20180204 - •●✿馬鞍山玩玩✿●•

2月4日星期日
今日媽咪要大掃除，要姐姐幫手，所以買咗佢一日假，我今日輕輕鬆鬆可以瞓晏啲，我就早少少落街染髮，一點前OK就叫熊人帶BB落馬鞍山玩吓，由於馬鞍山兩個商場都有啲新年報置，俾BB走走，放吓電。
可能因為整完頭髮都未夠一點，天氣凍，都唔係太多人喺商場，BB可以行得好開心。






馬鞍山廣場係Looney Tunes ，比較冷門，有翠兒，賓尼兔。

bb只係走走，唔係好識點玩，但出街睇吓嘢就開心。呢張相影得bb好細粒，人唔多，唔怕流感，行得好開心，好放心。

之後去咗新港城，有波波池，彈彈床，不過呢啲係病菌溫床，高危，唔會俾bb玩。只俾佢入去竹林，呢度比較多小朋友，bb都好開心，不過佢都好似唔多識玩，冇上次新都會咁興奮，唔知點解玩玩吓見我喺出面仲要我抱。

不過佢肯企定定影幾張相都好唔錯，好可愛。



之後成兩點左右就去食lunch，今日等teawood，等約十多張枱，不過好多人攞咗飛都走咗，我哋半粒鐘就入座了。
點了一飯一麵，好多人都點呢個大蝦松子麵，幾好食呀，松子好食，蝦都幾爽口，可惜份量比較少，

古法香腸滷肉飯，其實份量都唔係好大碟，但係食落去都好香口同埋啲肉燥就無得輸好濃郁，啲香腸好有台灣味，好想去台灣食吓嘢呢，加埋半隻蛋都青瓜，好正，

兩個份量都比較少，仲要俾埋小吃貨馮以朗就真係唔太飽，原本想叫蛋糕食同飲杯咖啡，但小馮生開始冇咩耐性坐，所以只好走人去McCafe買杯啡飲吓就算。

返到屋企唔肯瞓，最後五點過婆婆度，叫姐姐同bb瞓。