1月31日星期日
近來芝士撻大熱，要去SOGO 尖咀排隊買先可以食，我哋就一向都係要排隊就唔會食果種人，
而十一月底去東京時都在高尾山見到有芝士撻就食咗一次，唔係最出名的芝士撻，因為當時行行吓山想食嘢，又見唔駛等好耐，覺得都OK，奶味重，反而唔太芝士，本人好怕濃芝士味好酥。覺得熱辣辣又流心都幾好食。
熊人有一日上網睇人教整芝士撻又整吓。個餅皮係曲奇皮，我喜歡。
個漿唔太濃味，有啲似牛奶，當然又比牛奶濃味啲，係會流心，好好食。
有機會都想再食。
2016年1月31日 星期日
20160131 - ♠♤齊齊行山♤♠
1月31日星期日，
熊人話有免費飛去AIA嘉年華，本來約好哂同黑白人四個一起去玩，點知原來星期六日不可以入場。
好彩大家住樓上樓下，在lobby商量咗一陣，一係去跑十個圈，一係又去城門水塘，結果又係去城門水塘.....琴日先行完又行....。就快馬騮都認得我同熊人了。
今次一落車就見到牛牛。
今日冇咩太陽，天色唔好，仲話開始轉涼，但我哋都行哂成個水塘，我同熊人行慣當然冇問題，朋友好少行都堅持行哂，中斷食個包，出一身汗咁，星期日近近地行兩個鐘都幾好。
我哋充當導遊帶佢哋去水浸百千層。
大草地，不過今日冇太陽就唔太吸引。
但數目真係太多，令到我哋兩個女仔都有啲驚。
2016年1月30日 星期六
20160130 - ◐◑城門水塘◐◑
1月30日星期六，
放工唔知去邊好，去冰室食吓嘢，有熱維他奶啊。飲吓先。
見天氣不錯，於是行吓城門水塘，冬天行邊度山都係正。
城門都有楓香，不過唔集中，呢度一棵，嗰度一棵咁。
例景百千層林，兩旁都是百千層。
水塘景，水浸百千層，但水不多，不會浸到。
近幾次少咗在百千層附近逗留，因為啲馬騮開始會在水浸百千層附近搶嘢袋搶嘢食，
所以反而喜歡過咗大洗手間之後，有兩個大亭個位行入去，好大片草地，好正，起碼無馬騮騷擾，可以慢慢hea
2016年1月29日 星期五
20160129 - ☆★元札幌拉麵@悅來坊★☆
1月29日星期五。
搵返隻戒指好開心，可以開開心心同熊人行街街，因為屋企個鑊壞了，要買個隻，不如就去荃灣熊貓酒店間AEON睇吓，放工去行吓，貪佢少人。
唔知食咩，不如就在悅來坊附近食拉麵，
呢間拉麵成80蚊個麵，但就好一般，除了糖心蛋都算幾靚之外，其他麵質呀湯底都係普普通通，湯底有啲咸，豬軟骨OK啦。但成7,80蚊個麵就唔抵了。
食完就行AEON，買到個平平地的鑊，始終呢度比較多選擇，我仲行咗一陣買咗啲LINE利是封，同埋有啲賀年禮物，是啲日式的糖果，都是55-80蚊左右，唔係好貴，但包裝靚靚，冇傳統禮物咁悶。AEON多選擇，又冇一田咁貴，又有12蚊店，我都幾鍾意行吓。熊人仲買咗罐曲奇自己食。
仲爭啲參茸海味就搞掂。
20160129 - ~(￣▽￣)~*失而復得
1月29日星期五。
呢排天氣凍，隻結婚戒指好鬆，試過甩出嚟，點知星期三晚去媽媽度發現唔見咗隻戒指，喺搵過媽媽屋企冇，公司又冇，估計都係唔見了。好傷心，熊人話買個隻都好唔開心，始終唔係最初嗰隻，諗起星期四去番我哋當日結婚嘅地方飲，但一年多就唔見了戒指，好想喊，事實上都喊了一餐，覺得自己好冇用，戒指都保唔住。 嗚。
點知星期五差不多放工時又神奇地喺公司找到了。
竟然喺垃圾桶側邊在公司著的鞋裡面。 (-___-)
完全想像唔到幾時跌，搵到的時候真係喜出望外。
戒指終於戴番上隻肥手上，開心哂。
熊人話覺得我會找到喎。.......
2016年1月24日 星期日
20160124 - ❃❃❃超凍的一天❃❃❃
1月24日星期日
熊人病咗，我就繼續咳咗一個星期，天文台同日本氣象局都講咗今次係個超級寒潮，大帽山有霜凍警告，如果唔係兩個都病哂，熊人琴晚應該揸車上咗大帽山睇冰，睇霜凍。
星期六晚臨瞓前CAP圖見到5C已經嚇一跳，點知有朋友六七點CAP圖得2點幾度。
真係唔敢相信香港會咁多，2015入冬以來都唔凍，11,12度已經好凍，大家以為冬天已死時，原來可以有真 寒流。
我哋兩個病哂，無緣上大帽山見識見識，不過冇病可以上去又唔係好事啊，因為太多人上，又落個雨，成條路都結冰，唔少人被困，如果我哋上去都可能中招。
瞓到點幾兩點，熊人再瞓，我無聊CAP圖日間都得3.2C....真係唔係講玩，十一月時去日本8度都牙痛咁聲，當然，富士山負一度就堅凍，但人哋有暖氣凍唔死，香港冇暖氣會死人，伸隻手落街好凍呀。
當晚應承爸媽返家吃，因為佢見我哋病，想煮餐飯俾我哋食，否則不會離開張床。
既然都返馬鞍山，就上去馬鞍山郊野公園搏吓見唔見到冰掛，真係有呀。
香港都出現冰掛，好難想像吧。
我哋逗留數分鐘影吓相已經忍唔住要上返車啦。手會凍彊，人都凍彊。
五十年一遇的寒潮，今天我同熊經歷了。我們一起共同經歷正在一點一滴的累積
2016年1月15日 星期五
20160115 - •●瑪寶鮮●•
1月15日星期五
同同事慶生，去咗尖沙咀寶勒巷瑪寶鮮食中菜，
呢個九肚魚，漿粉較得幾好，夠脆。
叫咗個粉絲煲，少少辣好惹味，好送飯。
糖醋骨，黑醋酸酸甜甜，好開胃，
幾味重口味的菜色，就要一個比較淡口的上湯浸雜菜、好多雲耳，又有蕃茄，又有菇，白菜，上湯清清地，我喜歡清淡啲。
另一個都是重口味的雞煲，其實係幾好食，啲醬汁令雞好入味。
姬松茸燉響螺，師傅以響螺、姬松茸、赤肉和雞件等燉約6小時，松茸味好香，料多湯濃，足料之選，原來呢個湯係出名架。
最好仲有糖水紫米露送，有埋塘水好圓滿。
2016年1月12日 星期二
20160112 - •●❀文華生日蛋糕❀●•
1月12日 星期二
近來公司同事玩不和，但一於少理，就當冇事發生。
門面工夫都會做，同事生日都仲會買蛋糕慶祝一下。
今次買文華。三百幾蚊一個，但唔大個，可以話好精緻。早預訂可以寫生日牌。
識食的話應該最清楚文華出名是opera,另外是芝士蛋糕。今次因為由十月開始都冇同同事補祝，十月十一月一月都有人生日，於是一次買兩個，一次食哂兩個出名好食。
第一個芝士蛋糕，雖然芝士蛋糕好多地方都有，但佢呢個濃度硬度都洽到好處。仲有少少滑滑地的感覺。
另外是opera，朱古力夠香夠滑，有蛋糕也有朱古力有層次感得來仲入口即溶。想一吃再吃的感覺。
2016年1月10日 星期日
20160110 - •●❤西班牙海鮮飯❤●•
1月10日星期日
唔知食乜會炒吓飯，
加啲海鮮記非常鮮味。又係西班牙海鮮炒飯，熊人已整懶整熟，非常快捷。問題係睇吓配咩海鮮，今次配鮮蝦，帶子同埋鮮魷，正呀，好喜歡鮮色，好耐冇食過鮮魷。間中一次理得佢膽固醇高定低。
2016年1月9日 星期六
20160109 - ☼☼大嶼山分流☼☼
1月9日星期六
唔駛返工的星期六，熊人一早PLAN好要去行山行鑊金的。
一早去葵芳大家樂食個早餐，食飽飽先出發。
坐車去東涌再轉巴士入去，到了，大嶼山郊野公園，
今日行的地方是石壁-->狗巔涌-->分流-->二澳-->大澳。全程約16公里。鳳凰徑第七，八段。
開如時大概一小時是水渠路，好易行。之後就落到狗嶺涌，有海有溪，狗嶺涌出面有沙灘。
而呢度係狗嶺涌與分流之間，亦是全程唯一最多上斜的一段。上斜上得高，當然會有好風光，風景靚，對住個海好大風。風聲海聲好好FEEL。
之後又上又落一大輪，中間仲要經過沙灘。到達分流砲台
分流炮台是法定古蹟，位於大嶼山西南端，俯瞰來往珠江的航道。《澳門記略》載雍正七年(一七二九年)時大嶼山「兩山各設炮台」，分流炮台該為其中之一。炮台長約四十六米，闊二十一米，牆身以花崗石及青磚疊砌而成。炮台曾遭海盜所據，及至一八一〇年間，海盜先後向清廷投降，炮台才再恢復戍守。估計至一八九八年新界租借予英國後，炮台才正式棄置。
炮台在一九八五年完成初步修繕工程，一九九〇年再進行大規模修葺，並改善附近的環境與設施。
後沿著鳳凰徑，上走至煎魚灣，經過林蔭下的路段走至二澳。
去到二澳竟然有好多芒草。
可惜只有手機。已盡力。
再沿路行就到大澳海邊，上落程不多，只是路程長，大約要5-6小時。
去到大澳餓到飛起，食越泰式嘢，炒粉。
雜肉湯。好味。再坐巴士去東涌轉車回家，好充實的一天。
2016年1月8日 星期五
20160108 - ☆★Instagram★☆
1月8日星期五
近來喜歡玩Instagram ，主要是因為有一個平台可以俾我放奸夫相，香港人冇咩人識欣賞奸夫，有啲人直情唔識咩叫奸夫，又叫宇宙人，英文名是craftholic，由2008年開始有呢個品牌。
有四個主要角色，有兔，貓，猴子，仲有一個角色係大家一直以為是熊的，其實是sloth，當大家知道sloth其實就是樹懶，咁大家不得不承認，熊同樹懶其實是天生一對了。
自從開咁ig account 之後，差不多每天都放試奸夫相，有不少志同道合的人都會like吓，有#tag之後，仲見到好多日本人放好多有創意的奸夫相。
可能因為奸夫手長腳長可以扮成人做好多動作。有啲有好大隻奸夫可以玩電腦，坐埋枱食飯。
呢類奸夫冇手長腳長是因為佢哋時baby craftholic。
2016年1月7日 星期四
20160107 - ｡◕‿◕｡Annual dinner
1月7日星期四，
公司annual dinner，已經第八年參加公司annual dinner，今年好多好多人，個會場等影相好迫，同埋唔知點安排影相，永遠唔知幾時到自己，自己同事利用backdrop影吓相好過。
五點左右就可以放工，因為老闆要早睡早起，要好早食飯，好早瞓。
annual dinner 飲吓酒啦，宜家好少飲，只有xmas party 同annual dinner 可以攞正牌飲吓，以前有after party再吹水，不過宜家係星期四，冇人會再after party 飲酒啦。
最期待的時間是table prize，永不樂空，每人有千三蚊coupon，今年冇咗安記海味啦，結婚之後反而想要海味呀。我抽到百佳係最實用的。
呢兩年啲餸好食咗好多，唔駛再食難食的潮式拼盤，反而係好味乳豬。
好大個蟹拑，
魚翅好多料，
鮑魚都好大隻，菜苗好食。可能因為合拼咗後要好好睇睇，今年啲菜色落重本。
人哋中咗的金幣，我兩次都中咗個馬年金幣呢，中金幣係好lucky的事，當年我就結婚啦。
訂閱：
文章 (Atom)