20171230 - 🏃🏻‍♀️🏃🏻‍♀️跑跑跑🏃🏻‍♀️🏃🏻‍♀️

12月30日星期六
宜家搬返屋企之後，熊人晚晚都不在家，所以只好自己做運動。
因為同事們個個都話要減肥，我唔想自己成為最肥一個人。
所以都要努力KEEP~

19/12 星期二跑，天氣凍原來跑得好辛苦，其實都有15度，但啲風好赤，吸入氣管唔C服，而且一個人都冇，有啲危險同覺得好淒涼。由於成個月冇跑過，跑得好慢又唔夠氣。


26/12 星期二跑 嫂嫂煮飯食，BB跟咗去31樓，就趁機來個黃昏跑，黃昏跑係最舒服，因為冇咩太陽天又光，而且好多人在長廊，冇咁悶。今次明顯跑快了一點。跑完洗頭沖涼再去食飯，正。


28/12星期四因為熊人的保險CERT有問題，冇得開工，今次一起跑，冇咁悶。明明狀態唔錯，一跑後山條路就少了半K，懷疑GPS有問題，CHECK 唔到Distance~計唔準。


30/12 星期六，有啲跑上癮，又或者怕自己晚上好難抽時間跑，怕太靜，又趁BB去了31樓得大半個鐘去跑跑，今次肯定了個GPS有問題，因為我只在屋苑後山山路跑，不停來回，每次我一調頭就話"activity paused"好煩，於是我自己計時跑半小時就收工。


宜家磅數低了，雖然不是好理想，但九成衫都著得返，我另有一個目標是減體脂，原本是24%，其實都算標準，但如果以BMI計就應該要低一點，近日磅過23.6%，我的目標是21%-22%，宜家除了跑步仲要跳舞，因為有時會落雨不能跑，那就要先養成經常運動的習慣，不是跑步就是跳舞，減肥之路是難行的，希望可以持之以恆就好了。

20171230 - ☆★新港城玩玩★☆

12月30日星期六，
有媽的孩子像個寶，返咗兩日工又放假了。
BB一見到我放假就好開心，唔要姐姐，比姐姐抱走仲喊到有眼淚呢。

同BB玩咗一陣就帶去落新港城玩一陣，因為趁最後幾日仲有報置，俾佢走走，到兩點先食飯瞓覺。
今日天氣好熱，所以同佢穿薄外套，
係恐龍嚟架，恐龍出巡。

上次兩三個星期嚟玩仲未行得穩，宜家行得好好啦。



佢好喜歡呢條隧道啊。

同場有無線「誇世代」的小小影相位，好似做到懷舊的感覺，同BB影吓啦。

BB宜家識行，咩都可以自己行去睇啦。

見啲假嘢食好得意，我自己都影吓，可惜只有我一人帶BB，所以冇人同我影相。
不過我好鍾意同BB獨處的時間，雖然好攰，但都開心。

同日夜晚又去表哥屋企玩，一人騎一隻。

唔知點解會識V字手勢。

20171227 - ◇◆聖誕節@海港城◆◇

12月27日星期三
因為要清假，所以今日放埋今年最後一日假，又可以同以朗出街玩玩了。
一早食埋25號喺葵芳買的PASTRY~
HEHE，好好食，BB又要食。


之後叫工人姐姐俾飯俾BB食咗先，再坐車出去，由於BB成日喺私家車度瞓，所以冇同佢瞓晏覺，希望佢喺車上瞓多啲。
等出發時搞我個化妝袋，佢點知個眉筆係咁用架？



喺車係瞓了呀，但之後一到商場就醒咗唔肯豬。
一去到LCX有嘢睇，俾佢地地，可能剛瞓醒唔太開心。

啲嘢幾靚，可惜未WARM UP~





之後我哋去咗OCEAM TERMINAL~


開始WARM UP 了，識得周圍望。
今年海港城好靚，好有聖誕氣氛。

每年聖誕尖沙咀燈飾必數海港城，今年繼續主打華麗布置，會有三艘巨型聖誕飛船帶你進入「天空之城」。飛船長20米、高7米，有螺旋槳走馬燈轉動，更有2,000個LED燈閃閃下。而布置當然不只得個睇字，大家可登上最大的一艘飛船，由聖誕老人做你的機長。而在周末更會有香港首架無人機空中表演，是商場特意跟民航處申請，機會難得！同場亦有LED小提琴表演及Hoop呼拉圈舞蹈，聖誕氣氛爆燈。

飛船好靚，好彩色，如果是晚上應該更加靚。

有不少影相位。

晚上應該好BLING BLING，bb周圍行之餘，亦都識得四圍睇嘢，望天上的裝飾。

自己行好醒目呢。

之後我們去了Pizza Express 吃吃，吃了418的聖誕SET
好好味的麵包With cheese

pizza啲料有啲似肉乾，但又頗惹味，好食。

仲有雜菜闊條麵。

甜品只剩吓聖誕蛋糕，薑餅人係好令令呀，不過個蛋糕好甜。

之後去瘋宅搵哥哥~然後返歸，喺停車場見到啲雲好靚，完美的一天。
之後BB回程5:50 -7:15都瞓覺，夜晚就唔瞓了。

20171225 - ❃❃Passion by Gerard Dubois@新都會廣場❃❃

12月25日星期一
聖誕日，由於BB昨晚一點先瞓，佢今日瞓到十點起身。同佢落街食早餐，食完哂嘢又同佢玩玩，玩到兩點又唔瞓，我鼻敏感發作瞓了一陣。熊又同佢睇電視到四點，佢終於捱唔住要瞓。
點知瞓到6點半都唔起身。今日本身諗住同佢去新都會行吓。佢瞓到鬼五馬六真係好難搞。
只好叫佢起身!。
宜家有車六點半出去都仲得。新都會泊車係好抵，所以同佢行吓都好。


一去到商場就自由行，又要衝入啲舖頭。剛剛趕得切聖誕節識行真係好好，可以俾佢周圍行，跌都唔痛，由於商場有人有店舖，BB好開心，自己四圍行。
影呢張相昤，仲吸引到啲售貨員望佢呢。

BB一見有SALES 姐姐同佢講嘢就拍手手。

行一陣就去了我哋至愛的餐廳吃吃--Passion by Gerard Dubois
沙律新鮮又多款食，好食，熊人點了加多加多，BB唔喜歡，好彩有啲通粉。

另外點了雜菌意大利飯，好好食，但佢真係好正宗的意大利飯，飯比較硬，BB又唔可以食太多。結果BB勁飲粟米湯。

我哋點了千層酥，真係好好食。

BB連椰子水都唔放過，不過宜家有樣好，食完啲嘢俾佢見到冇，佢會自己攤開手話冇，唔會再扭，但你一定要俾佢睇到清哂囉。


食完帶佢去中庭行吓，佢好開心。周圍玩，又想同其他小朋友玩，見其他小朋友跳舞，佢又跟住郁同拍手手，好開心呀。
BB仲唔肯俾我拖，第一次甩開我隻手，嗚嗚。

陪佢玩陪佢走好攰，佢又未識上落一級樓梯，又想衝去扶手電梯，真係捉雞咁捉，我想影吓相都唔得。

只影了中庭咋，原來有戶外花園都冇影呀。因為好快又成十點，又要返屋企了。

20171224 - (◍•ᴗ•◍)大棠紅葉

12月24日星期日，
今日同BB去嫲嫲度，即是元朗，姑媽，姨婆，表叔都喺度。BB又喺車度瞓咗，瞓醒發現唔喺屋企就唔開心了。又唔俾人抱，好彩過咗一陣熱身又OK~

食完聖誕餐之後，同BB玩一陣就去大棠睇紅葉。
由2012年開始差不多年年都有去睇紅葉，只係上年2016年生完BB而且冇車唔方便就冇去。
由2015年起開始越來越多人，直情封路，唔俾私家車上。所以有車都冇用，我哋於是坐紅VAN到大棠路最盡頭行上去，都OK。
帶住BB就辛苦啲，因為熊人帶BB車。又有BB又有車，好多嘢拎。
去到最靚的幾棵，俾BB落地，由於地下唔平，BB唔係行得穩，所以易仆倒，於是叫佢坐地地玩紅葉。


BB淨係玩葉都好開心。我哋逗留咗一陣，

同BB影相。當日天氣好好，唔熱唔凍。


上星期一次得10度的乾凍令到今年的紅葉好靚，除了最大的十棵八棵有紅葉之外，好多小樹都有紅葉。


由於今日是平安夜，又係星期日，所以真係超級多人，人山人海。

冇帶水去行，落山時忍唔住買水同保礦力，BB見樽裝水又要飲，因為凍，唔俾佢飲就叫。
最後我孭佢落山瞓了，五點半瞓到七點二，晚上食嫲嫲的白飯魚飯，我哋就食麵。
點知夜晚BB唔肯豬覺仔，要同佢睇電視到一點。