Σ( ￣□￣；) 又去

今日又去咗迪迪尼呀，天氣都幾好呀，有風唔算好熱，太陽時有時冇，唔出太陽比較好，唔會太熱，曬起想嚟都好辛苦架～

今日去咗Corner Cafe食午餐，佢啲餐好多選擇，有中式有西式，個甜品有芒果黑糯米，除咗食set之外，仲食咗個夾餅，係mickey樣架，都幾好食呀，出面脆脆，幾有水準！

可能因為星期二，所以人唔多，鬼屋條龍都唔多人，不過都排咗成廿分鐘呀>_<，原來都幾恐怖，之前諗住唔恐怖啦～唔知係咁嘅，可能因為我係最頭入去，所以成日中伏，成日俾啲鬼怪嚇，而且好鬼黑，好多位黑到伸手不見五指呀，行最頭又唔知有咩走出嚟，所以有啲驚驚呀，不過真係唔錯，值得去呀～

今次有睇到下午嘅Parade，日頭同夜晚係唔同架，都ｏｋ啦，不過好似唔夠夜晚咁有氣氛，冇Halloween嘅裝飾，不過啲公仔cute啲，同埋佢哋行得好近我呀，可以影到Daisy，好近真係唔錯～

今次有啲時間影唔係Halloween裝扮嘅公仔，不過可能因為始終Halloween太熱，所以呢啲傳統嘅公仔俾人冷落，好可憐呀，而且香港迪士尼好少winnie the pooh嘅公仔，得一隻Pooh，連跳跳虎都冇，以前去日本有齊Pooh 啲Friend，呢度就冇，可惜啲，不過有Donald Duck都唔錯～

今日勁影公仔呀！好開心，而且仲有個南瓜頭周圍走，上次冇架，今次見到幾大捉佢影幅相～

由於玩咗成日，好攰，所以今日唔讀書住，聽日先讀啦，可能重陽節都冇得玩～　>_<

╭∩╮_(︶︿︶)_╭∩╮喪食之後又胃痛

十月十二日　（星期五）
公司有同事請食下午茶，由於怕太飽已經唔似同事咁揀三文治，豬扒包，我揀咗沙律，不過原來成個飯盒咁大，我邊食得哂呀，所以食咗一半之後，留番一半今朝食，

 

放工之後約咗ChanC9去葵芳間風月堂食飯，冇叫餐，因為份量太多，但係加$18可以叫餐牌上$28蚊嘅飲品，ChanC9叫咗個金菇牛肉卷烏東，因為我唔食牛肉，所以冇試到，各位bloggers，如果想請我食飯的話，係牛肉就唔好預我啦，記住啦！

我自己叫咗個腸仔茄汁奄列飯，不過竟然隻蛋唔係包住啲飯，以前去沙田間食過係包住架，可惜沙田間風月堂執咗啦～好彩味道都ｏｋ～

ChanC9意猶未盡，仲想再食嘢，所以叫咗個夾餅，有三種雪糕，豆腐，綠茶，紅荳，全部都好食，食完之後好飽．．．

十月十三日　（星期六）
今日又去百瀧食，因為有八折coupon其實之前已經食過幾次，所以有啲都冇影相，例如個石頭燒飯，同埋巨峰提子乳酪，次次都叫，費事影相啦～

今次食個pizza，係海鮮pizza有，冇pizza hut咁heavy，有魷魚架！白色嗰啲就係啦～

之後叫咗甜品，豆腐布甸拼綠茶布甸，豆腐布甸有芝士味，都幾濃味，不過好細杯　>_<

綠茶布甸苦苦地架，好正呀，因為我鍾意食苦嘅嘢，而且有啲紅荳好好食．．

食得飽飽之後，再加上心情惡劣，個胃又唔舒服，心情好差呀，連功課都冇點做，做咗一科咋，因為真係好唔開心，覺得自己咁嘅生活好冇意思，不斷永無止境做功課，今個星期做完，即刻下一個星期又嚟，完全冇機會抖吓，唔係呢度痛就嗰度痛，唔知為乜，好冇癮，不過奇就奇在咁唔開心，咁多病痛都一樣係咁肥屍大隻，睇嚟我都係做肥婆啦～

♠♤Pokka Cafe♤♠

十月六日(星期六) 星期六去咗Pokka Cafe 食飯，因為自從胃痛之後，好似好耐冇點食過一餐好嘅，近日個死人胃好似好咗少少，可以食返多少少，所以星期六唔駛返工咁開心，要食好啲～

有牛肉眼定食（唔係我，因為我唔食牛嘅）唔知好唔好食，不過個三文魚就唔好食，因為唔係魚生，似煙三文魚，好腥 >_<

咖喱豚肉天婦羅飯－－請留意上面兩幅圖都係同一個飯，因為個碟太長，要分兩張相影，個豚肉（豬肉）包住隻蛋嚟炸，好特別，好好食，可能好多人叫set，所以其他少人叫，呢個唔係餐，即炸，所以熱辣辣好新鮮，日式咖喱味道，一直係我嘅至愛，佢啲咖喱一樣好有水準，總之呢碟飯好好食～

至於甜品，係自家製咖啡凍餅拼綠茶Tiramisu，由於四十幾蚊一個，所以足夠兩個人份量，好好好好好食，個咖啡凍餅好大件，而且唔同一般凍餅，唔太甜，唔算好重咖啡味，但好似食到有啲朱古力及果仁，好味
不過點都唔及個綠茶Tiramisu好食，唔好睇佢其貌不樣，佢比較creamy，好重Tiramisu本身唔算甜，再加上好濃嘅綠茶粉真係好好食，加埋點吓啲紅豆，好好食，下次一定再食呢個～

(◍•ᴗ•◍)迪迪尼

十月五日(星期五)

放下晝就係去迪迪尼度玩，第一次去迪迪尼咋，因為見到牛奶妹迷同埋chickenpig個blog，買咗annual pass，可以成日入去玩，所以我都決定要買番張去玩餐飽，有個朋友喺附近做，好熟路，所以帶我去酒店食lunch，啲嘢好大碟，一個沙律加一個牛角包已經飽到上心口，酒店環境好啲，唔駛同人迫，

當日天氣好熱又好多人，可能十一黃金週未過，所以好多大陸同胞，所以費事排隊玩遊戲，反正成日都會去啦～反而影吓相算～

窗櫥公仔都影一大餐　：ｐ

店舖售賣嘅貨品都唔放過～　^_^

今期流行Halloween，所以有唔少擺設係關於Halloween，最有代表性一定係南瓜啦～

最吸引最受歡迎當然係Mickey Mouse & Donald Duck，不過我覺得唐老鴨得意啲，好抵死～

夜晚都幾靚架，中間棵樹都唔錯～夜啲恐怖啲

美國大街夜色都OK啦！

巡遊之前城堡啲光幾靚，有蜘蛛網，扮恐怖～

巡遊好多人睇，好熱，天氣真係好悶熱，好多同胞死迫爛迫，遲早俾人迫死，>_<，又影唔到相，呢張係唯一一張似樣啲啲

我本身好唔鍾意入口個水池，因為唔鍾意啲銅嘅顏色好似屎咁，不過原來夜晚反而好似靚啲，@_@

因為十月逢星期五，六都九點至放煙花，原本睇完巡遊都成八點，可以等吓，不過天氣真係好悶熱，辛苦到爆，所以下次先睇啦～今日睇chickenpig個 blog知道有鬼屋，所以遲啲再去啦～

╭。☼中秋假期一日遊 (下)☼。╮

快快手手出埋呢篇先，因為已經過哂時 >_<
九月廿六日星期三
去完公園之後去咗大埔超級食飯，因為想平平地，又唔駛太多人太迫，所以揀咗味千拉麵，老實講我唔係太喜歡味千，因為啲麵唔夠爽之餘，而且湯底好鹹，我好怕鹹，所以都有幾年冇食過啦～不過今次都可以，麵質係唔爽，不過最緊要唔鹹都算係咁，最慘係朋友挨知我個胃唔掂，所以陪我食好少嘢，真係怕餓餐佢！@_@

之後走咗去西九長廊影花燈，唔好意思，宜家先post，中秋都過哂>_<，我估都冇人有興趣睇啦～　: p，不過想講句係，俾人搵咗笨囉，已經由東面入口行，比較近都行到隻嘢咁，因為真係好遠，再加上我又冇鬼用，好頭痛，辛辛苦苦去到發現冇咩花燈，而且又好黑，我部相機影得唔好，唔夠光，不過都逗留一陣，結果個頭勁痛，要打的返歸．．．