★☆蘭芳園ｖｓ勝香園☆★

中環有兩間大排檔，聽聞好出名好好食，有蘭芳園和勝香園，究竟兩者有咩招牌菜或邊間好食啲？

蘭芳園位於中環結志街，分老店同新店，其實兩間只係喺隔離，招牌菜有奶茶、豬扒包、撈丁、西多，我就試過奶茶同撈丁，同事話出名嘅蔥油豬扒撈丁好油膩，

麻麻地，所以我叫咗心多多撈丁（雞翼，五香肉丁，煎蛋)，

 

我覺得一般咋，撈丁同一般茶餐廳，差唔多，係雞翼幾好食，幾入味咋，至於奶茶又係好一般咋，只係港式茶餐廳嘅奶茶質素，唔係特別好，反而我覺翠華好啲，

至於服務就唔會有咩期待，不過不失，高效率咁啦，價錢就係一般茶餐廳價錢，

總括係冇咩驚喜，一試無妨，如果唔係近近地就唔好特登去試囉！

勝香園位於中環美輪街2號排檔，都幾難搵，招牌菜係奶醬多、咖央脆脆、蕃茄蛋通粉、檸蜜脆脆、茄牛公仔麵、咸檸七，我食過蕃茄餐肉蛋通粉，奶茶，檸蜜脆脆同奶醬脆脆，

蕃茄餐肉蛋通粉好好食，蕃茄湯底夠濃夠熱，好味，而奶茶又係一般，至於脆脆就非常好食啦！脆脆其實係將一個豬仔包切成四分(半個)再烘，每塊咬落去都是一樣的脆，檸蜜脆脆就係上面搽了牛油和檸蜜，奶醬脆脆就係上面搽了花生醬同煉奶，喜歡花生醬嘅就一定啱食，檸蜜脆脆就味道夠特別，各有特式！

食物方面勝香園真係好食好多，不過服務就好差，尤其是午飯時間真係冇人理你，要執枱都睇心情，有時問佢哋寫嘢，佢哋會話：我唔係寫嘢架=_=…係唔係真係咁separation of duties呀？吹脹就真．．．

好食係好好食，不過太多人仲等得勁過蘭芳園，環境差過蘭芳園，唔係去開附近最好唔好特登試，唔想受氣又係唔好試，如果真係要食就揀non-peak hour，不過佢收五點半，好多時都好多人．．．

(以上圖片from openrice.com)