，熟咗就可以食，都幾得意，

五花腩好薄好好食。

另外又食到久仰大名的部隊窩。我唔多識欣賞呢。香腸芝士呢啲材料做火窩就好搞笑。

喜歡韓國明星還喜歡，韓國菜其實唔多好食。

因為多是BBQ, 火窩等好鬼熱氣。

20141216 - ╭。☆2014聖誕甲☆。╮

12月16日星期二，

又去整指甲，今次參考日本app girls pic  的圖，有格仔又有雪花，完全聖誕節的感覺。原本是綠色格仔，改為紅色，鮮艷啲。

20141214 - ❤ ♡烏蛟騰荔枝窩♡❤

12月14日星期日。

天氣呂錯，去行山。

去烏蛟騰荔枝窩，要行三小時架。十公里左右。

我哋冇跟足oasis trek的路徑，

烏蛟騰 › 九担租 › 上苗田 › 下苗田 › 三椏村 › 荔枝窩 就回程，所以只行三小時

一去到就有一排紅葉。

天氣好好，特別靚。

 

烏蛟騰起步，於新屋下公廁側往東小路走。不久見右邊的九担租路牌，沿此路經過已荒廢的九担租村，不久見分支路(上路往犁頭石)便依下路走，過上下苗田後沿大路便可直達三椏村。見十字路口，有指示牌，先右行至碼頭，稍作休息。

 

有水有石可以休息，好舒服。

上年唔折返就可以入村見到樹藤。但就要行多個幾鐘。
oasis 是這樣形容「入村前漫遊奇特的魚藤，過橋便見學校。校側公廁旁的道路可往著名的空心樹。後走木板路，上走至分支續上行到分水凹。前走往下到谷埔 (左可接烏蛟騰郊遊徑)。」
oasis 會行埋谷埔，鳳坑，好靚架，但我哋就當另一個trip行。

20141214 - (◍•ᴗ•◍)荔枝窩

12月14日星期日，

好似話烏蛟騰都有紅葉，所以去睇吓。

一去到就見到一排楓香樹，又幾靚，開始轉紅色，而且好太陽都幾正呀。

不過冇帶大機，係咁上下。都幾靚呢。

仲有少少黃葉。

之後順便行吓荔枝窩，都幾長路程，雖然有上有落，但啲路都幾易行。而且比較闊，唔會好多人好迫。

行到咁上下有啲地方有紅樹林，亦有啲地方望到水，幾舒服，幾好風景，可以坐低食吓嘢，休息吓，呼吸新鮮空氣。

但來回都有差不多十公里，要行成三小時架，上年同今年行完都是天黑呢。

但有上有落當做運動都幾正。

20141213 - •●❀美人樹❀●•

12月13日星期六

同媽媽去完迪迪尼之後，熊車我哋返家時，記得前陣子有報導話迪欣湖有棵美人樹，所以就兜過去睇雨，在迪欣湖最入的位置，不少攝友在拍攝，不過眼見花已落了不少，不是最美時刻呢。

以下是報章的部分報導。

 

雖然立冬已經過去一段時間，但天氣仍然溫暖，在這暖秋初冬的天氣是郊遊的好季節，迪尼士樂園外的迪欣湖活動中心近日「美人開花」。所指的是中心內約一周前開始開花、一棵逾10米高的絲木棉，粉紅色花朵佈滿整棵樹，遠看猶如盛開櫻花。

據「樹木谷」網頁介紹，絲木棉屬落葉喬木，花期在11月。近年較多地方有種植，包括香港公園、南蓮園池和荔枝角公園等，但沒有如迪欣湖這棵美人樹盛開。迪欣湖活動中心免費入場。                                                                 

20141213 - ◇◆聖誕迪迪尼◆◇

12月13日星期六。

今日同媽媽去迪迪尼，都係為了睇聖誕嘢。呢三年少咗好多聖誕裝置。

只有點點裝飾，聖誕屋無咗lu~

一入園，媽咪話肚餓，要食waffle

即叫即整，幾好食架，暖暖地加啲cream~好味。

好大棵聖誕樹就年年都仲有。

今年套衫好靚，紫色好靚，唔再係紅紅綠綠。條裙有音符。

donald duck 都係紫色。可惜影唔到daisy , chip n dale 同duffy~

今年中庭有驚喜，有mickey minnie 公仔，都係我最愛的紫色呢。同迪士尼朋友啲衫襯番。

背面是donald & daisy~，影唔到daisy，就影呢個補數。

duffy聖誕衫好sharp呢。