20160715 - •●❀Sky726❀●•

7月15日，星期五，

約咗朋友食晚飯，試吓意大利嘢，唔駛成日食中菜咁悶，呢間叫Sky 726 位於彌敦道726號頂層，可以睇到旺角夜景。幾靚，同情侶食最好feel。

不過有分兩輪，6:30 同8:30 ，我哋有朋友8:30前到，但因為未埋單，叫佢落街行吓，因為間餐廳係冇咩等位地方。

轉頭上到嚟想點生蠔，ribs等又話買哂，我哋當然不太高興，最後佢哋送咗甜品同埋俾咗九折我哋。

麵包軟軟暖暖，ok。

唔飲酒可叫特飲，好多雜莓，幾好飲。


沙律配雞，個醬汁好好食，生菜好新鮮，可放心食。煙肉香脆，仲有咸香既芝士脆片，亮點係隻溫泉蛋,將溫泉蛋同沙律汁混合，成個感覺好清新。

$158意大利雲呑，蟹肉雲吞，雖然是前菜，但得兩隻實在太少。味道幾好，好香。

鴨脾，

啲人話好食的海膽墨魚汁麵就麻麻地，麵太硬，可能佢哋叫爽口，

72度朱古力配雪糕，朱古力味濃而不甜，配雪糕


焦糖燴梨，焦糖好入味，加上雪梨清甜，呢個最好食。

overall好食，但比較貴。

食吓傾吓又十點幾，要返家了。

20160713 - Keroppi@新都會ヾ(◍'౪`◍)ﾉﾞ

7月13日星期三
熊近來黃昏要上堂，唔得閒，難得今個星期三得閒就去新都會睇吓Keroppi，上星期六睇寒戰時已經見到，當日星期六中午好多人，好多細路，想影都影唔到，又要趁未搬時影吓，抵啲，搬咗就好少會再去新都會了。

今日順便去麥當當試埋蝦堡，一向都喜歡食蝦堡，難得今年加一塊菠蘿圈，所以幾好食呢，再買埋蘋果批。今日最後一日可以用張卡買雪糕送批。XD

 

 

估唔到今次sanrio的公仔中，用keroppi自己一個獨當一便， 一隻青蛙仔玩哂。以前小學時有一期好興keroppi，成個文具舖都係青bb架，當時因為太泛濫，唔太喜歡，宜家睇番其實幾得意，青色都幾靚。

呢個好笑，本身係長形，上星期好急咁影咗之後，發現拉長了，以為電話做乜影相影到咁怪。


呢架車好可愛呢。

20160710 - o(≧ω≦)o食壽司

7月10日星期日

好耐冇請爸爸媽媽食壽司，
今日都得閒就同佢哋五點幾就要等位了。
今日要等姪仔，所以得迴轉卡位，得六張枱咋，等第一張都得成半小時。

好開心，熊人受我感染都喜歡吃腐皮壽司了，我哋食咗兩碟腐皮，正呀，以前有黑糖腐皮呢，宜家冇咗，得番呢個原味，

呢個八爪魚，熊人話係熟，可以食。

爸爸竟然食鵝肝壽司，膽固醇高都食？我兩年前食過，鵝肝係即炸，新鮮，但係同壽司其實唔係好夾。

姪仔至愛除了三文魚三文魚三文魚之外，其實仲有炸蝦。


我們至愛，鰻魚，同埋今次食厚切玉子，去過日本就會知道日本人對玉子，腐皮(湯葉)其實好講究，佢哋有豆腐，玉子料理架，其實玉子係好好味架。

呢個炸蠔都係好好食，次次都係新鮮炸出來，好熱有汁，而塊紫菜係上碟先放上去，好脆口架。


今次飲三文魚頭湯，飲完湯飽飽。

今期蛋糕，千層蛋糕，好味呢，唔駛成日係芝士蛋糕。

20160710 - ☂☂影閃電☂☂

7月10日星期日

星期六天氣好熱，好多地方35度，新界，馬鞍山仲38度，熱死人，，去咗媽媽家嘆冷氣，返家時，馬鞍山落好大雨，好彩我已經回到葵涌，返到去屋企樓下冇落雨呢，我哋仲去麥當當買蘋果批，但媽媽打來叫我快啲返家，急急腳返到屋企落狗屎了，好好彩冇中招。

因為天氣太熱所以做成強烈對流，勁行雷閃電，之後十一二點FB好多人擺閃電相，連手機都影到。我都好想影呀，停雨一陣，大約一點左右又行雷閃電，我就放大機在窗邊影吓，想試影。熊人沖涼出來話咁係影唔到，要整腳架，而且要知道閃電喺邊個方向，唔係亂對住窗口就影到，喺屋企用腳架影了一張，但不太滿意。

於是徹底啲，直情就上街上影。真係影到架。set20-25s快門，光圈大約11，但其實係要講運氣，因為有時閃電唔一定見到條閃電，而且閃當下先按快門根本捕捉唔到，所以只可以守株待兔，每按一次快門，希望呢25秒內有個靚閃電，影完之後，要等部機load張相，為時都有10秒，load 相途中有出現閃電都影唔到了。因為部機忙緊。

就係咁走咗兩次雞，成個幾鐘只有兩張見得人。

但都好開心，因為熊陪我呢個大肚婆癲，我知道點影，但缺乏行動精神，有熊人才會落街影。呢個就係熊人同我有好唔同的地方。

20160709 - ✿｡◕‿◕｡✿寒 戰2

7月9 日星期六。

 

知道「寒戰2」上畫，作為城城迷的我，當然要去捧場，難得星期六放假，一早同熊人買定早場飛(11:30)，55元好抵睇。落一落葵芳睇戲。

 

呢套戲算是近年比較少有冇中港合作的戲，不會硬加一個國語人，看起上來流暢自然。，《寒戰2》是貨真價實的港產片，在一片渾水中，像一朵清香的蓮花。雖然也有台灣演員，但電影中濃厚的本土味道，讓人暗自喝采，精神為之一振。

http://www.reasonformovie.com/2016/07/10/%e3%80%90%e6%96%b0%e6%88%b2%e5%bd%b1%e8%a9%95%e3%80%91%e3%80%8a%e5%af%92%e6%88%b02%e3%80%8b%ef%bc%9a%e8%b4%8f%e5%9c%a8%e8%a6%96%e9%87%8e%ef%bc%8c%e8%bc%b8%e5%9c%a8%e7%b4%b0%e7%af%80/

 

呢個影評寫得幾好，個佈局是當今社會的狀況，不過套戲細節方面就真係太多犯駁，整套戲都好緊張，無悶場，梁家輝一向好戲，郭富城雖然四面楚歌，不過演出唔會浮誇作狀，眼神勝過一切，而周潤發同Janice Man的支線有點硬堆砌，不過周潤發唔需要再做賭城風雲呢類膠戲，發哥魅力勝過劇情，可以俘虜不少發哥粉絲之心。

睇完戲就返媽媽家嘆冷氣，因為天氣好熱，有個風去台灣，沙田去到38度呀，好焗好熱，睇完戲就快快回到馬鞍山坐吓。我哋當日仲訂埋床褥，要訂嘅都訂哂啦，又搞掂一樣。

20160703 - ♨♨自家制pastry+又飲茶♨♨

7月3日星期日

三天假期最後一日，又有睇波呢，德國對意大利，最好又加時十二碼收場，又六點，
不過熊人夜晚整咗啲水果酥，超市買啲Pastry，有時用cream cheese，有時用吉士做餡，再加水果，最正當然係藍梅同士多啤梨。

 

好正呢，睇波時肚餓食就好味。

睇完波再豬到十二點落街飲茶。在葵涌的日子倒數中。都有啲唔捨得。
最緊要去飲吓茶，嘆埋呢一輪。
今次去富臨食腸粉。

懷舊糯米卷。好耐冇食過，幾正。

點心拼盤樣樣有一粒，有雞包，芝麻包，蝦餃，燒賣，粉果，菜苗餃，紅棗糕。

鵝肝咩酥，唔知係唔係鵝肝，但炸粉絲唔錯。

雪影叉燒包。

20160702 - ✿｡◕‿◕｡✿生日@3D奇幻館

7月2日星期六

我生日呀，不過要請半日假先有得連續三日假。

熊人深夜整咗個黑森林蛋糕俾我，要好多車厘子，味道係對辦。不過個蛋糕就好硬，好似鞋底咁硬。XD

之後就去街，熊人知我好喜歡迪迪尼，原本想同我去迪迪尼，但我宜家冇續奇妙處處通，兩個人去要1000元，最慘我又怕熱，咁嘅天氣好辛苦。又有啲嘢唔敢玩。後來知道尖沙咀個3D奇幻館改成迪迪尼，所以就去呢個，7月1日先開始改成迪迪尼咋。我鍾意易3D相而且室內有冷氣，好啱我怕熱的人。

有成幾百張相好得意，除了熱門的米奇美尼，Winnie the Pooh 之外，仲有蜘蛛俠，公主，Frozen，toy story，star war，怪獸大學等，百幾蚊都玩到成兩個鐘。

去完奇幻館就坐車返大圍買少少海鮮返媽媽度一起食，仲有另一個蛋糕呢，係Italian tomato的綠茶蛋糕。

20160702 - ✿｡◕‿◕｡✿生日禮物

7月2日星期六

今年生日係星期六，不過體力不大如前，而且一早約好同哥哥佢哋食飯，所以正日晚上同爸媽哥哥佢哋一起食。

 

嫂嫂買咗一份line 的禮物俾我，好靚呢，淨係個熊人袋已經好可愛，可以俾阿仔用啊。

仲有MISSHA的化妝品，兔兔eye shadow，熊大睫毛液，蜜粉，唇膏，鏡唇彩等，好實用，但我未必捨得用啊。個包裝唔係兔兔，熊大就係莎莉，駛唔駛咁靚先。

 

香港LINE專門店都有得賣，樣樣加起上來應該唔平呢。真係多謝哂。

20160701 - ☀☼愛麗絲夢遊仙境2：穿越魔鏡 電影☼☀

7月1日星期五，

連埋星期六日，連放三日假，去睇吓戲。
昨晚好攰好攰，八點鐘瞓到兩點，兩點起身沖涼同睇波，睇到成六點先瞓，熊人四點看完上半場已睡，今早去睇早場，睇Alice in the Wonderland 2，所謂早場都成十一點幾，但55元，抵好多架，
今日去荃灣睇，去到唔知食咩好，食咗麥當當早餐，有蛋黃哥印在上面的紙，令令。

食完打一陣機就入場，

Alice Through The Looking Glass

Alice in the Wonderland 1 的三年後，此時愛麗絲（蜜雅·娃絲柯思卡 飾）已是遊歷四方的成功船長，但好友瘋狂帽客（尊尼·特普 飾）卻面臨死亡威脅！愛麗絲必須從自大傲慢的時光怪客（沙夏·拜倫·科恩 飾）手上偷走能回到過去的時空轉移球，找到帽客生病的癥結，卻意外發現紅白皇后的秘密，原來，兩人也曾經是好姊妹，直到看似溫柔婉約的白皇后（安妮·夏菲維 飾），做了不可告人的舉動，讓紅皇后（海倫娜·伯翰·卡特 飾）大受打擊，從此性情大變……。
目睹這一切的愛麗絲，想透過時空轉移球的能力，回到一切發生的起點，改變魔境世界的命運！
呢套戲當然睇動畫，真係好靚啊，尤其食TEA嗰度啲嘢食好吸引，值得睇，同埋其實紅心皇后都真係幾慘。
睇完戲有啲餓，看到龍島有芝士撻特價，就買兩個食。都幾好味。

20160629 - ☂☂落雨跑跑☂☂

6月29日星期三，
今早下雨，但下午停雨，於是去跑跑，點知跑跑吓落大雨，初初細細地雨，點知越落越大，最慘我一開始對腳攰攰，宜家真係好冇力，一攰真係可以冇哂力，跑到咁上下，要行埋一邊拉筋，點知拉完無耐落雨，停咗一陣，細雨咗好多，又去跑跑，點知之後好大雨。
一大雨我就唔會跑，怕淋病，熊照跑，但後來太大雨都唔跑了，我冇事做，坐吓就俾蚊咬，幾唔開心。
心情唔多好，見到大雨，要等細雨才行到，更加嬲。